سیلاب زدگان دی بحالی وچ حکومت پنجاب دا انقلابی اقدام

حکومت پنجاب دی ہمیشہ توں کوشش رہی اے کہ عوام الناس دی فلاح و بہبود لئی ایسے اقدامات کیتے جان جہڑے کہ اوہناں دی ترقی تے خوشحالی دا کارن بنن تے عوام نوں مشکلاں توںکڈ کے خوشحالی وَل گامزن کرے تاں جے براہ راست ملکی ترقی وچ نمایاں وادھا ممکن ہو سکے۔ ملکی ترقی وچ ہمیشہ مسائل درپیش ہویا کردے نیں مگر پاکستان وچ حالیہ دناں وچ سیلاب بہت ساری تباہ کاریاں لے کے آیا اے۔ مون سون دی طوفانی بارشاں نے پاکستان دی 75 سالہ تریخ وچ سب توں ودھ شدید سیلاب نوں جنم دتا جہدے توں پنڈ بہہ گئے تے ایس سیلاب دے نتیجے وچ بہت سارا جانی تے مالی نقصان ہویا۔ لوکاں دے کاروبار تباہ ہو گئے نیں۔کساناں دیاں فصلاں پوری طرح تباہ ہو گئیاں نیں جہناں وی علاقیاں وچ کھیتی تے کاشتکاری ہوندی سی۔ اوتھے دے حالات شدید خراب نیں’ لائیو سٹاک دا وی کافی نقصان ہویا اے۔ غریب عوام دے مویشی بہہ گئے نیں۔ سیلاب دی وجہ نال ہون والے نقصانات دی شدت ایس حد تک اے کہ ا وہناں دا فوری تے پوری طرح ازالہ ناممکن اے۔ پاکستان بھر وچ سیلاب دی وجہ نال تباہ کاریاں عروج تے نیں جہدے پاروں عوام سخت بے چین تے پریشان اے۔ ایس سیلابی صورتحال نال قوم دا ہر طبقہ پریشان اے۔ اِنج لگدا اے کہ ساڈا ملک صرف تے صرف اللہ رب العزت دی کرم نوازی اتے قائم اے ورنہ ساڈے سیاسی حالات دے نال نال جہڑی سیلابی صورتحال چل رہی اے کہ کسے آفت یا بردباری توں گھٹ نہیں اے۔ ملک وچ ایسی سیلابی افراتفری اے کہ غریب تے غریب امیر لوک وی ایس صورتحال دا بہت مشکل نال سامنا کر رہے نیں۔ سیلاب دی وجہ نال سبزیاں’ آٹا’ پھل تے دُوجی اجناس ضروریہ دی قیمتاں وچ وی کافی وادھا ویکھن وچ آیا اے۔ مون سون دا موسم پاکستان دے کئی صوبیاں نوں متاثر کردا اے۔ تقریباً دس ملین بچیاں نوں این ڈی ایم اے نیشنل ڈیزاسٹر مینجمنٹ اتھارٹی ولوں محفوظ بنایا گیا۔ ایسے طرح پی ڈی ایم اے پنجاب ڈیزاسٹر مینجمنٹ اتھارٹی نے حکومت پنجاب ولوں سیلاب متاثرین لئی ٹیلی تھون کیتی تے مثالی فنڈ اکٹھا ہویاکسے ہور سیاسی جماعت یا لیڈر نے ٹیلی تھون دی جرات نہیں کیتی کیوں جے شہباز سریف تے دُوجیاں نوں پتہ سی کہ کوئی اوہناں نوں مالی امداد نہیں دیوے گا۔ وزیراعلیٰ پنجاب چودھری پرویزالٰہی سیلاب متاثرین نال اظہار یکجہتی لئی راجن پور تے ڈی جی خان پہنچے تے سیلاب متاثرہ علاقیاں دا دورہ وی کیتا ۔ پنجاب کابینہ دی اک مہینے دی تنخواہ متاثرین سیلاب دی مدد لئی دین دا اعلان کیتا گیا۔ایسے طرح وزیراعلیٰ پنجاب نے اپنا ہیلی کاپٹر سیلاب متاثرین دی فلاح لئی وقف کر رکھیا سی۔ سیلاب نال متاثرہ سارے علاقیاں نوں آفت زدہ قرار دین دا اعلان کیتا گیا تے دوجے پاسے حکومت پنجاب نے متاثرین دی ہر ممکن مدد جاری رکھن دا وی عزم کیتے رکھیا اے۔ وزیراعلیٰ پنجاب چودھری پرویزالٰہی وَلوں متاثرین سیلاب دی ہنگامی مدد تے فوری بحالی لئی وزیراعلیٰ فنڈز ریلیف دا قیام کیتا گیا اے۔کسے وی ہنگامی صورتحال وچ سیلاب متاثرین پی ڈی ایم اے پنجاب ڈیزاسٹر مینجمنٹ اتھارٹی دی ہیلپ لائن 1129 اتے رابطہ کر سکدے نیں۔ پی ڈی ایم اے پنجاب ڈیزاسٹر مینجمنٹ اتھارٹی نے سیلاب وچ جاں بہق ہون والے ہر بندے دے ورثا نوں دس لکھ روپے دین دا فیصلہ جاری کیتا اے تے دوجے پاسے
سیلاب دی تباہ کاریاں پاروں جہناں بندیاں دے مکاناں نوں نقصان پہنچیا تے جہناں دے مکانات سیلاب دے ریلے دے نال بہہ گئے۔حکومت پنجاب نے چار لکھ پکے مکان تے مکان دے نقصان اتے امدادی رقم دو لکھ روپے دتی اے جہناں دی فصلاں تباہ تے برباد ہو گئیاں نیں۔ حکومت پنجاب نے فصلاں دے نقصان اتے ساڈے بارہ ایکڑ اتے پندرہ ہزار روپے دی امداد دتی اے۔ سیلاب دی وجہ نال پانی وچ پیدا ہون والی بیماریاں جنم لیندیاں نیں۔ غذائی قلت ودھ جاندی اے۔ پی ڈی ایم اے پنجاب ڈیزاسٹر مینجمنٹ اتھارٹی نے سیلاب متاثرین تک کھان پین دی شیواں پہنچائیاں۔ ضرورت دا سامان جیویں کہ کپڑے تے خیمے وغیرہ پہنچائے گئے نیں۔ حکومت پنجاب نے 168000 توں ودھ سیلاب متاثرین نوں خشک راشن دی فراہمی دتی جد کہ 44000 توں ودھ زخمیاں دی امداد کیتی۔ ایسے طرحاں 5000 توں ودھ کمبل وی بھجوائے گئے نیں۔ سیلاب وچ بہت سارے مویشی بہہ گئے۔ بہت سارے جانور مر گئے تے دوجے پاسے پنجاب حکومت ولوں لکھاں دی گنتی وچ مویشیاں دی ویکسی نیشن کیتی گئی اے۔ پی ڈی ایم اے پنجاب ڈیسزاسٹر مینجمنٹ اتھارٹی نے 1400 توں ودھ ڈُبدے افراد نوں ریسکیو بوٹس بھیجے۔ ہور 21ہزار توں ودھ لائف جیکٹاں دی فراہمی دتی گئی تاں جے ودھ توں ودھ افراد نوں ریسکیو کیتا جا سکے۔ سیلاب پاروں ملیریا تے ڈینگی دے پھیلائو وچ وادھا ہو جاندا اے ۔ ایہدے بچائو لئی حکومت پنجاب تے پی ڈی ایم اے پنجاب ڈیزاسٹر مینجمنٹ اتھارٹی نے نمائندیاں دے ذریعے 23000 توں ودھ مچھر توں بچائو میٹس دی فراہمی دتی۔ 