وزیراعظم دا شاندار دورہ چین

پاک چین دوستی’ ہمالیہ توں اچی’ سمندراں توں ڈونگھی تے شہد توں مٹھی اے۔ اوہدے زندہ مناظر وزیراعظم پاکستان دے حالیہ دورہ چین دے دوران ویکھن وچ آئے۔ وزیراعظم شہباز شریف نے بیجنگ دے عظیم عوامی ہال وچ چین دے صدر شی جن پنگ نال ملاقات کیتی جہدے وچ ایم ایل ون نوں شروع کرن لئی مشترکہ کوششاں اتے اتفاق کیتا گیا جد کہ چینی صدر نے پاکستان لئی 50کروڑ یوان دی اضافی امداد دا اعلان کیتا۔ ملاقات وچ بھارت دے غیر قنونی زیر تسلط جموں وکشمیر دی صورتحال تے سی پیک دی افغانستان تک توسیع اتے وی تبادلہ خیال کیتا گیا۔ وزیراعظم نے چینی کمیونسٹ پارٹی دی 20ویں مرکزی کمیٹی دا دوبارہ جنرل سیکرٹری منتخب ہون تے صدر شی جن پنگ نوں مبارکباد دتی۔ اوہناں نے ملک وچ ہولناک سیلاب نال ہون والی تباہی دے تناظر وچ پاکستان دی امداد’ بحالی تے تعمیر نو دی کوششاں وچ چین دی گراں قدر مدد اتے وی اوہناں دا شکریہ ادا کیتا۔ دونویں رہنماواں نے پاک چین دو طرفہ تعلقات وچ پیش رفت دا جائزہ لیتا تے باہمی دلچسپی دے علاقائی تے عالمی امور اتے تبادلہ خیال کیتا۔ اوہناں نے دونویں وچ سٹریٹجک کوآپریٹوپارٹنرشپ لئی اپنی وابستگی دا اعادہ کتیا جو ہر آزمائش وچ پورا اتری اے۔
وزیراعظم شہباز شریف نے ایس گل دا بھرواں اعادہ کیتا کہ پاک چین دوستی پاکستان وچ سیاسی سطح اتے مکمل اتفاق رائے رکھدی اے تے ایہہ بین الریاستی تعلقات دا اک نمونہ اے۔ وزیراعظم نے چین دی خوشحالی لئی صدر شی جنگ پنگ دی قیادت تے دو طرفہ تعلقات نوں مضبوط بنان لئی اوہناں دے وژن نوں خراج تحسین پیش کردے ہوئے کہیا کہ پاکستان نوں چین دی سماجی تے اقتصادی ترقی تے ملک دی ترقی تے خوشحالی دے قومی عزم نال تحریک ملی اے۔ دونویں رہنماواں نے دفاع’ تجارت تے سرمایہ کاری’ زراعت’ صحت’ تعلیم’ گرین انرجی’ سائنس تے ٹیکنالوجی تے آفات نال نمٹن لئی تیاری سنے متعدد امور وچ تعاون اتے تبادلہ خیال کیتا۔ اوہناں نے کہیا کہ سی پیک دی اعلیٰ معیاری ترقی پاکستان تے چین وچ دو طرفہ تعلقات نوں ہور مضبوط کرے گی۔ دونویں رہنماواں نے اتفاق کیتا کہ سٹریٹجک اہمیت دے منصوبے دے طور تے دونویں فریق سی پیک دے فریم ورک دے تحت ایم ایل ون نوں ابتدائی ہارویسٹ منصوبے دے طور تے شروع کرن لئی مشترکہ کوششاں کرن گے۔ اوہناں نے کراچی وچ ماس ٹرانزٹ منصوبے دی لوڑ نوں وی اجاگر کیتا تے کراچی سرکلر ریلوے دے چھیتی آغاز لئی ساری رسمی کارروائیاں نوں حتمی شکل دین اتے اتفاق کیتا۔
صدر شی جنگ پنگ نے پاکستان وچ سیلاب مگروں امداد تے بحالی دی کوششاں لئی 500ملین یوان دے اضافی امدادی پیکج دا وی اعلان کیتا۔دونویں رہنماواں نے بین الاقوامی ماحول وچ تیزی نال تبدیلی بارے تبادلہ خیال کیتا جہنے ترقی پذیر ملکاں لئی اقتصادی چیلنجاں نوں ودھا دتا اے۔ اوہناں نے ایس گل اتے اتفاق کیتا کہ موسمیاتی تبدیلی’ صحت’ وبائی امراض تے ودھدی ہوئی عدم مساوات جئے عصری چیلنجاں لئی اقوام متحدہ دے چارٹر دے مقصد تے اصولاں دے مطابق ریاستاں وچ تعاون دی لوڑ اے۔ وزیراعظم شہباز شریف تے صدر شی جنگ پنگ نے بھارت دے غیر قنونی زیر تسلط جموں و کشمیر تے افغانستان دی صورتحال سنے خطے توں متعلق اہم امور اتے وی تبادلہ خیال کیتا۔ دونویں رہنماواں نے اتفاق کیتا کہ اک پرامن تے مستحکم افغانستان علاقائی سلامتی تے اقتصادی ترقی نوں فروغ دیوے گا۔ اوہناں نے ایس گل اتے وی اتفاق کیتا کہ سی پیک دی افغانستان تک توسیع نال علاقائی رابطیاں دے اقدامات نوں تقویت ملے گی۔ وزیراعظم نے صدر شی جنگ پنگ نوں چھیتی توں چھیتی پاکستان دا دورہ کرن دی پرتپاک دعوت وی دتی جہنوں اوہناں نے قبول کر لیتا۔
