آرمی چیف دی تعیناتی لئی ن لیگ دا کوئی فیورٹ نام نہیں:خواجہ آصف

اسلام آباد( پنجابی میڈیا گروپ) وزیر دفاع خواجہ محمد آصف نے آکھیا اے کہ18یا19نومبر توں بعد ہی آرمی چیف دی تعیناتی دے حوالے نال مشاورت ہوئے گی، سپہ سالار دی تعیناتی لئی مسلم لیگ ن دا کوئی فیورٹ نام نہیں اے۔پارلیمنٹ ہائوس دے باہر میڈیا نال گل بات کر دیاں خواجہ آصف توں سوال کیتا گیا کہ کیا سابق صدر آصف علی زرداری تے شہباز شریف دے وچکار آرمی چیف دے نام اُتے ڈیڈ لاک اے؟جس دا جواب دیندیاں ہویاں وزیر دفاع آکھیا کہ اجے آرمی چیف دے نام دے حوالے نال مشاورت ہی نہیں ہوئی تے ڈیڈ لاک کِنج ہوئیگا،18یا19نومبر توں بعد ہی آرمی چیف دی تعیناتی دے حوالے نال مشاورت ہوئے گی، جیہڑا نام فوج گلے گی اوسی اُتے ہی مشاورت ہوئے گی۔اوہناں نے ہور آکھیا کہ اجے تک فوج نے آرمی چیف دی تعیناتی لئی نام نہیں گھلیا، عمران خان دے حالیہ بیان اُتے قنونی کارروائی ہونی چاہیدی اے،عمران خان ذاتی مفاد لئی قومی مفاد نال کھیڈ رہے نیں۔وزیر دفاع دا کہنا سی کہ عمران خان الزام لا کے ساڈے بین الاقوامی تعلقات نوں خراب کر رہے نیں، پی ٹی آئی چیئرمین دا اپنے ذاتی مفاد لئی ملکی سالمیت تے وقار نال کھیڈناجرم اے۔