سود دی حرمت تے نقصانات

اللہ تعالیٰ نے سود نوں حرام قرار دتا اے۔ تسیں خود سوچو کہ جدوں اک چیز نوں اللہ تعالیٰ جئی حکیم تے خبیر ذات خود حرام قرار دے رہی ہووے تے اوہدے وچ کس قدر نقصانات ہون گے؟ سود کبیرہ گناہواں وچوں اک اے۔ اللہ دی ناراضگی دا کارن اے بلکہ اللہ تے اوہدے رسولۖ نال اعلان جنگ اے۔ سود کھانا اپنی ماں نال زنا کرن توں وی وڈا گناہ اے۔ اللہ دے عذاب دا کارن اے۔ انسان دے جہنم وچ جان دا کارن اے۔ اللہ دی رحمت توں دوری دا ذریعہ اے۔ انساناں دے حق وچ مفید معیشت لئی زہر قاتل اے۔ سود دی قرآن تے سنت وچ بہت سخت قباہتاں تے وعیداں مذکور نیں۔
سود سابقہ شریعتاں وچ :
یہودیاں بارے قرآن کریم وچ اے: تے یہودیاں دے سود لین دی وجہ نال (عذاب آیا) حالانکہ اوہناں نوں ایہدے توں روکیا گیا سی۔ (سورة النسائ’ رقم الآیة:161)
فیدا: ایس آیت دے تحت مفسرین کرام نے لکھیا اے کہ شریعت محمدیہ وانگوں سود پچھلی شریعتاں وچ وی حرام سی۔
سود حرام اے:
مفہوم آیت:سود کھان والے لوک جدوں قیامت والے دن قبراں توں اٹھن گے تے اوس شخص وانگوں اٹھن گے جہنوں شیطان نے چھو کے پاگل بنا دتا ہووے۔ ایہہ (عذاب) ایس لئی ہووے گا کہ دنیا وچ ایہہ لوک کہیا کردے سی کہ بیع وی تے سود وانگوں ہوندی اے حالانکہ اللہ تعالیٰ نے بیع نوں حلال جد کہ سود نوں حرام قرار دتا اے لہٰذا جہڑے شخص دے کول اوہدے رب ولوں نصیحت (سود دی واضح حرمت) آ گئی ہووے تے اوہ اوہدی وجہ نال سودی معاملات توں آئندہ لئی باز آ گیا تے پچھلے زمانے وچ جو کجھ سودی معاملہ ہو چکیا’ سو اوہ ہو چکیا ایہدا معاملہ اللہ دے حوالے اے تے جہڑا شخص دوبارہ سود والے حرام کم وَل پرتیا اوہ جہنمی اے اوہ ہمیشہ اوہدے وچ رہوے گا۔ (سورة البقرة’ رقم الآیة:275)
فیدا: ساڈا عقیدہ تے نظریہ ایہہ ہے کہ کفرو شرک دے علاوہ کبیرہ گناہ کرن والا ہمیشہ جہنم وچ نہیں رہوے گا بلکہ اپنے گناہواں دی سزا پا لین مگروں بالآخر جہنم توں کڈ لیا جاوے گا۔ مذکورہ بالا آیت کریمہ توں بظاہر انج لگدا اے کہ سود کھان والا ہمیشہ جہنم وچ رہوے گا حالانکہ انج نہیں۔ آیت مبارکہ وچ جہڑے شخص دا ذکر اے اوہ اوہ شخص اے جہڑا سرے توں سود دی حرمت دا قائل نہیں اے بلکہ کہندا اے کہ سود وی تے بیع وانگوں اے۔ ایسا شخص سود نوں حرام نہ منن دی وجہ نال کافر اے تے کافر ہمیشہ جہنم وچ رہن گے۔
سود نوں اللہ تعالیٰ گھٹاندے نیں:
مفہوم آیت:اللہ تعالیٰ سود دے مال نوں گھٹاندے نیں تے صدقہ دے مال نوں ودھاندے نیں۔(سورة البقرة’ رقم الآیة:276)
حضرت عبداللہ بن مسعود کولوں روایت اے کہ نبی کریمۖ نے فرمایا: سود اگرچہ ویکھن دے اعتبار نال بوہتا ای وکھائی دیوے لیکن انجام دے اعتبار نال گھٹ ای ہوندا اے۔ (مسند احمد’ رقم الحدیث:3754)
سودی معاملات فی الفور چھڈ دتے جان:
مفہوم آیت: اے ایمان والو! جے تسیں واقعی پکے سچے مومن او تے اللہ کولوں ڈرو تے سود دے پچھلے معاملات چھڈ دیو (سورة البقرة’ رقم الآیة:278)
حجة الوداع اتے اعلان:
رسول اللہۖ نے حجة الوداع دے موقعے اتے فرمایا: سارے لوک ایس گل نوں چنگی طرحاں ذہن نشین کر لوو کہ زمانہ جاہلیت دا ہر قسم دا سود ختم ہو چکیا اے لہٰذا تہاڈے لئی ہن تہاڈا اصل مال (باقی) اے نہ تسیں خود کسے اتے ظلم کرو تے نہ ای کسے ہور دے ظلم دا شکار بنو۔عباس بن عبدالمطلب دا سود سارے دا سارا ختم اے۔ (جامع الترمذی’ رقم الحدیث:3087)
