فیفاورلڈ کپ اولمپکس مگروں کھیڈاں داسب توں وَڈامیلہ

22واں عالمی کپ فٹبال ٹورنامنٹ قطر وچ شروع ہو گیا اے۔ ایہہ پہلا موقع اے کہ ورلڈکپ مشرق وسطی وچ کھیڈیا جا رہیا اے جہدے وچ ورلڈکپ دے حصول لئی 32ٹیماں اک دُوجے دے آمنے سامنے نیں۔ فٹبال ورلڈکپ دے میچ قطر دے کل اٹھ سٹیڈیم وچ کھیڈے جان گے۔ ایہہ اولمپکس مگروں کھیڈاں دا سب توں وڈا میلہ اے جہدے وچ فرانس دی ٹیم اپنے اعزاز دا دفاع کرے گی۔ کروڑاں شائقین بے تابی نال سنسنی خیز مقابلیاں دا انتظار کر رہے نیں۔ ایس واری فیفا نے آفیشل گانا لائٹ دی سکائی ریلیز کر دتا اے۔ گانا انگریزی وچ اے لیکن ایہدے وچ عربی تے اردو دے بول وی شامل نیں۔ جو کجھ انج نیں۔
ہمیں کرنا ہے جو کریں گے’ ہم جیسا یہاں پہ کوئی نہیں
چاہے ایسٹ اور ویسٹ ہم ملیں گے یہیں
عالمی ماہراںوچ ایہہ قیاس آرائیاں ہونا شروع ہو گئیاں نیں کہ فیفا ورلڈکپ دے اختتام تے برازیل’ انگلینڈ’ فرانس تے ارجنٹائن وچوں کوئی اک عالمی کپ دا نواں فاتح ہووے گا۔ ہن تک ہون والے 21ورلڈکپ مقابلیاں وچ سب توں ودھ پنج ٹورنامنٹ نوں جتن دا اعزاز برازیل دی ٹیم نوں حاصل اے۔ ایس دے علاوہ برازیل دنیائے فٹبال دی اوہ کلی ٹیم اے جہنے ہر ورلڈکپ وچ رلت کیتی اے۔ ایس طرحاں برازیل دی ٹیم دا ایہہ 22واں ورلڈکپ اے جہدا اوہ حصہ بنی اے۔ بھلیکھا دے قارئین لئی 1930 توں لے کے 2018 تک ہون والے ورلڈکپ دی فاتح ٹیماں دا اک مختصر جائزہ پیش کیتا جا رہیا اے۔
پہلا ورلڈکپ1930:
پہلے ورلڈکپ فٹبال مقابلیاں دی میزبانی دا اعزاز یوروگوائے نوں حاصل ہویا جہدے وچ کل 13ملکاں دی ٹیماں نے حصہ لیتا۔ ایس ٹورنامنٹ وچ مجموعی طور تے 18میچاں وچ 70گول سکور ہوئے۔ فائنل یوروگوائے تے ارجنٹائن وچ کھیڈیا گیا جہڑا یوروگوائے نے دو دے مقابلے وچ چار گول نال جت کے ورلڈچیمپئن ہون دا اعزاز حاصل کیتا۔ ورلڈکپ وچ ارجنٹائن دے گوہر سواسٹیبل نوں سب توں ودھ 8 گول سکور کرن تے ٹورنامنٹ دا بہترین کھیڈاری قرار دتا گیا۔
دوجا ورلڈکپ 1934:
دوجا ورلڈکپ اٹلی وچ منعقد ہویا جہدے وچ کل سولہ ملکاں دی ٹیماں نے رلت کیتی۔ ایس ٹورنامنٹ وچ کل 17میچ کھیڈے گئے جہناں وچ 70گول سکور ہوئے۔ میزبان اٹلی نے چیکو سلواکیہ نوں دو گول نال شکست دے کے عالمی چیمپئن ہون دا اعزاز حاصل کیتا۔
تیجا ورلڈکپ1938:
تیجا ورلڈکپ فرانس وچ کھیڈیا گیا جہدے وچ پندرہ ملکاں دی ٹیماں نے حصہ لیتا۔ ایس ٹورنامنٹ وچ 18میچاں وچ 84گول سکور ہوئے۔ فائنل اٹلی تے ہنگری وچ کھیڈیا گیا جہدے وچ اٹلی نے ہنگری نوں 4-2 توں شکست دے کے مسلسل دوجی واری عالمی کپ دا ٹائٹل اپنے نام کیتا۔
چوتھا ورلڈکپ1950:
