دوبارہ وزیراعظم بنیا تے بھارت ، امریکا نال چنگے تعلقات رکھاں گا، عمران خان

لہور(پنجابی میڈیا گروپ)پاکستان تحریک انصاف دے چیئر مین تے سابق وزیراعظم عمران خان نے آکھیا اے کہ اگر دوبارہ وزیراعظم بنیاں تے ساریاں ہمسایاں بشمول بھارت، افغانستان، ایران، چین تے امریکا دے نال چنگے تعلقات قائم کرن دی کوشش کراں گا۔ ڈیلی ٹیلی گراف دے نال خصوصی انٹرویو دے دوران پی ٹی آئی چیئرمین نے آکھیا کہ بھارت وچ جد تک بھارتیہ جنتا پارٹی اقتدار وچ رہے گی چنگے تعلقات ناممکن نیں لیکن بھارت نال بہتر تعلقات چاہندا ہاں۔ دوناں ملکاں دے وچکار بہتر تعلقات نال معاشی فائدئے حاصل ہو سکدے نیں،ایہ اوسی صورت ہوئے گا جد دوناں روایتی حریفاں دے اک دُوجے دے تجارتی تعلقات ہون گے۔اپنی گل جاری رکھدیاں ہویاں سابق وزیراعظم نے آکھیا کہ تجارت نال فائدے بوہت زیادہ ہون گے، مقبوضہ کشمیر اُتے بھارتی موقف بنیادی رکاوٹ اے۔کیونکہ بھارتی حکمران جماعت دا رویہ سخت گیر اے، بی جے پی قوم پرست جذبات بھڑکاندی اے، جس پاروں اوتھوں دے حالات قابو توں باہر ہو رہے نیں۔ اسیں کشمیر دا مسئلہ حل کرنا چاہندے ہاں، جس لئی روڈ میپ ہونا چاہیدا اے،ساہنوں ایہ قبول نہیں کہ کشمیریاں نوں حقوق نہ دتے جان ۔ بھارت نے جد مقبوضہ کشمیر دی خصوصی حیثیت ختم کیتی تے دوناں ملکاں دے وچکار تعلقات سرد مہری دا شکار ہو گئے۔