لانگ مارچ تے بے روزگاری

طلعت عباس خان

عنوان پڑھ کے تسیں سوچیا ہووے گا کہ میں کسے رہائشی منصوبے دے باغ بارے گل کر رہیا واں۔ پہلے اک بریکنگ نیوز تے گل ہو جاوے۔ لہور چلن والا قافلہ (حقیقی آزادی مارچ) روزانہ انج چلدا رہیا جیویں کوئی بندہ ڈاکٹر صاحب دے کہن تے ہلکی پھلکی واک کر رہیا ہووے۔ ایہ دنیا دا واحد لانگ مارچ سی جہدے لیڈر آپ کئی کئی گھنٹے گھراں وچ رہندے تے آرام کردے جد کہ محبان سڑکاں بلاک رکھدے۔ کاش مظاہرین نوں عام لوکاں دی تکلیف دا اندازہ ہوندا کہ انج کرن نال کہڑیاں کہڑیاں دی زندگی تنگ ہوندی۔ اللہ اسانیاں پیدا کرن والیاں دے نال ہوندا اے۔ شیطان ہمیشہ نقصان دیندا اے۔ ٹریفک بلاک کرن نال انساناں لئی اوکڑاں پیدا ہوندیاں نیں فیر ایس لانگ مارچ کرن والیاں لئی اوکڑاں پیدا ہوئیاں تے لیڈراں تے فائرنگ ہوئی۔ اوہناں دے کول وکیلاں دی ٹیم موجود اے پر لگدا ایہو اے خان صاحب اوہناں دی گل نہیں مندے اوہ صرف اپنی گل کردے نیں نہیں تے اوہناں نوں فوراً ہسپتال لے جایا جاندا اوتھے ایم ایل آر رپورٹ تیار ہوندی۔ مقدمہ چلدا تے کم آندا اے۔ ایف آئی آر لئی نامزد بندیاں وچ تریجی شخصیت آرمی افسر دی اے۔ بقول آفتاب عالم یاسر ایڈووکیٹ دے فوجی افسراں دے خلاف ایف آئی آردرج نہیں ہو سکدی۔
ایس واقعے دے بعد پہلے لانگ مارچ روکیا گیا فیر کہیا گیا کہ لانگ مارچ فیر شروع ہووے گا خان صاحب راولپنڈی اپڑ کے شامل ہون گے۔ اوہناں دے حادثے تے کوئی کہندا اے اوہناں نوں کسے دی نظر لگی کوئی کہندا اے اوہناں نوں غریب مسافراں دی بددعا لگی جہناں نے اپنا سفر کاراں’ بساں’ویگناں’ موٹرسائیکلاں’ رکشیاں تے جاری رکھنا سی جاری نہ رکھ سکے۔ ایہدے نال سڑک دے کنڈھے بزنس بند ہوئے۔ کہیا جاندا اے جدوں توں ایہ اقتدار توں باہر ہوئے ایہناں لئی ویلا گزارنا اوکھا ہو چکیا سی ایس لئی اپنی پارٹی نوں زندہ رکھن لئی لانگ مارچ دا آسرا لے رہے نیں۔ لانگ مارچ دا مطالبہ ایہ سی کہ الیکشن ویلے توں پہلاں کرائے جان جد کہ ایس ویلے قومی اسمبلی بحال اے تے کم کر رہی اے۔ ضمنی الیکشن ہوئے ایہ جتے پر اسمبلی وچ گئے نہیں کیوں جے ایہناں دے نال بیٹھنا ایہ گوارا نہیں کردے۔ جے انج سی تے ضمنی الیکشن وچ حصہ کیوں لیا۔ قوم دا پیسہ تے ویلا ضائع کیوں کیتا۔ ایہناں حالات وچ نویں الیکشن کران دی ضد لوکاں دی سمجھ توں باہر اے۔ ایہ اکثر کہندے سن کہ اسیں اقتدار توں باہر زیادہ خطرناک ثابت ہوواں گے ایس ویلے کسے دی سمجھ وچ گل نہیں سی آ ندی کہ ایہ کیویں خطرناک ثابت ہون گے پر ہن لوک تے ادارے وی سمجھ چکے نیں۔