چوتھے عالمی کپ دے مقابلے برازیل وچ ہوئے جہدے وچ تیرہ ملکاں دی ٹیماں نے حصہ لیتا۔ ٹورنامنٹ دا فائنل برازیل تے یوروگوائے وچ کھیڈیا گیا جہدے وچ یوروگوئے نے دوجی واری عالمی چیمپئن ہون دا اعزاز حاصل کیتا۔ ایس ٹورنامنٹ وچ کل 22میچ کھیڈے گئے جہناں وچ 88گول ہوئے۔
پنجواں ورلڈکپ1954:
پنجواں ورلڈکپ پہلی واری سوئٹزرلینڈ وچ کھیڈیا گیا جہدے وچ13ملکاں دی ٹیماں نے رلت کیتی۔ ایس ٹورنامنٹ وچ 24میچ کھیڈے گئے جہناں وچ مجموعی طور تے 140 گول سکور ہوئے۔ فائنل وچ مغربی جرمنی نے ہنگری نوں 2دے مقابلے وچ تن گول توں ہرا کے پہلی واری ورلڈچیمپئن ہون دا اعزاز حاصل کیتا۔
چھیواں ورلڈکپ1958:
چھیویں ورلڈکپ دی میزبانی سویڈن دے حصے وچ آئی۔ ایس ٹورنامنٹ وچ 16ملکاں دی ٹیماں نے رلت کیتی جہناں نوں برابربرابر چار گروپاں وچ تقسیم کیتا گیا۔ ٹورنامنٹ دا فائنل میزبان سویڈن تے برازیل وچ کھیڈیا گیا جہدے وچ برازیل نے شاندار کھیل پیش کردیاں ہوئیاں پہلی واری فٹ بال دے عالمی چیمپئن ہون دا اعزاز حاصل کیتا۔
ستواں ورلڈکپ1962:
ایس ورلڈکپ دے مقابلیاں دی میزبانی دے فرائض چلی نے انجام دتے۔ ٹورنامنٹ دا فائنل برازیل تے چیکوسلواکیہ وچ کھیڈیا گیا جہدے وچ برازیل نے اک دے مقابلے وچ تن گول نال کامیابی حاصل کر کے مسلسل دوجی واری ورلڈکپ جتن دا اعزاز حاصل کیتا۔ ایس ٹورنامنٹ وچ 32میچ کھیڈے گئے جہناں وچ 39گول سکور ہوئے۔ ورلڈکپ دے ایہناں مقابلیاں وچ فٹ بال دے لکھاں شائقین برازیل دے عظیم کھیڈاری پیلے دے کھیڈ توں محروم رہے جہناں نوں زخمی ہون کارن مقابلیاں توں دستبردار ہونا پیا۔
اٹھواں ورلڈکپ1966:
ایہدا انعقاد لندن وچ ہویا جہدے وچ 16ٹیماں نے کوالیفائی کیتا۔فائنل میزبان ملک انگلستان تے مغربی جرمنی وچ کھیڈیا گیا جہدے وچ انگلستان نے 2دے مقابلے وچ 4گول توں فتح حاصل کر کے پہلی واری ورلڈکپ ٹورنامنٹ جتن دا اعزاز حاصل کیتا۔
نواں ورلڈکپ1970:
میکسیکو وچ کھیڈے گئے ایس ورلڈ کپ وچ شریک 32ملکاں دی ٹیماں وچ 32میچ کھیڈے گئے جہناں وچ 95گول سکور ہوئے۔ ایس ٹورنامنٹ دا فاتح اک واری فیر برازیل رہیا۔ جہنے فائنل وچ حریف ٹیم مغربی جرمنی نوں اک دے مقابلے وچ چار گول توں شکست دے کے تیجی واری عالمی چیمپئن بنن دا اعزاز حاصل کیتا۔ ایہدے وچ سب توں ودھ 10گول مغربی جرمنی دے گریلڈ مولر نے سکور کیتے۔
دسواں ورلڈکپ1974:
ایس واری ورلڈکپ دے مقابلے مونخ (مغربی جرمنی) وچ ہوئے جہدے وچ 16 ملکاں دی ٹیماں نے رلت کیتی۔ ایس ٹورنامنٹ وچ 38میچ کھیڈے گئے جہناں وچ 97گول سکور ہوئے۔ 1974 دا فائنل میزبان مغربی جرمنی تے ہالینڈ وچ کھیڈیا گیا جہدے وچ مغربی جرمنی دی ٹیم نے ہوم گرائونڈ تے کرائوڈ دا فیدہ چکدے ہوئے اک دے مقابلے وچ 2گول توں کامیابی حاصل کر کے ایہہ اعزاز دوجی واری اپنے نام کیتا۔
گیارہواں ورلڈکپ 1978:
