ٹی ٹونٹی ورلڈ کپ فائنل۔۔۔ پاکستان بمقابلہ انگلستان

16اکتوبر 2022توں شروع ہون والا ٹی ٹونٹی ورلڈکپ دا میلہ مُکن والا اے۔ پاکستان تے انگلینڈ دیاںٹیماں اتوار 13نومبر نوں پاکستانی وقت دے مطابق دوپہر اک وجے ٹی ٹونٹی کرکٹ دے عالمی چیمپئن دا تاج اپنے سر سجان لئی میدان وچ اُترن گئیاں۔اوہ دونویں ٹیماں جہناں دی ایس ورلڈکپ وچ شروعات مایوس کن سی۔ پاکستان اپنا پہلا میچ روایتی حریف بھارت کولوں دلچسپ مقابلے مگروں ہاریا جہدے وچ آخری اوور اندر محمد نواز دی چوتھی گیند نوں نو بال دِتا جانا پاکستانی شائقین نوں پسند نہیں آیا سی تے اوہنوں انڈین کرکٹ تے ائی سی سی دی ملی بھگت قرار دتا گیا لیکن اوہدے مگروں اگلا میچ زمبابوے نال سی جہڑا آخری گیند تے زمبابوے نے پاکستان نوں ہرا دتا۔ جہدے مگروں سوشل میڈیا اتے پاکستان ٹیم خاص طور تے کپتان بابر اعظم تے وکٹ کیپر محمد رضوان اپنی بری فارم پاروں مداحواں دے نشانے اتے سن۔ دُوجے پاسے انگلینڈ دی ٹیم بارش نال متاثرہ میچ وچ ڈَک وَرتھ لوئس سسٹم دے تحت آئرلینڈ کولوں میچ ہار گئی جہدے مگروں اوہناں دی پوزیشن اپنے گروپ وچ کمزور لگ رہی سی۔ لیکن آسٹریلین ٹیم نیوزی لینڈ کولوں اپنا میچ ہار چکی سی جد کہ انگلینڈ نے نیوزی لینڈ دے خلاف جت کے آسٹریلیا کولوں بہتر رن ریٹ دی بنیاد اتے سیمی فائنل وچ اپنی جگہ بنائی جد کہ پاکستان ٹیم لئی ہر واری وانگوں اگر مگر دے حالات پیدا ہوئے کہ ٹیم پاکستان اپنے باقی تنوں میچ جتن مگروں وی گروپ دے باقی میچاں دے فیصلے اپنے حق وچ ہوندے ویکھنا چاہندے سن۔ قدرت نے اوہ دن وی وکھایا جدوں سپر 12مرحلے دا آخری دن سی تے اوسے دن سائوتھ افریقہ بمقابلہ نیدرلینڈ تے پاکستان بمقابلہ بنگلہ دیش جد کہ بھارت بمقالہ زمبابوے میچ سن۔ پاکستان نوں سیمی فائنل کوالیفائی کرن لئی اپنا میچ جتن دے علاوہ نیدرلینڈ یا زمبابوے نوں میچ جتوانا ضروری سی۔ فیر انج ای ہویا’ دن دے پہلے میچ وچ ہالینڈ دی ٹیم نے سائوتھ افریقہ نوں دھول چٹائی تے پاکستان نے بنگلہ دیش نوں ہرا کے ورلڈکپ سیمی فائنل دا ٹکٹ کٹوایا۔
ایس طرحاں پہلے گروپ توں نیوزی لینڈ پہلی پوزیشن تے انگلینڈ دوجی پوزیشن اتے جد کہ گروپ ٹو توں انڈیا دا پہلا نمبر تے پاکستان دا دُوجا نمبر رہیا۔ ایس دوران پاکستان ٹیم دی کارکردگی دی گل کیتی جاوے تے انجری توں واپس آئے شاہین شاہ آفریدی پہلے دونویں میچاں وچ تھوڑے آئوٹ آف ٹچ نظر آئے لیکن اوہدے توں اگلے تن میچاں وچ اٹھ وکٹاں لے کے چنگا کم بیک کیتا۔ باقی سارے بائولراں نے ورلڈکپ وچ شاندار بائولنگ دا مظاہرہ کردے ہوئے کسے وی میچ وچ مخالف ٹیم نوں 160 سکور دا ہندسہ پار نہیں کرن دتا۔ خاص طور تے حارث رئوف دی شاندار ڈیتھ بائولنگ نے کسے وی ٹیم نوں آخری اووراں وچ چنگا اختتام کرن دا موقع نہیں دتا۔ دُوجے پاسے بیٹنگ وچ بابر اعظم تے محمد رضوان دی سٹار اوپننگ جوڑی آئوٹ آف فارم وکھائی دتی جہدے اتے اوہناں نوں کڑی تنقید دا سامنا وی کرنا پیا تے کپتان بابراعظم اتے شدید دبائو سی کہ اوہ اوپننگ دی بجائے نمبر تن اتے بیٹنگ کرن۔ گروپ سٹیج وچ بابراعظم پنج میچاں وچ صرف 39سکور بنا سکے تے محمد رضوان وی نیدرلینڈ دے خلاف 49سکور دی اننگز دے علاوہ کوئی تھرٹی پلس سکور کرن وچ وی نکام رہے سن۔ ایس دوران اوکھے ویلے محمد افتخار’ شان مسعود تے شاداب خان نے مختلف موقعیاں اتے بلے بازی وچ ٹیم نوں سہارا دتا۔ خاص طور تے سائوتھ افریقہ دے خلاف محمد افتخار تے شاداب خان دی ففٹیاں نے اوس جت وچ اہم کردار ادا کیتا۔ پہلے دو میچاں وچ خراب کارکردگی کارن حیدر علی نوں ٹیم توں آئوٹ جد کہ نوجوان وکٹ کیپر بلے باز محمد حارث نوں ٹیم وچ شامل کیتا جہناں نے اجے تک ٹیم دی ہر جت وچ اہم کردار ادا کردے ہوئے چنگے سٹرائیک ریٹ نال بیٹنگ کیتی اے۔
دونویں سیمی فائنلاں دا جائزہ لیا جاوے تے پہلا سیمی فائنل 9نومبر نوں سڈنی کرکٹ گرائونڈ وچ کھیڈیا گیا جہدے وچ کیویز نے ٹاس جتدے ہوئے پہلے بلے بازی دا فیصلہ کیتا تے شاہین آفریدی نے پہلے ای اوور وچ جارحانہ اندازوچ بیٹنگ کرن والے بلے باز فن ایلن نوں ایل بی ڈبلیو آئوٹ کیتا جہدے مگروں ڈیون کانوے نوں شاداب خان نے شاندار ڈائریکٹ ہٹ نال رن آئوٹ کردے ہوئے پویلین دی راہ وکھائی۔ اوہدے مگروں گلین فلپس اٹھویں اوور وچ محمد نواز دی گیند اتے کاٹ اینڈ بائولڈ ہوئے تے ٹیم نیوزی لینڈ بھاری مشکلاں وچ جکڑی جا چکی سی۔ کپتان ولیمسن تے مڈل آرڈر بلے باز ڈیرل مچل نے پارٹنرشپ لائی لیکن پاکستانی بلے بازاں دی شاندار ڈیتھ بائولنگ کارن نیوزی لینڈ صرف 152 سکور ای بنا سکی۔
چیز دے دوران اوپنر زبابر اعظم تے محمد رضوان نے پہلے دس اووراں وچ 87 سکور کر کے میچ مکمل طور تے اپنی گرفت وچ لے لیتا جیویں کہ یک طرفہ مقابلہ بن کے رہ گیا۔ بابراعظم اپنی ففٹی پوری کرن مگروں آئوٹ ہوئے تے رضوان دا ساتھ محمد حارث نے دتا۔ رضوان وی ادھی سنچری مگروں آئوٹ ہوئے تے میچ تقریباً ختم ہو چکیا سی۔ ایس طرحاں پورے پاکستان تے دنیا بھر وچ رہن والے پاکستانیاں دی خوشی دی کوئی انتہا نہیں سی کہ پہلے دونویں میچ ہار کے ٹورنامنٹ توں باہر ہوندی ہوندی ٹیم ورلڈکپ دے فائنل وچ پہنچ چکی اے۔
10نومبر نوں دُوجے سیمی فائنل وچ ایڈیلیڈ اوول دے میدان وچ انگلینڈ تے بھارت دا مقابلہ ہویا۔ ٹاس جت کے انگلینڈ نے پہلے بائولنگ دا فیصلہ کیتا۔ بھارتی اوپنر لوکیشن راہول پاور پلے وچ ای کرس ووکس دا شکار بنے تے ویرات کوہلی تے روہت شرما نے ٹیم نوں سنبھالا دین دی کوشش کیتی لیکن دونویں بلے باز ای سو دے سٹرائیک ریٹ نال کھیلدے رہے تے روہت شرما 28گینداں اتے 27سکور بنا کے پویلین چلے گئے۔ نمبراک ٹی ٹونٹی بلے باز سوریا کمار یادیو وی چھیتی آئوٹ ہو گئے جہدے مگروں ویرات کوہلی تے ہاردک پانڈیا دی ففٹی پلس پارٹنر شپ لگی۔ کوہلی اپنی نصف سنچری مکمل کرن مگروں پویلین لوٹ گئے تے ہاردک پانڈیا نے شاندار اختتام کردے ہوئے ٹیم دا سکور 168 تک پہنچا دتا۔ ورلڈکپ سیمی فائنل دی ہائی پریشر گیم وچ ایہہ ہدف حاصل کرنا کسے وی ٹیم لئی اک اوکھا کم ہوندا لیکن انگلش کپتان جاس بٹلر تے ایلکس ہیلز نے شاندار اننگز کھیڈدے ہوئے کوئی وکٹ گوائے بغیر ایہہ ہدف 16ویں اوور دے اختتام تے حاصل کر لیتا۔ یعنی اک تے دس وِکٹاں نال شکست تے فیر 24گینداں پہلے ای ہدف دے حصول نے بھارت وچ صف ماتم وچھا دتی۔ بھارتی شائقین نے تے پچھلے کرکٹراں نے ایس ہار نوں شرمناک قرار دتا۔ پچھلے سپنر ہربجھن سنگھ دا کہنا سی کہ ہار جت گیم دا حصہ اے لیکن ایس طرحاں ہارنا بہت سارے سوال چھڈ گیا اے۔ دُوجے پاسے سچن ٹنڈولکر نے ٹویٹ وچ لکھیا کہ جے اسیں ٹیم دی جت اتے خوشی منانے آں تے اوہناں دی ہار اتے سانوں اپنی ٹیم دے نال کھلونا چاہیدا اے۔ ایس طرحاں رلے ملے احساسات دے نال ٹیم انڈیا دا ورلڈکپ وچ سفر ختم ہویا۔
ہن انگلینڈ تے پاکستان ٹیم اتوار نوں میلبرن کرکٹ گرائونڈ وچ اک لکھ شائقین دی موجودگی وچ آمنے سامنے ہون گے۔ پاکستانی شائقین ایس ورلڈکپ دی 1992دے ورلڈکپ نال کڑیاں جوڑن وچ مصروف نیں۔اعدادوشمار ویکھے جان تے ایس ورلڈکپ دا سفر 92دے ورلڈکپ نال بھرویں مشابہت رکھدا اے۔ 92وچ وی پاکستان اپنا پہلا میچ ہاریا’ گروپ سٹیج وچ ای انڈیا کولوں وی اپنا میچ ہاریا جہدے مگروں ٹیم دے اَگے جان دے رستے مشکل نظر آرہے سن۔ اوہدے مگروں گروپ سٹیج دے آخری تنے میچ جتن مگروں سیمی فائنل وچ جگہ بنائی تے سیمی فائنل وچ نیوزی لینڈ نوں ہرا کے فائنل وچ پہنچے تے فائنل وچ انگلینڈ دی ٹیم نال سامنا ہویا۔ یعنی ہن تک ایس ورلڈکپ وچ اوہو پیٹرن کاپی ہو رہیا اے۔ ہن ویکھنا ایہہ ہے کہ کیہ فائنل وچ وی اوسے طرح شاندار پرفارمنس وکھاندے ہوئے کپ اپنے نام کردے نیں یا ایس واری اِن فارم ٹیم انگلینڈ اپنا بدلہ لیندی اے۔
اتوار نوں پوری دنیائے کرکٹ دی نظراں ایس وڈے معرکے اتے ہون گئیاں جتھے بابراعظم تے محمد رضوان دی ورلڈکلاس اوپننگ جوڑی دے مقابلے وچ جارحانہ بلے بازی کرن والے الیکس ہیلز تے جاس بٹلر ہون گے۔ بائولنگ وچ شاہین شاہ آفریدی دی قیادت وچ حارث رئوف’ نسیم شاہ تے محمد وسیم دی شکل وچ بہترین فاسٹ بائولر پاکستان ولوں میدان وچ اترن گے جد کہ انگلینڈ ولوں مارک ووڈ (جے انجری توں ریکور کر گئے) دی قیادت وچ ووکس’ کیورین تے بین سٹوکس جئے بائولر اپنی ٹیم نوں جتوان لئی پرعزم ہون گے۔ سپنرز وچ شاداب خان تے انگلینڈ ولوں عادل رشید دا کردار وی بہت اہم ہوئے گا۔
پاکستانی پوری قوم اپنی ٹیم لئی دعاواں کر رہی اے کہ سیاسی کشمکش دی ایس صورتحال وچ ورلڈکپ جتن دی خوشی تازہ ہوا دا جھونکا ثابت ہووے گی۔ بائولنگ لائن اَپ ایسے طرحاں چنگی کارکردگی وکھاوے تے بیٹنگ وچ اوپنرز محمد رضوان تے بابرا عظم دا کردار اہمیت دا حامل ہووے گا۔فائنل میچ توں پہلاں بابراعظم تے محمد رضوان دی فارم واپس آنا وی پاکستانی ٹیم لئی خوش آئند اے۔ پلئینگ الیون دے سارے کھیڈاریاں نے کسے نا کسے طرحاں ٹیم دے ایتھوں تک پہنچن وچ اہم کردار ادا کیتا اے۔ صرف سٹارآل رائونڈر محمد نواز ایس ورلڈکپ وچ کوئی شاندار پرفارمنس نہیں دے سکے بلکہ پہلے دونویں ہارن والے میچاں وچ اوہ اِک طرحاں ٹیم لئی وِلن بن کے سامنے آئے سن۔ ہن شاید اوہناں دے کول موقع اے فائنل وچ چنگی کارکردگی نال دوبارہ ہیرو بنن گے۔ ایہو امید کیتی جا رہی اے کہ پاکستان ٹیم دُوجی واری ٹی ٹونٹی ورلڈکپ جتن وچ کامیاب ہو جاوے گی تے اتوار والے دن ملک بھر وچ جشن ہووے گا۔