34000 توں ودھ آٹے دے تھیلیاں نوں تقسیم کیتا گیا۔ سیلاب نال مویشیاں دے نقصان دے ازالے دا وی جائزہ لیتا گیا اے تے وڈے مویشی دی ہلاکت اتے 50ہزار روپے بھیڑ بکری دی ہلاکت اتے پنج ہزار روپے دی امداد دتی جان گئیاں۔ حکومتی کمیٹی نے چھوٹے مویشیاں دے نقصان اتے ازالہ دی رقم دی تجویز دے رکھی اے۔ جہدا فیصلہ نقصان دے تخمینے مگروں کیتا جاوے گا۔ پی ڈی ایم اے نے جذبہ خیر سگالی دے تحت دوجے صوبیاں نوں ریسکیو تے ریلیف آپریشنز وچ معاونت وی کیتی۔ سانوں محکمہ موسمیات وچ جدت اختیار کرن دی لوڑ اے۔ سیلابی پانی نوں اکٹھا کرن لئی وڈے ڈیم تعمیر ہونے چاہیدے نیں جہدا فیدہ
ایہہ ہووے گا کہ اسیں سیلابی آفتاںتوں بچے رہواں گے تے اوہو پانی بجلی بنان وچ کم آ سکدا اے۔ حکومت پنجاب نے ہر لحاظ نال لوکاں دی مالی مدد کیتی اے۔ عوام خواہشمند اے کہ حکومت پنجاب اگے وی ساڈی ایسے طرح مالی مدد کرے۔ وزیراعلیٰ پنجاب چودھری پرویزالٰہی نے اوکھے ویلے حکومت سنبھالی تے مختصر عرصے وچ سیلاب متاثرین دی مدد کیتی۔ انتھک محنت نال نہایت اہم اقدامات سرانجام دتے گئے جو کسے وی حکومت لئی ناممکن ہوندا۔ اپنے انتخابی منشور وچ معیشت’ احتساب’ فلاحی طرزحکمرانی تے سفارتکاری دے شعبے توں متعلق جہڑے وعدے تے اعلانات کیتے سن اوہ مکمل ہوندے نظر آ رہے نیں۔ایہہ حقیقت اے کہ کامیابی تے نکامی دا تعین کرنا آسان نہیں۔ کجھ چیزاں مثلاًمعیشت دا تے پچھلے سالاں توں موازنہ کر کے ایہہ کہیا جا سکدا اے کہ صوبہ پنجاب ترقی دی راہ اتے گامزن اے تے چودھری پرویزالٰہی دی سرپرستی وچ گڈ گورننس دے نال حکومتی اقدامات سرانجام دتے جا رہے نیں۔ سیلاب متاثرین وزیراعلیٰ پنجاب چودھری پرویزالٰہی دے شکر گزار نیں۔ اوہناں نے اوس اوکھے ویلے سیلاب متاثرین دا ساتھ دتا۔ مستقبل وچ سیلابی تباہ کاریاں توں بچائو لئی موثر حکمت علی وضع کیتی جا رہی اے جہدے وچ بھارت ولوں چھڈے جان والے پانی دی ویلے اتے اطلاع دے حوالے نال جدید ریڈار نظام دی تنصیب چھیتی کرن دی ہدایت کیتی گئی اے۔ جدید موسمیاتی ریڈار دی تنصیب لئی فزیبلٹی رپورٹ طلب کر لیتی گئی اے تے مستقبل وچ کوہ سلیمان دے ندی نالیاں وچ آن والی طغیانی توں بچائو دی لانگ ٹرم منصوبہ بندی کیتی جا رہی اے۔ خواہ اوہ حکومت ہووے یا عام آواز سب دی اک ای آواز اے کہ ساڈے ساریاں دا سفنا آفتاں توں محفوظ پنجاب اے۔