آرمی چیف دی تعیناتی لئی وزارت دفاع دی سمری وزیراعظم آفس گھل دتی گئی اے

اسلام آباد(پنجابی میڈیا گروپ)آرمی چیف دی تعیناتی لئی وزارت دفاع دی سمری وزیراعظم آفس وچ وصول کرلئی گئی۔ نجی ٹی وی دے مطابق وزارت دفاع دی سمری موصول ہون دے بعد وزیراعظم شہباز شریف دی زیر صدارت ہنگامی اجلاس ہویا جس وچ وزیر دفاع خواجہ آصف ،وزیر داخلہ رانا ثنا اللہ تے وزیر قنون سردار ایازصادق وی رَلتی ہوئے۔ذرائع دے مطابق وزیراعظم شہباز شریف دی زیر صدارت ہون والے اجلاس وچ نویں آرمی چیف دی تعیناتی لئی 5سینئر ترین ناماں اُتے سوچ وچار کیتا گیا،ذرائع دے مطابق وزارت دفاع ولوں وزیراعظم آفس نوں گھلے گئے5 ناماں وچ لیفٹیننٹ جنرل عاصم منیر، لیفٹیننٹ جنرل ساحر شمشاد مرزا، لیفٹیننٹ جنرل اظہر عباس، لیفٹیننٹ جنرل نعمان تے لیفٹیننٹ جنرل فیض حمید شامل نیں۔ذرائع دے مطابق وزیراعظم دی زیر صدارت ہون والے اجلاس وچ 2 ناماں اُتے سوچ وچارکیتا گیا، اک نام چیئرمین جوائنٹ چیفس آف آرمی اسٹاف تے دُوجا آرمی چیف لئی فائنل کیتا جائے گا، دونوں نام فائنل کرن دے بعد وزیر اعظم سمری صدر نوں گھلاں گے تے فیر صدر دی منظوری دے اگلے 3 سال لئی آرمی چیف تعینات ہو جائے گا۔وزیردفاع خواجہ آصف نے آکھیا اے کہ پاک فوج دے اعلی ترین عہدیاںاُتے تقرری دا عمل اج توں شروع ہوگیا اے۔وزیردفاع خواجہ آصف نے بیان وچ آکھیا کہ پاک فوج دے اعلی عہدیاںاُتے تقرری دا عمل آئینی تقاضیاں دے مطابق چھیتی مکمل ہوجائے گا۔ خواجہ آصف دا ہور کہنا سی کہ25 نومبر تک آرمی چیف دی تقرری دا عمل مکمل ہوجائے گا۔ سمری وچ جیہڑے5 یا 6 نام ہون گے تے ڈوزئیر وی اوہناں دے نال آن گے۔ آرمی چیف دی تقرری اُتے کوئی پریشر نہیں اے۔ وزیردفاع خواجہ آصف نے آکھیا اے کہ آرمی چیف دی تقرری بارے کسی نوں کوئی شبہ نہیں ہونا چاہیدا۔ اسلام آباد تے پنڈی اک پیج اُتے نیں تے اوہ آئین تے قنون دا پیج اے۔اپنے بیان وچ وزیردفاع خواجہ آصف نے آکھیا کہ ملک لئی ضروری اے کہ تقرری تے سیاست نوں وَکھ وَِکھ ہونا چاہیدا اے۔پارلیمنٹ ہائوس دے باہر صحافی نے استفسار کیتاکہ آرمی چیف دی تقرری اُتے کوئی ڈیڈلاک تے نہیں اے؟ ایس اُتے وفاقی وزیر نے جواب دتا کہ اگر تُسی ہوائیاں نہ چھڈدے پھرو تے اینج دی کوئی گل نہیں۔اوہناں نے آکھیاکہ ماضی دیاں تعیناتیاں تے اوس دے نتائج تریخ نیں، جس وچ اسیں سارے شیئر ہولڈر ہاں۔وزیر دفاع نے آکھیا کہ نویں آرمی چیف دی تعیناتی وزیراعظم دی صوابدید اے، ایس تقرری تے سیاست نوں وَکھ وِکھ ہونا چاہیدا اے،ملک لئی چنگا رہے گا۔صحافی نے خواجہ آصف توں سوال کیتا کہ کیا تعیناتی اُتے پنڈی تے حکومت اک پیج اُتے نیں؟ایس اُتے وفاقی وزیر نے جواب دتا کہ ایہ پیج نہ تہاڈا تے نہ میرا بلکہ ایہ پیج آئین تے قنون دا ات، جس اُتے اسیں سارے اکھٹے ہاں۔