فیدا: سود دی حرمت آپۖ دی زندگی دے آخری سالاں وچ ہوئی ایس لئی حجة الوداع دے موقعے تے سارے لوکاں دے سامنے ایہدی حرمت نوں عملی شکل دتی گئی۔
سود خور نال اللہ دا اعلان جنگ:
مفہوم آیت:فیر جے تسیں انج نہ کیتا یعنی سودی معاملات نوں نہ چھڈیا تے اللہ تے اوہدے رسولۖ ولوں تہاڈے خلاف اعلان جنگ اے تے جے تسیں توبہ کر لوو سودی معاملات نوں یکسر چھڈ دتا تے تہاڈا اصل سرمایہ تہاڈا حق اے اوہ تسیں لے لوو۔ نہ تسیں کسے اتے ظلم کرو نہ تہاڈے اتے کوئی ہور ظلم کرے (سورة البقرة’ رقم الآیة:279)
فیدا: قرآن و سنت توں پتہ چلدا اے کہ دُوجے کبیرہ گناہواں دی سزا وچ ایس قدر شدت بیان نہیں کیتی گئی جنی سود دی سزا وچ بیان کیتی گئی اے یعنی اللہ تے اوہدے رسولۖ ولوں اعلان جنگ۔جدوں اللہ ولوں اعلان جنگ ہووے تے خود سوچو کہ بندے دا کیہ بچے گا؟ اللہ کریم ساڈے ساریاں دی حفاظت فرماوے۔
سودی معاملات توں متعلقہ سارے بندیاں اتے لعنت:
حضرت جابر بن عبداللہ کولوں مروی اے کہ اللہ دے رسولۖ نے سود کھان’ سود دین’ سودی حسابات تے معاملات لکھن تے سودی لین دین اتے گواہ بنن والیاں اتے لعنت فرمائی اے تے فرمایا اے کہ ایہہ سارے لوک گناہگار ہون وچ برابر دے شریک نیں۔ (صحیح مسلم’ رقم الحدیث:4100)
فیدا: بے شک انسان خود سود نہ وی لووے لیکن جے اوہ سودی معاملات وچ کسے درجے وی شریک ہوندا اے تے اوہنوں وی انج دا ای عذاب دتا جاوے گا جیسا سود لین تے دین والے نوں ہووے گا۔ایس لئی سارے سودی معاملات توں خود نوں دور رکھو۔ ورنہ انسان ایہناں ساری وعیداں تے عذاباں دا مستحق بن جاندا اے جہڑے قرآن و سنت وچ مذکور نیں۔
ماں نال زنا کرن توں وی وڈا گناہ:
حضرت ابو ہریرہ کولوں روایت اے کہ رسول اللہۖ نے فرمایا: سود دے اندر ستر قسم دے گناہ پائے جاندے نیں تے اوہناں وچوں سب توں گھٹ درجے دا گناہ ایسا اے جیویں کوئی شخص اپنی ماں نال زنا کرے۔ (سنن ابن ماجہ’ رقم الحدیث:2274)
عذاب دی مستحق قوم:
حضرت عبداللہ بن مسعود کولوں روایت اے کہ رسول اللہۖ نے فرمایا: جدوں کسے قوم وچ زنا تے سود پھیل جاوے تے اوہ قوم اپنے آپ نوں اللہ دے عذاب دی مستحق بنا لیندی اے۔ (صحیح ابن حبان’ رقم الحدیث:4410)
فیدا: ایس ویلے پورے عالم اتے جہڑا عذاب اے اوہدے وچ مسلماناں دے کبیرہ گناہواں دا وی دخل اے۔ ایس لئی سانوں ساریاں نوں سارے گناہواں توں سچی توبہ کرنا ہووے گی۔
غیر سودی بینکاری:
دور حاضر وچ جید علما کرام دی محنت توں اک غیر سودی بینکاری دا نظام پیش کیتا گیا اے۔ ایس لئی سودی معاملات توں بچن لئی اپنا سرمایہ غیر سودی بینکاں وچ جمع کرائو’ تجارت کرو’ نفع کمائو۔
ارادہ نہیں فیصلہ کرو:
خودوی تے اپنی اولاداں نوں وی حرام دے لقمے توں بچائو۔ اسلام تے شبہ والی گل توں وی بچن دا حکم دیندا اے تے سود تے واضح طور تے حرام اے۔ لقمہ حرام دی نحوست توں انسان دنیا تے آخرت دا خسارہ چکدا اے۔ دنیا وچ انسان اتے بیماریاں دا حملہ ہونا’ ذہنی اذیت وچ مبتلا ہونا’ اولاد دا نافرمان ہونا’ گھریلو جھگڑیاں دا ودھ جانا تے حادثیاں دا پیش آنا سب شامل اے جد کہ آخرت وچ اللہ دی ناراضگی’ شفاعت توں محرومی تے جہنم دی اگ دا مستحق ہونا شامل اے ایس لئی محض ارادہ نہیں بلکہ فیصلہ کرو کہ نہ خود سود کھائو گے تے نہ ای کسے طرحاں دے سودی معاملات وچ شریک ہوو گے تے اپنی اولاداں نوں وی ایس توں بچائو گے۔ اللہ تعالیٰ سانوں رزق حلال پاکیزہ وسعت والا عطا فرماوے تے حرام توں ساڈی حفاظت فرمائے۔ آمین بجاہ النبی الکریمۖ۔