1978دے ورلڈکپ دی میزبان تے فاتح ٹیم ارجنٹائن رہی۔ جہنے فائنل وچ ہالینڈ نوں اک دے مقابلے وچ 3گول توں زیر کر کے ورلڈکپ دا تاج اپنے سر اتے سجایا سی۔ ایس ٹورنامنٹ وچ 38 میچ کھیڈے گئے جہناں وچ102گول سکور ہوئے۔
بارہواں ورلڈکپ1982:
ایس واری ورلڈکپ دا میلہ سپین وچ سجایا گیا جہدے وچ 24ملکاں دی ٹیماں نے رلت کیتی۔ ٹورنامنٹ وچ کل 52میچ کھیڈے گئے جہناں وچ 142گول سکور ہوئے۔ فائنل اٹلی تے مغربی جرمنی وچ کھیڈیا گیا جہدے وچ اٹلی نے مغربی جرمنی نوں اک دے مقابلے وچ تن گول توں ہرا کے تیجی واری ٹائٹل اپنے نام کیتا۔
تیرہواں ورلڈکپ1986:
ورلڈکپ دی میزبانی دوجی واری میکسیکو دے حصے وچ آئی جہدے وچ 24ٹیماں وچ ورلڈکپ دے حصول لئی کانٹے دار مقابلے ہوئے۔ ٹورنامنٹ وچ ٹوٹل 52میچ کھیڈے گئے جہناں وچ 132گول سکور ہوئے۔ فائنل ارجنٹائن تے مغربی جرمنی وچ کھیڈیا گیا جہدے وچ ارجنٹائن نے مغربی جرمنی نوں دو دے مقابلے وچ تن گول توں شکست دے کے دوجی واری عالمی چیمپئن ہون دا اعزاز حاصل کیتا۔ ایس ٹورنامنٹ وچ ارجنٹائن دے سٹار فٹبالر ڈیگومیرا ڈونا دا شاندار کھیڈ فٹبال دے کروڑاں شائقین سالاں فراموش نہ کر پان گے۔
چودھواں ورلڈکپ1990:
8 جون نوں اٹلی دے شہر میلان وچ شروع ہون والے دنیا دے سب توں وڈے فٹبال میلے وچ 24ملکاں دی ٹیماں نے حصہ لیتا۔ ایس عالمی کپ وچ مغربی جرمنی نے ارجنٹائن نوں دلچسپ مقابلے مگروں اک گول توں شکست دے کے تیجی واری عالمی چیمپئن ہون دا اعزاز حاصل کیتا سی۔ ایس ٹورنامنٹ وچ 104میچ کھیڈے جہناں وچ مجموعی طور تے 115گول سکور ہوئے سن۔
پندرھواں ورلڈکپ1994:
ایہہ ٹورنامنٹ امریکہ دے 9شہراں وچ 17جون توں 17جولائی تک کھیڈیا گیا۔ ایہہ پہلا موقع سی جدوں فٹبال دے مقابلے امریکہ وچ منعقد ہوئے۔ ایس ٹورنامنٹ وچ 24ملکاں دی ٹیماں نے حصہ لیتا۔ اک مہینے تک جاری رہن والے ایس عالمی کپ وچ پینلٹی ککس دی بنیاد اتے برازیل نے اٹلی نوں 2دے مقابلے وچ 3گول توں شکست دے کے 24سال مگروں اک واری فیر عالمی چیمپئن بنن دا اعزاز حاصل کیتا۔
سولہواں ورلڈکپ 1998:
ایہہ فرانس دے دس شہراں وچ کھیڈیا گیا۔ فرانس عالمی کپ دی دوبارہ میزبانی کرن والا تیجا ملک اے۔ ایس ٹورنامنٹ دے فائنل وچ فرانس دی ٹیم نے حیرت انگیز طور تے چار واری عالمی کپ جتن والی دفاعی چیمپئن برازیل نوں صفر دے مقابلے وچ 3گول توں ہرا کے پہلی واری عالمی چیمپئن ہون دا اعزاز حاصل کیتا سی۔ورلڈکپ وچ مجموعی طور تے 64 میچ کھیڈے گئے جہناں وچ 171گول ہوئے۔فرانس نے ایس ٹورنامنٹ وچ اپنے سارے میچاں وچ کامیابی حاصل کیتی۔ اوہنے 15گول سکور کیتے جد کہ ا وہدے خلاف صرف دو گول سکور ہوئے۔ ایس کپ وچ گولڈن گول دا اصول متعارف کروایا گیا۔ فرانس دے کھیڈاری اورنٹ بلینک نے عالمی کپ دی تریخ وچ پہلا گولڈن گول کرن دا اعزاز حاصل کیتا۔
