مولا جٹ ان لکھنو تے لانگ مارچ

ساڈے ایتھے اک نہیں بہت ساریاں خبراں ٹاک آف دا ٹائون تے ٹاک آف دا ڈے ہوندیاں نیں۔ ایہناں وچوں اک آرمی چیف دی تقرری اے۔ جنرل قمر جاویدباجوہ نے بتیری واری ہور توسیع نہ لین دی گل کیتی پر کئی لوک تواتر دے نال توسیع دی گل کردے رہے۔ ہن اوہناں ولوں الوداعی ملاقاتاں تے فارمیشنز دے دورے شروع ہوئے نیں تے افواہواں وچ کمی آئی اے پر کجھ لوک ہن وی پرانی ڈفلی تے پرانا ناچ جاری رکھے ہوئے نیں۔ وزیراعظم شہبازشریف نے نویں آرمی چیف دی تقرری تے مشاورت لئی لندن گئے۔ لمیاں ملاقاتاں تے مشاورت ہوئی۔ میڈیا وچ رپورٹ ہویا کہ تقرری میرٹ تے سنیارٹی دی بنیاد تے ہووے گی۔ نومبر دے آخر وچ دو تقرریاں ہونیاں نیں اک آرمی چیف تے دوجی جوائنٹ سروسز چیف دی۔ جوائنٹ سروسز چیف جنرل ندیم رضا 27 نومبر نوں ریٹائر ہو رہے نیں۔ جے سنیارٹی دی گل کیتی جاوے تے ایئرچیف مارشل ظہیراحمد بابر سب توں سنیئر نیں۔ اودھر عمران خان دا لانگ مارچ فیر توں پہلے وانگوں ہائوس فل رش لے رہیا اے۔ قافلے کئی تھاواں توں چل رہے نیں۔ وڈا قافلہ جی ٹی روڈ تے اے۔ اسلام آباد تحریک انصاف نوں بند کرن دی لوڑ نہیں اوہ حکومت نے کنٹینر لا کے ہن توں ای بند کر دتا اے۔ رانا ثناء اللہ دل دی تکلیف پاروں ہسپتال داخل رہے۔ لانگ مرچ دے مقابلے لئی حکومت اوہناں نوں استعمال کر رہی اے۔ لانگ مارچ دا مقابلہ کوئی دست بدست نہیں کردا بس ہوش وچ ہونا ضروری اے۔ انج جس طرح لانگ مارچ اے اوہنے وڈے وڈیاں دے ہوش اڑا دتے نیں۔ رانا ثناء اللہ کدھرے دل تے نہیں لے گئے۔
عمران خان دی حکمت عملی ہن تے کامیاب تے لاجواب رہی اے۔ اوہ ایس طرح دے فیصلے کر رہے نیں کہ ماردے گھٹ نیں دھروندے زیادہ نیں۔ بڑھک بازی دوہاں پاسیوں ہو رہی اے۔ اڑا دیاں گے’ الٹا دیاں گے’ طوفان مچا دیاں گے۔ اجہے رویاں دا اظہار دوہاں پاسیوں ہو رہیا اے۔ لانگ مارچ’ احتجاج تے مظاہرے ہر کسے دا قنونی حق اے پر ایس شرط دے نال کہ پرامن ہون گے۔ رانا ثناء اللہ نے بھاویں احکامات لکھ کے دتے نیں کجھ زبانی وی کہن گے پر او ہ ہن جوش خطابت دا مظاہرہ کرن توں کجھ دیہاڑ قاصر رہن گے۔ پی ٹی آئی دے کجھ لیڈر بڑھکاں جاری رکھن گے۔ جواب وچ مسلم لیگ (ن)’ پیپلزپارٹی تے پی ڈی ایم دی کئی جماعتاں دے لیڈر وی جواب آں غزل دین توں غفلت نہیں کرن گے۔ بڑھکاں دی گل کریئے تے مرحوم سلطان راہی دی یاد آ جاندی اے نال ای اوہناں دی شہرہ آفاق فلم مولا جٹ وی تے اوہدے کردار وی اکھاں دے سامنے گھم جاندے نیں۔ اج مولاجٹ دی لیجنڈ آف مولاجٹ دے ناں توں ریلیز ہوئی اے جنہے ریکارڈ بزنس کیتا اے۔ پاکستان وچ ای نہیں پوری دنیا وچ۔ فلم پنجابی جد کہ سارے اداکار اجہے نیں جو پنجابی توں ناواقف نیں۔ اوہناں دا لب و لہجہ اردو والا اے نہ ڈیل ڈول روایتی پنجابیاں ورگا اے۔ پنجاب دا کلچر وی نہیں وکھایا گیا۔ فلم پنجابی اے کلچر کسے ہور علاقے دا۔ ڈاکو سندھ وچ کچے دے وکھائے گئے نیں جد کہ پنجابی سورمیاں نال اوہناں دی مشابہت وی نہیں بن دی۔ فلم ہٹ ایس لئی ہو گئی کہ اج دی نوجوان نسل ویکھ رہی جنہے مولاجٹ نہیں سی ویکھی جنہے مولاجٹ ویکھی اے اوہنوں دوہاں فلماں وچ فرق نمایاں طور تے نظر آندا اے۔ ایہدے وچ جس طرح پنجابی بولی گئی اے ایس فلم دا ناں مولاجٹ ان لکھنو ہوندا تے زیادہ مناسب رہندا۔ ایس فلم دا اک کردار ماکھا اے۔ اوہ کدھروں وی ماکھا نظر نہیں آندا’ کتھے ماکھا تے کتھے مکھی۔ ایس ماکھے دی اوہو حیثیت اے جو وزیرآباد توں پھڑے جان والے حملہ آور دی اے۔ عمران خان تے جنہے حملہ کیتا اوہنوں مذہبی جنونی کہیا جا رہیا سی۔ اوہ کدھروں وی مذہبی جنونی نہیں لگدا۔ حلیے تے چہرے مہرے تو ںاوہ چرسی تے نشئی نظر آندا اے۔
دوستو! پنجاب تے پنجابی ثقافت تے پہلے وی غیرملکی طالع آزماواں نے حملے کیتے تے کئی صدیاں تک ایسے طرح پنجاب دا استحصال ہوندا رہیا۔ فیر 1947ء وچ تقسیم ہندوستان دوران سب توں ودھ جانی’ مالی تے جغرافیائی نقصان پنجاب دا ای ہویا تے اوس زمانے وچ تقریباً پنجاہ لکھ پنجابیاں نوں آپس وچ لڑا کے موت دی نیندر سلا دتا گیا۔ میں ایہ فلم مولاجٹ دوران تعلیم 1981ء وچ ویکھی سی بے شک ایہ فلم وی پنجاب دی ثقافت دی ترجمانی نہیں کردی پر ایہدے وچ کم کرن والے فنکاراں نے اپنے مخصوص پنجابی لہجے نال تے مضبوط ڈائیلاگ دی وجہ نال لوکاں دے ذہناں تے نقش چھڈے۔ ایہو وجہ اے کہ اج مولاجٹ دا اک چربہ ریلیز کیتا گیا جہدے وچ کدھرے وی پنجابی لباس’ پنجابی چہرے’ پنجابی تلفظ حالاں کہ اوس پرانے دور وچ وی پنجابی ڈھابہ ریسٹورنٹس وکھائے گئے تے اوہناں تے شراب انج فروخت تے پیش کیتی جا رہی سی جیویں اسیں پنجاب دے کسے پنڈ وچ نہیں سگوں ٹیکساس دے کسے پنڈ وچ کائوبوائے فلم دی شوٹنگ ویکھ رہے آں؟ جد کہ اصل وچ ایہ دھرتی میاں محمدبخش، بابا فرید، بلھے شاہ ورگے صوفیاء دی دھرتی اے۔٭