چوگ دی جوگ

اتفاق بٹ

گلیاں تے میداناں وچ
شہر دے کوڑے داناں وچ
روزی اپنی پھول رہے نیں
کنج حیاتی رول رہے نیں
کنے بھولے بھالے بچے
آ کے کوئی دلاسہ دیوے
ایہناں بُلیاں ہاسہ دیوے
جنہاں اج اینا دکھ جرناں
کل نوں ایہناں نے کیہ کرنا
دکھ درداں دے پالے بچے
وڈی سرگھی اٹھ جاون ایہہ
کم اپنے تے جٹ جاون ایہہ
بال پُنے دا مُل پئے وٹن
ڈھیر تے تھک کے نیندرا کٹن
آ کے کون سنبھالے بچے
بستہ، ٹائی، بوٹ وی کوئی ناں
ناں کوئی امبڑی، ناں کوئی چھاں
ایہناں جوگی کوئی نہیں تھاں
دھرتی تے ایہہ چھالے بچے
کدی تے آ کے ربا ویکھ
بن کے ماں تے ابا ویکھ
اپنا آپ تے گال رہے نیں
جیون نوں کنج پال رہے نیں
کاغذ چکن والے بچے