پاکستانی تریخ وچ پہلی واری اک ادارے نوں ایس طرح پریس کانفرنس کرنی پئی جنہے کدی لب کشائی نہیں سی کیتی۔ کہیا جاندا اے کہ کسے پنڈ وچ اک مالی نمبرار صاحب دی آشیرباد تے مخالفین تے چکڑ ملدا اے پنڈ دا نمبردار صاحب تے رنج لگدا اے پر شہر دا نمبردار صاحب اوہناں دے نال دکھائی دیندا اے۔ کیہ ایہو سیاست اے کہ ایشو تے گل کرن دی تھاں اداریاں تے چکڑ ملیا جاوے اوہناں نوں کمزور کیتا جاوے۔ الزامات لان نال اداریاں تے قوم دا مورال کمزور ہوندا اے۔ ساڈے ایتھے حکمران آندے جاندے نیں۔ اک خاص مقصد لئی لیائے جاندے نیں فیر اوہناں نوں باہر کڈھیا جاندا اے۔ اجیہا الزام ہر حکمران دے جان مگروں لگدا اے۔ جے ایس ویلے اوہناں دا حصہ نہ بن دے تے اسیں وی اج ساتھ دیندے۔ انج ای ہر حکمران جان دے بعد رولا پاندا اے۔ کجھ حکمران آئے جہناں نے عوامی خدمت کیتی۔ بھٹو نے سٹیل مل دتی’ نواں قنون دتا۔ نوازشریف نے موٹروے دتی’ ملک نوں ایٹمی قوت بنایا۔ لوک کہندے نیں تسیںچار ورھیاں وچ سوائے گالھاں کڈھن دے کجھ نہ دتا۔ جلسے جلوساں’ لانگ مارچ وچ لوکاں دا آنا جانا لگا رہندا اے انج ای جیویں برات دے نال بچے جوان بینڈ واجے دے نال شامل ہو کے بھنگڑے پاندے نیں۔ ایس لئی برات وچ شامل ہوندے نیں کہ دلہا دے عزیز برات تے نوٹ نچھاور کردے نیں تے اوہ کرنسی نوں لٹدے نیں۔ اوہناں لئی کوئی نہیں کہندا کہ فلاں دی اینی وڈی برات آئی سی برات ورگا ای حال ہن جلسے جلوساں تے لانگ مارچ دا اے۔ ملک وچ بیروزگاری عام اے۔ ایہ وچارے ایس لئی اوتھے جاندے نیں کہ اوہناں نوں کھانا پینا مل جاندا اے۔ہلہ گلہ کر لیندے نیں ہن تے کہیا جاندا اے اجہے موقعے تے کجھ نوں تے جاب مل جاندی اے کہ تسیں ایس موقعے تے مٹی دا تیل سٹنا اے۔ کسے نوں جاب ملدی اے کہ تسیں مٹی دے تیل تے اگ لانی اے۔ کسے نوں ٹائر لیان دی جاب مل جاندی اے کسے نوں ٹائر ساڑن دی جاب ملدی اے تے کسے نوں لاش گران دی۔ بازار وچ ہر چیز وکائو اے۔ایہ دنیا دا نظام اے جتھوں کارنر پلاٹ ملدے نیں تے اک اوس ذات دا نظام اے جہدا فائدہ ای فائدہ اے نقصان نہیں۔ اوہ ذات دسدی اے کہ میرے دتے گئے نظام وچ تینوں جنت وچ دل پسند تھاں دیواں گا۔ ایس باغ دی ہر کوئی حاصل کر سکدا اے تے کیویں حاصل کر سکدا اے۔ ایہ سب کجھ دس چکیا اے کہ ایس باغ وچ جان لئی پیسیاں دی نہیں نیک اعمال دی ضرورت اے۔٭