آؤ توشہ خانہ لُٹیے

غلام شبیر عاصم

آئین تے قانون دِیاں کتاباں ایہ دسدیاں نیں کہ کِسے وی ملک اندر بنایا جان والا قانون ملک تے عوام دے فیدے لئی تے کِسے وی نقصان توں بچان لئی بنایا جاندا اے۔ ریاست دا سرمایہ قوم دی سانجھی جہئی ملکیت ہندی اے تے ملک دے اداریاں وچ بیٹھے ہوئے سرکاری لوک کِسے نہ کِسے طرحاں ریاست تے قوم دی ملکیتی شیواں تے حقاں دی حفاظت کرن لئی ہندے نیں تے عوام دے ووٹاں نال جِت کے اسمبلیاں وچ آن کے وزیر،مشیر بنن والینمائندے وی لوکاں،تے اوہناں دے مال دی حفاظت لئی ایہناں سرکاری ریاستی اداریاں نوں قانونی طور تے ویکھن جاچن تے نگرانی کرن لئی ہندے نیں،تے لوڑ موجب عوام دی رکھیا تے فیدے لئی قانون وی بناوندے نیں۔ خاص کر پاکستان اندر تے ایہ سب گلاں لِکھن پڑھن تے زبانی کرن دی حد تک ای نیں۔حقیقت وچ عوام سیاستداناں دی مار دھاڑ تے ظلم دا ای شکار رہندے نیں۔ عوام نوں تے ایہ حکمران تے سیاسی لوک بھیڈاں بکریاں تے کِیڑے مکوڑے خیال کردے نیں۔ جِنہاں نوں جدوں مرضی پیراں ہیٹھ مِدھیا مدھولیا جاندا اے۔سیاسی نمائندے حکومت وچ آن کے اپنی اپنی سیاسی دشمنی ہنڈاوندے تے مال بناوندے نیں۔ عوام دے مسئلیاں ول تے اکا دھیان نہیں دیندے۔اپنے اپنے مسئلیاں وچ پھسے اِک دوجے اتے چِکڑ سٹدے رہندے نیں تے نِت نویں مسئلیاں تے کرپشن کیساں وچ ذلیل ہندے رہندے نیں۔ اج کل سیاسی محاذ اتیجس توشہ خانہ دا ہرپاسے رولا پیا ہویا اے، اوہدے وِچوں سیاسی لوکاں ناجائز طریقے تے چلاکی نال ویچیا یا گھر کھڑیا ہویا جیہڑا سمان اے اوہ کسے حوالیوں سارا ریاست دی امانت اے۔ تے ایس امانت وچ حکمراناں ہمیشہ ہِمتوں ودھ مونہہ کھول کے تے اکھاں بند کرکے ایس نوں مِٹھے چولاں وانگ کھادا اے تے اپنا اپنا ڈِھڈ بھریا اے۔ سیاستداناں دی ایسے ای ازلی تے حیوانی جہئی بھکھ نے ملک تے قوم نوں ہتھل تے کنگال کرکے رکھ دِتا اے۔ ایتھے مینوں اپنی غزل دا اک شعر یاد آگیا اے۔
آپ تے اوہنے گھر دے اپنے سارے بھانڈے بھر لئے نیں
تھوڑا تھوڑا کرکے اوہ مینوں کر کنگال گیا
پاکستان مملکت دا صدر، وزیراعظم، وزرا، چیئرمین سینٹ، سپیکر اسمبلی، صوبائی وزرائے اعلیٰ، ججز تے سرکاری افسراں نوں دوجے دوست ملکاں دے سرکاری دورے ویلے مِلن والے تحفیاں نوں توشہ خانہ دے ضابطہ کار 2018 دے تحت کابینہ ڈویژن دے نوٹس وچ لیاونا تے توشہ خانہ وچ جمع کروانا ضروری ہندا اے۔ تحفے دی مقررہ قیمت دا 50 فیصد سرکاری خذانے وچ جمع کروا کے تحفہ خریدیا وی جاسکدا اے۔ ادھی قیمت دے کے تحفہ خریدن دا قانون دسمبر 2018 وچ عمران خان نے بنایا سی۔ توشہ خانہ دی تاریخ سرکاری تے حکومتی لوکاں دی لٹ کھسٹ تے بے ایمانی نال بھری ہوئی اے۔جِناں وی ہوسکیا توشہ خانہ نوں بے ایمانی نال لٹیا گیا اے۔ جسراں کہ 1997 وچ ترکمانستان حکومت ولوں اوس ویلے دے وزیراعظم نواز شریف نوں اِک بہت قیمتی قالین مِلیا تے میاں صاحب صرف 50 روپے دے کے قالین گھر لے گئے۔ 