ڈائیلاگ دا کوئی راہ تے ہووے گا؟

عمران خان تے ہون والے حملے مگروں حالات بڑی تیزی نال وگاڑ ول جا رہے نیں۔ ملک وچ لگی اگ نوں بجھان دی ضرورت اے پر لگدا اے کہ ایس اگ تے ذمہ دار لوک وی تیل چھڑک رہے نیں۔ عمران خان تے حملہ اوہناں دے لانگ مارچ دوران ہویا۔ لانگ مارچ اوہناں نے اپنے صحت یاب ہون تک روکیا جہڑا فیر شروع ہو گیا جتھے حادثہ ہویا سی تے ایہ مارچ اوتھوں شروع ہو چکیا اے اوہ ایہدا حصہ کجھ دن بعد بنن گے۔ اوہناں نے جہڑے لوکاں نوں ایس سازش وچ ملوث قرار دتا اے اوہناں دے استعفے دا مطالبہ کیتا اے۔ اوہناں وچ وزیراعظم میاں شہبازشریف تے وزیرداخلہ رانا ثناء اللہ دا ناں وی شامل اے۔ بادی النظر وچ حکومت ایہ مطالبہ نہیں منے گی ایس لئی حالات ہور وگڑن گے۔
حکومت ولوں ایس حملے نوں مذہبی جنونیت نال جوڑ دتا گیا اے۔ وزیرداخلہ اصرار کر رہے نیں کہ حملہ آور اک ای سی۔ ملزم دا ایہ وی کہنا اے کہ اوہنے ست اٹھ گولیاں چلائیاں جد کہ بقول عمران خان 11 لوک گولیاں دی زد وچ آئے۔ ایہناں وچوں چار عمران نوں لگیاں۔ ایہدے توں ظاہر ہوندا اے کہ حملہ آور زیادہ سن تے فیر جو حملہ پھڑیا گیا تے اوہ اعتراف وی کر رہیا اے۔ اوہ سڑک تے سی جد کہ عمران خان دی پنڈلی تے وی گولی لگی اے۔ کنٹینر دے برابر اک رُکھ نال پوڑھیاں لگیاں سن دوجا حملہ آور اوہدے تے بیٹھا سی یاں کدھروں ہور توں اوہنے فائرنگ کیتی۔ عمران خان نوں قتل کرن دی پوری منصوبہ بندی نظر آندی اے۔ ایہ بینظیر بھٹو دے حملے نال ملدا جلدا حملہ اے۔ اک پاسے اوہناں تے پستول نال حملہ کیتا گیا’ دوجے پاسے دھماکہ وی ہویا۔ اوہناں دیہاڑیاں ایہ خبراں وی چلیاں سن کہ سامنے دی عمارت توں وی فائرنگ ہوئی سی۔
دوستو! اک لمحے لئی ایہ من لیا جاوے کہ ایہ حملہ اک جنونی بندے نے کیتا ایہ کوئی سازش نہیں تے وی سوال پیدا ہوندا اے کہ ملزم توں ہون والی تفتیش دوران جو ویڈیو ریکارڈ کیتی گئی اوہ میڈیا تک کیویں اپڑی۔ اک نہیں دو ویڈیو وائرل ہوئیاں۔ پہلی ویڈیو دے بعد وزیراعلیٰ پرویزالٰہی نے ایس ایچ او تے دوجے عملے نوں معطل کرکے اوہناں دے موبائل فون قبضے وچ لین دا حکم دتا۔ معطلی فوری ہو گئی ایہدے بعد انکوائری ہووے گی جہدے وچ سزا وی ہو سکدی اے۔ دوجی ویڈیو وزیراعلیٰ دے سخت ایکشن دے بعد وائرل کیتی گئی۔ جہدے وچ اوس ملزم دے مذہبی جنونی ہون دے قیاس نوں تقویت ملدی اے تے دوجا ایہ وی ثابت کرن دی کوشش کیتی گئی کہ اوہ اکلا ای حملہ آور سی۔ اوہدی فائرنگ دے بعد جو فائرنگ ہوئی اوہ اوہدے بقول کنٹینر توں اوہدے تے ہوئی سی تے اوہ گولی دے سامنے اک پاسے ہو گیا سی۔ رانا ثناء اللہ نے وی ایہ سوال کیتا کہ ویڈیو میڈیا تک کیویں اپڑیاں؟ مریم اورنگزیب ولوں عمران خان نوں جھوٹھا قرار دیندے ہوئے کہیا گیا کہ اوہ فائرنگ دی تفتیش سکاٹ لینڈ یارڈ توں کرا لین۔ ایہ بڑی چنگی تجویز اے۔ سکاٹ لینڈ یارڈ توں تفتیش ہوندی اے تے حقائق زیادہ شفافیت نال سامنے آن گے۔ پاکستان وچ اک ہور کیس وی حالات تے وقت دی دھوڑ تھلے دب رہیا اے اوہ ارشد دے قتل دا کیس اے۔ اوہدی وی مریم اورنگزیب اقوام متحدہ توں نہیں تے سکاٹ لینڈ یارڈ توں ضرور تحقیقات کران۔ وزیراعظم شہبازشریف نے عمران خان تے حملے دی جوڈیشنل کمیشن توں تحقیقات کران دا اعلان کیتا جہدا عمران خان نے سواگت کیتا اے۔
عمران خان ہائی پروفائل شخصیت نیں۔ اوہناں دیاں گلاں نوں بے وزن قرار دتا جا سکدا اے نہ رد کیتا جا سکدا اے۔ حالات نوں ہوشمندی نال کنٹرول کرن دی ضرورت اے۔ ایس حوالے نال اداریاں نوں کردار ادا کرنا چاہیدا اے۔ ملک پہلے ای عدم استحکام وچ پھسیا اے عمران تے حملے دے معاملے نوں سنجیدگی نال نہ لیا گیا تے سیاسی عدم استحکام ہور پستی وچ جا سکدا اے جہدے بھیانک نتیجے نکلن گے پاکستان ایہدا متحمل نہیں ہو سکدا۔ عمران خان تے قاتلانہ حملہ نکام ہویا پر ایس توں کجھ ہفتے پہلاں تے بعد دی صورتحال ایہہ وے کہ لوک اینے بھوتر گئے نیں کہ اوہ عمران خان توں علاوہ کسے ہور دی گل سنن نوں تیار نہیں۔ جد کہ ملک دے اندر قومی سلامتی دی صورتحال بڑی کشیدہ اے۔ سینیٹر اعظم سواتی’ سینیٹر سیف اللہ سنے کجھ رہنماواں نوں اوہناں دے گھراں چوں چک کے اوہناں دی تذلیل کیتی گئی۔
دوستو! جرمن دے مشہور لیڈر ایڈوولف ہٹلر توں جدوں کسے نے پچھیا کہ ملک تے قوماں کیویں تباہ ہوندیاں نیں تے اوہنے جواب دتا سی کہ جدوں تسیں کسے ملک دی سلامتی نوں تباہ کرناچاہو تے اوہدی فوج دے خلاف لوکاں وچ نفرت پھیلا دیو تے اوہ ملک تباہ ہو جاوے گا۔ میری ہتھ جوڑ کے گزارش اے کہ ملک دی سلامتی لئی ادارے’ حکومت تے عمران خان سنے سارے سیاستدان رَل کے بیٹھن تے کوئی حل کڈھن۔٭