تسیں چور اسیں بدتمیز…

کیہ سچا اعتراف، کیسی کھری گل تے کیہ تخلیقی جملہ… مدت توں سیاسی سچ نہیں سی سنیا سیاستداناں تے چوری’ ڈاکہ دے الزام لگدے تے اوہ صفائی پیش کرن دی تھاں جوابی چوری ڈاکہ فہرست سنا دیندے ہر ویلے اپنے لیڈراں دیاں کرتوتاں تے پردے پان’ ڈھلی ڈھالی دلیلاں دین تے جھوٹ بولن توں سوا ہے وی کیہ سی…
اجہے حالات وچ میاں نوازشریف دے مشہور محل ”ایون فیلڈ” دے باہر زندگی حرام کرن والیاں نے جو ڈیرہ جما رکھیا اے ہر آندے جاندے ”راہی” تے وسنیکاں نوں لقمہ حرام دی طعنہ زنی کردے رہندے نیں ایہ وی سچ اے ایہ لوک آپ وی وطن پرست تے قناعت پسند نہیں سن تے وطن دی مٹی گھٹا بھکھ ننگ تے لوڈشیڈنگ توں جان چھڑان لئی امیرملکاں وچ نس گئے تے ہن اپنے ورگے ای ذہن رکھن والے سیاستداناں نوں طعنے مار رہے نیں اوہناں دے خیال وچ چھوٹا چور وڈے چور توں گھٹ گنہگار ہوندا اے یعنی گھڑی چوری کرنا ملکی دولت چران توں گھٹ جرم اے پر گھڑیاں جے سرکاری ہون تے ہور گل اے غلطی نال وی انج ہو جاندا اے کوئی شوقیہ گھڑی نہیں چوری کردا چوری چوری وچ فرق ہوندا ریشماں یاد آ گئی…
”وے میں چوری چوری تیرے نال لالئیاں اکھاں وے”
فیر گھڑی کدوں بری گھڑی وچ بدل جاوے کیہ پتہ… انج وی
آندیاں نصیباں نال اے گھڑیاں
تیرے سہرے نوں سجایا لکھاں پھل کلیاں
کافی دیر توں کسے لیڈر دے سہرے دے پھُل نہیں کھڑے یاں سانوں پتہ نہیں لگا شہبازشریف تے خان توں اجے وی امیداں نیں نوازشریف اکلے ایون فیلڈ دی کھڑکی وچ بہہ کے رفیع دے گیت گاندے ہون گے یاں خان نوں… خیرایون فیلڈ دے سامنے براجمان ٹولے نے جیویں ای نوازشریف دے وڈے پُتر حسین نواز نوں گیٹ تے آندے ویکھیا تے راگ شروع کر دتا گونگو، گونگو، چور، وغیرہ وغیرہ حسین نواز جو بٹن دبا کے سٹائلش گیٹ دا بوہا کھول رہے سن بھنا گئے تے شرم تے غیرت دوان لگے تماشائی ہور بھڑکے تے گونگو چور ڈاکو پکارن لگے جواب آیا شرم نہیں آندی بدتمیزو! نعرے باز فوری بولے ”تسیں چور اسیں بدتمیز”۔پچھلی دہائی دا شاید ایہ سب توں وڈا محاورہ سی چوری تے بدتمیزی دا وکھرا وکھرا تجزیہ کرنے آں اسیں چوری سمجھنے آں اوہ تے بھرم’ ایمان’ وعدہ’ دعویٰ تے رازداری دے اخفاء ہون تک اے اک خاص اعتماد جو ٹُٹ جاندا اے چور دل دا گھر لٹ لے کے جاندا اے جو مادی چیزاں دے مقابلے وچ بہت ای وڈا نقصان اے انسان نہ لہو دے رشتیاں تے نہ انتخاب دے رشتیاں تے سوفیصد مطمئن رہندا اے۔ شاعری تے فلماں وچ چوری دی سب توں چنگی قسم یعنی دل دا چوری ہونا کہندے نیں جدوں اسیں بیٹھے بٹھائے رہنے آں تے دل سینے چوںہجرت کر جاندا اے۔ بہرحال ساڈے ایتھے طبی چوریاں تے نظر مارو تے دل’ جگر’ پھیپھڑے’ گردے سب ای چوری ہو جاندے نیں تے جاندے ہوئے چور ایہناں اعضاواں دے پیسے وی دے کے جاندے نیں۔ وڈے وڈے ڈاکٹر ایہ چوریاں کردے نیں۔