1999 وچ سعودی عرب توں مِلن والی 45 لکھ دی مرسڈیز صرف 6 لکھ وچ نوازشریف صاحب لے گئے۔ سعودی عرب توں تحفہ مِلن والی رائفل جیہڑی 1 لکھ توں ودھ مہنگی سی میاں نواز شریف 14 ہزار روپے جمع کروا کے لے گئے۔ ابو ظہبی دے حکمران ولوں نوازشریف،بیگم کلثوم تے مریم نواز نوں 3 گھڑیاں مِلیاں ایہ وی اونے پونے وچ ”چوراں دے کپڑے تے ڈانگاں دے گز” والے حساب وچ لے گئے۔ ایسے طرحاں ای یوسف رضا گیلانی، آصف علی زرداری تے جنرل (ر) پرویز مشرف نے وی توشہ خانہ نوں رج رج کے لٹیا۔ عمران خان نے توشہ خانہ توں خریدی ہوئی گھڑی کِدھرے ہور تھاں کِسے نوں ویچ کے اوہدی قیمت 5 کروڑ روپئے جیہڑی حاصل ہوئی اوہ رقم اپنے اثاثیاں وچ ظاہر کیتی۔ کیوں جے گھڑی ویچ دتی گئی ہوئی سی۔ جدوں گھڑی ویچ ای دتی۔ جدوں گھڑی ملکیت ای نہ رہئی تے اوہ اثاثیاں وچ گھڑی کیوں تے کِسراں ظاہر کردے۔ الیکشن کمیشن کہندا اے کہ جیہڑی گھڑی ویچ دتی تے تہاڈی ملکیت ای نہیں سی اوس گھڑی نوں (Show) کیوں نہیں کیتا۔ جدوں کہ عمران خان اوہدے حصے دے پیسے ظاہر کر چکے سن۔ پر عمران خان نوں آئین دے آرٹیکل 63P 1 ہیٹھ نااہل قرار دے دتا گیا۔ میں ایتھے ایہ سوچناں کہ ”توشہ خانہ” نوں لٹ کے کھان والے حکمرانوں تے سیاستدانوں غریب عوام نوں تہاڈے کولوں مِلے ہوئے دکھ، ظلم جبر، دھوکھے تے بھکھ ورگے شاہی تحفیاں نال اوہناں دے ”اندر” دا توشہ خانہ وی تحفیاں نال بھریا ہویا اے،آو کدی ایس توشہ خانہ نوں وی سنھ لائو، کدی ایہناں دکھاں تے دھوکھیاں نوں وی لٹو تے اپنے اپنے گھراں نوں لے جائو۔ جِسراں حضرت بلھے شاہ رب دا گھر لٹن تے بھنن دا راہ دیندے نیں۔ایسراں ایس ادم تے حِرص ہوس نال تسیں وی غریب عوام دا توشہ خانہ لٹو۔ جسراں بلھے شاہ رب دیاں رحمتاں تے عطاواں لٹنا چاہ رہے نیں تسیں وی غریباں دِیاں سِیساں تے دعاواں لٹو تے ایتھے اوتھے موجاں مارو۔
پی شراب تے کھا کباب ہیٹھ بال ہڈاں دی اگ
بلھیا بھن گھر رب دا ایس ٹھگاں دے ٹھگ نوں ٹھگ
حکمرانو تسی غریباں دا بھلا کیوں نہیں سوچدے۔ تسیں بھلا کِیہ کرنا تے کِیہ سوچنا اے سگوں عوام دا مال لٹ لٹ کے اوہناں نوں دکھی کردے او۔آئو عوام دے توشہ خانہ نوں لٹو تے ایہناں نوں دکھاں توں ”ہتھل” کردیو۔ توشہ خانہ دے قیمتی مال تے تحفیاں دی طرحاں غریب عوام دے دکھاں دے ”توشہ خانہ” وچوں سارے دکھ لٹ کے لے جائو۔ تے عوام نوں سکھی کرکے تاریخ وچ اپنا ناں سونے دے قلم نال لِکھوا جائو۔ رب دا گھر بھنن وانگ اوس ذات نوں ٹھگن وانگ آئو غریباں دا توشہ خانہ وی بھنو تے اپنی دنیا تے آخرت نوں سکھلی کر لو۔ حکمرانو تے سیاستدانو، اپنا آپ پچھانوں، بندے بن جائو،چنگے بن جائو،آئو غریباں دا دکھاں نال،ہنجوواں تے ہوکیاں نال بھریا ہویا توشہ خانہ لٹیئے، کِدھر دیر نہ ہوجائے، جیون ہنیر نہ ہوجائے۔ آئو رب نوں لٹئے، رب دا گھر بھنئیے،آئو غریباں دا توشہ خانہ لٹئیے۔٭