قبلہ بزرگوار عفی عنہ

ساڈے اک دوست ع غ نیں۔ بڑے کامیاب آدمی نیں۔ ایہناں دے استاد شہر دے معروف حکیم ہوندے سن پر ہن صرف کردار سازی تے دھیان دیندے نیں۔ ع غ اپنے استاد نوں قبلہ بزرگوار کہہ کے بلاندے نیں۔
اوہناں دی کرامات ویکھ کے ساڈے دوست نے ساڈے توں پچھیا کہ اوہ قبلہ بزرگوار دے نال کجھ ہور لاحقہ وی لانا چاہندے نیںتے اسیں ازراہ محبت قبلہ نوں کافی کہیا۔ اوہناں نک چڑھایا جیویں کہہ رہے ہون بندر کیا جانے ادرک کا سواد۔ کیوں جے سانوں ع غ نال دلی لگائو اے تے بناں کسے توقف دے عفی عنہ تجویز کیتا۔ ع غ بڑے خوش ہوئے۔ ع غ دا کہنا اے کہ قبلہ بزرگوار دے نقش قدم تے چل کے ای ساریاں نعمتاں اوہناں دے قدماں وچ ڈھیر ہو رہیاں نیں۔ ع غ وی قبلہ بزرگوار وانگوں تعلیم توں کوسو ںدور نیں سگوں اوہ تعلیم نوں وقت دا عین ضیاع سمجھدے نیں۔ ع غ قبلہ بزرگوار وانگوں درسی تعلیم دے کٹڑ مخالف نیں۔ اللہ اوہناں نوں اپنی مساعی جلیلہ وچ کامیاب فرمائے۔ تسیں آمین ذرا اچی آواز وچ وی کہہ سکدے او۔ انج وی ع غ دعا توں ودھ عمل دے قائل نیں۔ اوہناں دی کردار سازی دی اہمیت دا عالم دیکھو کہ اج تک کسے سکول’ مدرسے یاں یونیورسٹی نہیں گئے۔ اوہناں دا کہنا اے کہ ایہناں سکولاں’ مدرسیاں تے یونیورسٹیاں وچ کردارسازی تے دھیان نہیں دتا جاندا۔ ایسے وجہ نال اوہناں نے کسے استاد دے اگے زانوائے تلمذتہہ نہیں کیتا۔ اوہ زانو نوں تہہ نہ کرن دے قائل نیں۔
اوہناں دے ارشاد دے مطابق ایہ استاد تعلیم دیندے نیں پر کردارسازی نوں بالکل وی اہمیت دین دے قائل نہیں۔ نوجوان نسل دی عجیب حرکتاں دے ذمہ دار ایہ استاد نہیں تے ہور کون نیں۔ ایہناں استاداں دا فرض سی کہ اوہ قوم دے نونہالاں دی ذہنی تربیت کردے تے اوہناں دی کردارسازی ول دھیان دیندے۔ انج لگدا اے کہ اوہ ایس کم توں قطعی غافل نیں۔ یونیورسٹیاں وچ تعلیم دا کوئی معیار ای نہیں سگوں اوہناں دا خیال اے کہ ایہ یونیورسٹیاں ناں دیاں یونیورسٹیاں نیں۔ اوہناں دا کہنا اے کہ اجہی نامعقول تھاواں ول رخ کرنا وقت دا ضیاع اے۔ اوہناں دا ایہ وی کہنا اے کہ توبہ دے بوہے ہر ویلے کھلے نیں۔ ہن وی وقت اے کہ قوم اوہناں دی آواز تے لبیک کہے تے سکولاں’ مدرسیاں تے جامعات نوں ہمیشہ لئی خیرباد کہہ دین۔ ایس سلسلے وچ اوہ گھر توں کردارسازی دی اہمیت دے قائل نیں تے کہندے نیں کہ اوہناں دی کامیابی وچ اوہناں دے استاد دا اجیہا رول اے جہنوں ہر استاد نوں اختیار کرنا چاہیدا اے تاں جے ایہ نوجوان نسل اپنے زور بازو تے اگے ودھے۔ اوہ اپنے استاد نوں سر وغیرہ نہیں کہندے سگوں اوہناں نوں قبلہ بزرگوار کہہ کے بلاندے نیں۔ اوہناں دا کہنا اے کہ اوہناں دے قبلہ بزروگار جامع الصفات شخصیت نیں اوہناں دی شخصیت وچ تعلیم تے کردارسازی دی دوویں صفات اکٹھیاں ہو گئیاں نیں۔ جے اوہناں دے ملفوظات نوں اک پاسے وی رکھ دتا جاوے تے اوہناں دی شخصیت ای اک پورا ادارہ اے۔