سترہواں عالمی کپ2002:
نویں صدی دا پہلا فٹبال ورلڈپ پہلی واری ایشیا وچ منعقد ہویا۔ جاپان تے جنوبی کوریا نے رل کے میزبانی دے فرائض سرانجام دتے۔ ایس ٹورنامنٹ دے فائنل وچ برازیل نے جرمنی نوں 2-0 توں شکست دے کے ایہہ ٹائل سب توں ودھ پنجویں واری اپنے نام کر لیتا۔ 17ویں ورلڈکپ وچ 32ٹیماں نے رلت کردیاں ہویاں 64 میچاں وچ 161گول کیتے۔
اٹھارھواں ورلڈکپ 2006:
اٹھارھواں ورلڈکپ جرمنی وچ کھیڈیاگیا جہدے وچ شریک 32ملکاں نوں اٹھ گروپاں وچ تقسیم کیتا گیا سی۔ 64ٹیماں وچ 147گول ہوئے۔ پنج واری ورلڈکپ جتن والی برازیل دی ٹیم ایس واری اپنے اعزاز دا دفاع کرن وچ بری طرح نکام رہی۔ ایس ٹورنامنٹ وچ اٹلی نوں دوبارہ فٹبال دی بادشاہت 24سال مگروں ملی۔ اوہنے فائنل وچ فرانس نوں پینلٹی ککس اتے 5-3 توں ہرا کے عالمی کپ فٹبال ٹورنامنٹ چوتھی واری جت لیتا۔ برازیل دے کھیڈاری رونالڈو 15مجموعی گولاں دے نال ورلڈکپ دے آل ٹائم ٹاپ سکورر بن گئے جد کہ فرانس دے پچھلے کپتان زیڈان نوں پلیئر آف دی ٹورنامنٹ اور گولڈن بال ایوارڈ لئی منتخب کیتا گیا سی۔
انیوواں ورلڈ کپ: 2010 :
2010وچ 11 جون توں 11جولائی تک جنوبی افریقہ وچ کھیلیا گیا، فٹ بال دی تاریخ وچ ایہہ پہلا موقع سی کہ اک افریق ملک جنوبی افریقہ نوں فٹ بال ورلڈ کپ دی میزبانی دا موقع ملیا۔ اس ٹورنامنٹ وچ دنیا بھر توں 32 ملکاں دی ٹیماں نے حصہ لیا۔ ٹورنامنٹ وچ 64 میچ کھیڈے گئے جنھاں وچ 145 گول سکور ہوئے۔ جنوبی افریقہ وچ کھیلے جان والے ایس ٹورنامنٹ وچ اسپین نے جرمنی نوں شکست دے کے پہلی واری عالمی چیمپئین بنن دا اعزاز حاصل کیتا۔۔ اِنج سپین یورپ سر زمین یورپی زمین توں باہر عالمی کپ جتن والی پہلی یورپی ٹیم بن گئی۔
20 واں ورلڈ کپ 2014 :
2014وچ ایہہ ٹورنامنٹ بازیل دے 12 شہراں وچ کھیلیا گیا۔ برزایل نے دوجے واری 60 سال بعد میزبانی دا شرف حاصل کیتا۔ ایس ٹورنامنٹ وچ جرمنی نے انتہائی سنسنی خیز تے دلچسپ مقابلے دے بعد ارجنٹائن نوں ہرا کے چوتھی واری ورلڈ چیمپئن ہون دا اعزا حاصل کیتا۔
21 واں ورلڈ کپ2018 :
ہُن تک دا آخری فیفا فٹ بال ورلڈ کپ روس وچ کھیلیا گیا۔ ایس میگا ایونٹ وچ 32 ٹیماں نے حصہ لیا جنھاں نوں چار چار دے اٹھ گروپاں وچ تقسیم کیتا گیا۔ فیفا ورلڈ کپ دے فائنل وچ فران نے کروشیا نوں4-2 نال شکست دے کے 20 سال بعد دوسری وار فٹ بال دی سلطنت دا حکمران بن گیا۔ ورلڈ کپ 2018 وچ سب توں زیادہ 6 گول انگلینڈ دے ہیری کین نوں گولڈن بوٹ دے اعزاز نال نوازیا گیا جد کہ کروشیا دے کپتان لوکا مارڈ رچ نوں اوہناں دے بہترین کارکردگی اُتے ٹورنامنٹ دا بہترین کھلاڑی قرار دِتا گیا۔