ہن آ جانے آں بدتمیز’ بدتہذیب’ بداطوار’ بے ترتیب’ بے پیرے’ بے مروت تے بدکردار لوکاں ول’ لوکاں نے بدکرداری نوں کسے مخصوص ایکٹ نال جوڑ رکھیا اے حالاں کہ بدتمیزی آخری درجے دی برائی اے ایہ لوک والدین توں شروع ہوندے نیں تے گلی کوچہ کراس کردے ہوئے کوٹھے تے چڑھ جاندے نیں نہیں تے ٹرالے تے چڑھ جاندے نیں۔ منہ پھٹ لوک اپنی بدتمیزی دا دفاع ”منہ تے سچ مارن” ورگی گھٹیا صفت توں کردے نیں دل دکھان نوں سچ بولنا کہندے نیں… میں بہت ساریاں عورتاں نوں ایس مرض وچ مبتلا ویکھیا اے کہ مرد تے گالھاں کڈھن نوں انج وی مردانگی دی نشانی سمجھدے نیں تے لنگوٹیا دوستی یاری دی تے تکمیل ای گالھاں دے بناں نہیں ہوندی۔ مرداں دی بدتمیزی عورتاں دی بدتمیزی توں وکھری ہوندی اے عورتاں رشتیاں دے اندر ایس صفت دا زیادہ مظاہرہ کردیاں نیں بدتمیز توں بدتمیز عورت وی سڑک تے چپ چاپ چلدی اے۔ پچھلی دہائیاں توں مرد بنیان’ نیکر یاں دھوتی پا کے چوک وچ کھڑے گلا پھاڑ کے بدتمیزی دا مظاہرہ کر رہے ہوندے نیں کہ لباس دی معاونت وی ضروری اے۔
لوکاں دے بوہے تے آزادی اظہار اوہ کردے نیں جہناں نوں اجتماعیت دی صورت لکھن دا فن نہیں آندا تے اوہ برائی نوں اک تہذیبی فعل سمجھ کے اوہدے خاتمے تے یقین نہیں رکھدے ایہ لوک وی دوجی قسم دے کرپٹ ہوندے نیں صرف کیمرے دے سامنے آن لئی رولا پاندے نیں تے دیارغیر دی سرد ترین موت ورگی چپ تے بوریت چوں نکلن دی کوشش کردے نیں۔ قسطاں والے چھوٹے جہے فلیٹ’ بھانڈے کپڑے دھون دی اذیت ڈپریشن دیاں گولیاں تے اکلاپا ایہناں دا نصیب نیں ایہ لوک پاکستان نوں بدنام کرن والے سیاستداناں دا بہترین آلہ کار ہوندے نیں۔ اپنے آپ نوں سیاسی طور تے باشعور ثابت کرن لئی بدتمیزی دا سہارا لیندے نیں۔ رہ گئے نوازشریف تے اوہناں نوں کسے لاگے بستی دے فارم ہائوس وچ رہنا چاہیدا اے ہن تک تے اوہناں نوں ایہناں فلیٹاں توں نفرت ہو جانی چاہیدی اے جو اوہناں نے اپنی نسلاں لئی بنائے تے اپنا سیاسی کیریئر خراب کیتا۔ حیرت ایہ کہ ایہناں فلیٹاں وچ سارا (ن) لیگ خاندان رہندا اے پر مالکانہ حیثیت نوں منن لئی کوئی تیار نہیں پتہ نہیں ایہ فلیٹ کہدے نیں جہناں وچ میاں برادری رہندی اے۔ نوازشریف توں تے ودھ اک سکول دا ماسٹر خوش قسمت اے جدوں اپنے چھوٹے جہے گھر دے بوہے چوں نکلدا اے تے دس لوک اوہنوں عزت نال سلام کردے نیں تے ایس سلام دعا عزت لئی تے اسیں گھر بنانے آں۔ رہ گئی بدتمیزی دی مہین قسم تے ساڈے ورگے نازک مزاج لئی ایناں ای کافی ہوندا اے۔٭