اصل وچ اوہ اپنے قبلہ بزرگوار نوں اک انجمن دا درجہ دیندے نیں۔ ساڈے ع غ صاحب صبح سویرے اٹھ کے قبلہ بزرگوار دی خدمت عالیہ وچ حاضر ہوندے نیں تے تازہ ارشادات دے منتظر ہوندے نیں۔ عموماً قبلہ بزرگوار ناشتہ اک سیاسی شخصیت دے نال کردے نیں۔ قبلہ بزرگوار دا خیال اے کہ اوہ سیاسی شخصیت اصل وچ اک فرشتہ نیں تے صرف نقص امن دی خاطر اپنے آپ نوں پوشیدہ رکھے ہوئے نیں کہ اوہ ایس عالم آب و گل دی پیداوار نہیں۔ ایہ قبلہ بزرگوار دی تعلیم دا پہلا نکتہ اے کہ اج کل وی انساناں دے روپ وچ فرشتے ایس دنیا وچ پھر رہے نیں۔ عموماً اوہ وڈیاں وڈیاں کوٹھیاں وچ رہندے نیں تاں جے اوہ عام لوکاں دیاں اکھاں توں اولھے رہن۔ انج وی فیض رسانی لئی سامنے آنا یاں ظہور کرنا کوئی ضروری نہیں۔ قبلہ بزرگوار ناشتے لئی جاندے ہوئے ع غ صاحب نوں وی نال لے جاندے نیں تاں جے اوہ وی زمانے دی رفتار تے تقاضیاں دے نال ہم آہنگ ہو سکے۔ اوہ ع غ صاحب نوں ایمان بالغیب تے یقین دا درس دیندے نیں کہ دیکھو روزی دا فرشتہ ساڈے آل دوالے ای ہوندا اے بس قناعت تے یقین دی دولت ہتھ وچ ہونی چاہیدی اے۔ ع غ دا کہنا اے کیوں جے قبلہ بزروگار خاندانی حکیم نیں ایس لئی اوہناں دا ہتھ اوہناں لوکاں دی نبض تے ہوندا اے جو معاشرے دی ترقی تے فلاح لئی ہر ویلے کوشاں رہندے نیں۔قبلہ پنجاب پولیس وانگوں اڈدی چڑی دے پر گن لیندے نیں تے جان لیندے نیں کہ فلاح اصل وچ اوہ اے جو اوہناں دی فلاح ہووے تے ترقی وی اوہ اے جو اوہناں دی ترقی ہووے۔
ع غ دا کہنا اے کہ قبلہ بزروگار تے جہڑے لوک الزام لاندے نیں اوہ اوہناں دی صفات توں جانوں نہیں۔ انج تے قبلہ بزرگوار دنیا نوں فانی سمجھدے نیں تے اوہنوں اک بھٹیارن دی سرائے نال تشبیہہ دیندے نیں۔ زندگی نوں ساہ لین دی مشقت ای سمجھدے نیں پر جدوں تک ساہ اودوں تک آس دے مطابق ایس گئی گزری عمر وچ وی کسے سرکاری ادارے دی سربراہی قبول کرنا عار نہیں سمجھدے۔ جدوں اسیں اپنے دوست ع غ توں استفسار کیتا کہ قبلہ بزرگوار نوں سمجھائو کہ ہن اللہ اللہ کرن تے اجہی سربراہی لئی کسے نوجوان امیدوار نوں سامنے آن دین تے کہن لگے فکر نہ کرو اوہ اپنے واسطے نہیں ہن میرے لئی کوشاں نیں۔ اسیں عرض گزاری اے ع غ ایہ کیہ؟ کہن لگے قبلہ بزروگار دا کہنا اے دنیا چار دن دی چاندنی اے ایس لئی اوہ چاہندے نیں کہ ایس سرکاری ادارے دی سربراہی نسل در نسل چلا کے رب دے حضور حاضر ہونا چاہندے نیں۔ ہن کوئی دن جاندا اے سربراہی دا قرعہ تہاڈے دوست ع غ دے ناں نکلن والا اے۔ اسیں کہیا میاں ع غ ایہ تے انصاف نہ ہویا۔ خشمگیں اکھاں نال میرے ول ویکھیا تے کہیا کیہ مطلب؟ اسیں کہیا غصہ تھُک دیو ساڈا کجھ حق بن دا اے۔ فوراً غصہ تھُکیا کہن لگے پر تینوں اپنا ناں بدل کے ذرا ادبی کرنا پوے گا جیویں میرا ع غ اے اسیں کیہ اسیں کیہ ناں رکھیے؟ اوہ کہن لگے تسیں ادبی ناں ک گ رکھ لوو کیسا رہے گا۔ اسیں اگے ودھے تے ع غ نوں کہن لگے ک گ سانوں متھے تے بوسہ دیو۔٭