کیلیفورنیا پنجاب معاہدا تے کرکٹ وچ ہار

کرکٹ ورلڈ کپ وچ شکست اتے دکھی ہون توں پہلے ساڈے لئی اک خشی دی خبر وی اے۔ پہلے اوہنوں پڑھ لوو بعد وچ کرکٹ اتے گل کراں گا۔ کیلیفورنیا دی قانون ساز اسمبلی دی کمیٹی دے آگو کرس آر ہولڈن نے پنجاب تے کیلیفورنیا وچکار سسٹر سٹیٹ ریلیشن شپ معاہدے اتے دستخط لئی وزیراعلا پنجاب چودھری پرویز الہی نوں کیلیفورنیا دے دورے دی دعوت دِتی اے۔ ایس معاہدے نال پنجاب تے کیلیفورنیا وچکار تجارتی معاشی تے کاروباری تعلقات وچ وادھا ہووے گا۔ پنجاب تے امریکی ریاست کیلیفورنیا وچکار دو پاسی سرمایا کاری ودھن دے نال نال تعلیم صحت انفارمیشن ٹیکنالوجی ماحولیات تے ثقافت دے شعبیاں وچ وی تعلقات نوں فروغ ملے گا۔ کیلیفورنیا دی قانون ساز اسمبلی ایس معاہدے دی قرار داد منظور کر چکی اے تے ہن چھیتی ای چودھری پرویز الہی اوتھے جا کے ایس معاہدے اتے دستخط کرن گے۔ ہن آندے آں اپنی ہار ول کہ ہمیشا دی طرحاں ساڈی ٹیم نے اک وار فیر قوم نوں مایوس کیتا۔
انگلینڈ پاکستان نوں 5 وِکٹاں نال شکست دے کے دوجی وار ٹی ٹوینٹی کرکٹ دا عالمی چیمپئن بن گیا۔ انگلینڈ نے 2010 وچ وی ٹورنامنٹ جِتیا سی۔ پاکستانی ٹیم نے گھٹ سکور دے باوجود چنگی بالنگ کیتی۔ انگلینڈ نے سارے شعبیاں وچ چنگی کھیڈ دا مظاہرا کردیاں ہویاں ورلڈ کپ جِتیا۔ پاکستان نوں ٹی ٹوینٹی ورلڈ کپ دے فاینل وچ دوجی وار شکست دا مونہ ویکھنا پیا۔ ٹی ٹوینٹی ورلڈ کپ دے فاینل میچ وچ انگلینڈ نے 138 دا مطلوبا ہدف اک اوور پہلے 5 وکٹاں دے نقصان اتے حاصل کر لیا۔ پاکستان ولوں شان مسعود 38 کپتان بابر اعظم 32 تے شاداب خان 20 رنز بنا کے نمایاں رہے۔ سیم کرن نے 3 عادل رشید تے کرس جورڈن نے 2 2 کھڈاریاں نوں پویلین دی راہ وکھائی۔ انگلینڈ ولوں بین سٹروک دے ناشکست جوگ 52 رنز کپتان جوز بٹلر 26 تے ہیری بروک 20 رنز بنا کے نمایاں رہے۔ پاکستان ولوں حارث رف 2 شاہین شاداب خان تے محمد وسیم جونیئر اک اک وِکٹ حاصل کر سکے۔ 12 رنز دے بدلے 3 وِکٹاں لین اتے سیم کرن مین آف دی میچ تے 6 میچاں وچ 13 وِکٹاں لین اتے مین آف دی ٹورنامنٹ قرار پائے۔ شاہین آفریدی دے زخمی ہون دا ٹیم نوں نقصان ہویا۔ بالراں نے چھوٹے ٹوٹل دے باوجود زبردست فایٹ کیتی۔ میچ دے اختتام اتے میلبورن کرکٹ گرانڈ وچ زبردست آتشبازی دا مظاہرا وی کیتا گیا۔ پاکستان نوں ہدف دے دفاع وچ پہلی کامیابی چھیتی مل گئی سی۔
جدوں سیمی فاینل وچ بھارتی بالنگ دے پرخچے اڈان والے ایلکس ہیلز نوں شاہین شاہ آفریدی نے اپنے پہلے ای اوور دی آخری گیند اتے بولڈ کر دِتا۔ 32 دے مجموعے اتے فل سالٹ نوں حارث رئوف نے پویلین گھل دِتا۔ ایس موقعے اتے کپتان جوز بٹلر نے جارحانا بلے بازی کردیاں ہویاں اک چھکا تے دو چوکے لائے پر اوہناں نوں ہور خطرناک بنن توں پہلے حارث رف نے وِکٹاں دے پچھے رضوان دے ہتھیں کیچ کرا کے اوہناں نوں وی واپسی دا پروانا پھڑا دِتا۔ پاکستان نوں چوتھی کامیابی ہیری بروک دی وِکٹ دی صورت وچ ملی جہنوں شاداب خان دی گیند اتے شاہین شاہ نے کیچ آٹ کیتا۔ ایس موقعے اتے میچ وچ سنسنی پیدا ہو گئی سی پر شاہین شاہ ہیری بروک دا کیچ لین دوران زخمی ہون پاروں اپنے کوٹے دا اوور مکمل نہ کرا سکے تے کوٹے دے تیجے اوور دی پہلی گیند کران دے بعد گرانڈ چوں واپس چلے گئے جہڑا میچ دا ٹرننگ پواینٹ ثابت ہویا۔ شاہین شاہ دا ادھورا اوور مکمل کران لئی پارٹ ٹایم بالر افتخار احمد آئے تے 5 گینداں اتے 13 رنز دے دِتے۔ بعد وچ محمد وسیم جونیئر آئے تے انگلش بلے بازاں نے 3 چوکیاں نال ایس اوور وچ 18 رنز وٹور کے ہدف تک رسائی نوں ہور اسان بنا دِتا۔ 19 ویں اوور وچ محمد وسیم نے معین علی نوں بولڈ کر دِتا پر اوس وقت تک بازی ہتھوں نکل چکی سی تے انگلینڈ نوں میچ جِتن لئی صرف 6 رنز چاہیدے سن۔ انگلینڈ ولوں بین سٹوکس نے ناشکست جوگ 52 رنز دی شاندار اننگ کھیڈ کے اپنی ٹیم دی جِت وچ اہم کردار ادا کیتا۔ کپتان جوز بٹلر نے 17 گینداں اتے 26 رنز بنائے۔ پاکستان ولوں محمد حارث نے 23 رنز دے بدلے 2 وِکٹاں حاصل کیتیاں۔ شاداب خان محمد وسیم شاہین آفریدی نے اک اک کھڈاری آٹ کیتا۔ ایس ٹورنامنٹ دے آخری میچ تے فاینل میچ نوں انگلینڈ نے ٹاس جِت کے پہلے فیلڈنگ دا فیصلا کیتا سی جہدے اتے پاکستان نے پہلے بیٹنگ کردیاں ہویاں مقررا 20 اووراں وچ 8 وِکٹاں دے نقصان اتے 137 رنز بنائے۔ پاکستان ولوں کوئی وی بلے باز ادھی سنچری نہ بنا سکیا تے نہ ای وڈی پارٹنر شپ قایم ہوئی۔ شان مسعود 38 رنز بنا کے ٹاپ سکور رہے۔ کپتان بابر اعظم 32 تے شاداب خان 20 رنز بنا کے نمایاں بلے باز رہے۔ انگلینڈ ولوں سیم کرن سبھ توں کامیاب بالر رہے جہناں نے صرف 12 رنز دے کے 3 وِکٹاں حاصل کیتیاں جہدے و چ شان مسعود تے محمد رضوان دِیاں قیمتی وِکٹاں وی شامل سن۔ عادل رشید نے 22 تے کرس جورڈن نے 27 رنز دے کے 22 وِکٹاں حاصل کیتیاں۔ ووکس نے 32 رنز دے کے اک کھڈاری نوں آٹ کیتا۔ فاینل میچ لئی دوہواں ٹیماں نے کوئی تبدیلی نہیں کیتی سی تے اپنے سیمی فاینلز دے فاتح سکواڈز نوں برقرار رکھیا سی۔ اختتامی تقریب دوران سیم کرن دا کہنا سی کہ ایہ ٹورنامنٹ ساڈے لئی بہت چنگا رہیا پر وِکٹ بہت مشکل سی۔
ایس میچ دے اغاز تے اختتام اتے سوشل میڈیا اتے ٹیم دے حق وچ تے خلاف بہت ساریاں گلاں ہوندیاں رہیاں۔ کجھ بابر اعظم نوں مستقبل دا وزیراعظم وی لکھنا شروع ہو گئے سن پر جویں ای ٹیم ہار کے میدان چوں باہر نکلی تے فیر تے سوشل میڈیا اتے شہریاں نے قومی ٹیم دی کمکاری اتے مایوسی دا اظہار کردیاں ہویاں سخت تنقید دا نشانا بنایا کہ پاکستان ٹیم 92 ورلڈ کپ دی قومی ٹیم دی طرحاں قوم دِیاں دعاواں تے معجزے نال فاینل وچ پہنچی سی جہدے وچ قومی ٹیم نے عمران خان دی قیادت وچ ورلڈ کپ جِتیا۔ خیال کیتا جا رہیا سی کہ اج قومی ٹیم چنگی کمکاری وکھاندیاں ہویاں ورلڈ کپ اپنے ناں کرے گی پر قومی ٹیم دی بیٹنگ نے قوم نوں مایوس کیتا۔ اک بندے نے تے ایتھوں تک لکھ دِتا کہ 92 دِیاں نشانیاں ختم قیامت دِیاں شروع ہو گئیاں۔ دوجے نے لکھیا ایہ سبھ نیدر لینڈ دی غلطی اے ورنا اسیں ایس ویلے گھر وچ ارام کر رہے ہوندے۔ اک ہور نے عمران خان دی ورلڈکپ والی تصویر شیئر کردیاں ہویاں لکھیا کہ اج تک تہاڈے معیار تک کوئی نہ پہنچ سکیا کرکٹ وچ نہ سیاست وچ۔ ٭