وزیراعظم شہباز شریف دی دعوت اتے ممتاز چینی کمپنیاں نے پاکستان وچ مشترکہ منصوبیاں بالخصوص شمسی توانائی تے انفراسٹرکچر دے منصوبیاں وچ سرمایہ کاری وچ گہری دلچسپی دا اظہار کردے ہوئے کراچی وچ پین دے پانی دی فراہمی سنے دوجے وڈے منصوبیاں وچ سرمایہ کاری دا یقین دوایا اے۔ وزیراعظم نے چینی کمپنیاں نوں 10ہزار میگاواٹ شمسی توانائی دے منصوبے اتے رل کے کم کرن دی پیشکش کیتی۔ وزیراعظم نے گوادر ہوائی اڈے اتے کم دی رفتارتیز کرن تے اوہنوں چالوں سال دے اخیر تک مکمل کرن اتے زور دتا ۔ متعلقہ چینی کمپنی نے اگلے سال دی ابتدا وچ گوادر ہوائی اڈے دی تکمیل دی یقینی دہانی کرادتی۔
وزیراعظم نے دسیا کہ 11اپریل 2022نوں اقتدار سنبھالن مگروں اوہناں دی حکومت نے چینی کمپنیاں نوں درپیش مسائل حل کیتے۔ چینی کمپنیاں نوں واجب الادا 160 ارب روپے دی ادائیگی کیتی جا چکی اے۔ 50 ارب روپے پچھلے دناں ادا کیتے گئے نیں تے 50ارب روپے نال ریوالنگ فنڈ بنا دتا گیا اے۔ وزیراعظم نے دسیا کہ وفاقی وزیر خزانہ اسحاق ڈار دی ہدایت اتے سٹیٹ بینک نے ریوالونگ اکائونٹ بنا دتا اے۔ ادائیگیاں دے نال ای ہور 50ارب روپے اوہدے وچ شامل ہوجان گے۔ اوہناں نے چین توں درآمد کیتے گئے کوئلے دی ادائیگیاں وچ ماضی وچ پیش آن والے مسائل اتے افسوس دا اظہار کیتا۔ وزیراعظم نے یقین دوایا کہ دیامر بھاشا ڈیم منصوبے وچ اراضی دے حصول دے مسائل نوں حل کیتا جاوے گا تے ایس منصوبے دی راہ وچ کوئی رکاوٹ نہیں آن دیاں گے۔ وزیراعظم نے چینی شہریاں نوں نشانہ بنائے جان دے واقعات اتے گہرے دکھ دا اظہار کیتا تے دسیا کہ اوہناں واقعات وچ ملوث افراد نوں گرفتار کر لیتا گیا اے تے اوہناں نوں مثالی سزا ملے گی۔
وزیراعظم شہبازشریف نے یقین دوایا کہ حکومت چینی سرمایہ کاراں دے تحفظ لئی بہترین اقدامات کرے گی تے سی پیک دے علاوہ دوجے منصوبیاں اتے کم کرن والے چینی باشندیاں دی حفاظت نوں یقینی بنایا جاوے گا۔ وزیراعظم نے مہمند ڈیم توں متعلق پیش آن والے مسائل حل کرن دی وی یقین دہانی کرائی۔اوہناں نے آکھیا کہ 2کروڑ دی آبادی والے شہر کراچی وچ پانی دی فراہمی بہت وڈا مسئلہ اے۔ وفاقی حکومت سندھ حکومت دے نال رل کے ایس منصوبے نوں اگے وداوے گی۔ وزیراعظم نے پاکستان تے چین دے تعلقات دے فروغ لئی چینی کمپنیاں دے نال رل کے کم کرن دے عزم دا اظہار کیتا تے پاکستان وچ کم کرن لئی دلچسپی اتے چینی کمپنیاں دا شکریہ ادا کیتا۔ وزیراعظم نے کہیا کہ اوہ چھ مہینے وچ تن واری گوادر بندرگاہ دا دورہ کر چکے نیں۔ اوہناں نے ایم ایل ون تے دوجے منصوبیاں وچ دلچسپی تے پاکستان وچ سیلاب متاثرین لئی فراخ دلانہ امداد اتے وی چینی حکومت تے کمپنیاں دا شکریہ ادا کیتا۔
ایس توں پہلاں شہباز شریف وزیراعلیٰ پنجاب دے طور تے چین دے تعاون نال بیسیاں منصوبے مکمل کر چکے نیں جہناں دی وجہ نال پاکستان وچ بجلی دا بحران ختم ہویا۔ اوہناں مگروں آن والی حکومتاں نے چین توں دوری اختیار کیتی تے سی پیک نوں سردخانے وچ پا دتا تے سی پیک اتھارٹی دے چیئرمین جنرل عاصم باجوہ نوں فارغ کردتا گیا۔ بہرحال توقع رکھنی چاہیدی اے کہ وزیراعظم شہباز شریف دے حالیہ دورہ چین توں مسدود راہواں فیر کھلیاں ہو جان گئیاں۔