صہیونیت دے زیراثر اسرائیل

امریکی اخبار واشنگٹن پوسٹ دی اک خبر وچ دسیا گیا اے کہ 60 اسرائیلی فوجیاں نے مغربی کنڈھے تے غزہ دی پٹی وچ فوجی خدمات نبھان توں انکار کر دتا اے۔ اوہناں نے اک پٹیشن تیار کیتی اے جہدے وچ وجہ ایہ بیان کیتی گئی اے کہ اسرائیلی فوج فلسطینی لوکاں نال زیادتیاں تے توہین آمیز سلوک کر رہی اے۔ اخبار دے مطابق ستمبر 2013ء وچ فلسطینیاں دی تحریک انتفادہ دوبارہ شروع ہون دے بعد توں ہن تک 600 اسرائیلی فوجی فلسطینی علاقیاں وچ جان توں انکار کر چکے نیں جد کہ اوہناں وچوں 40 فوجیاں نوں سزا وی دتی گئی اے۔
میرے حساب نال یہودی ریاست اسرائیل وچ مذہبی عقائد دے حامل یہودیاں تے صیہونی سیاست دے حامل بندیاں وچ عرباں نال تعلقات دے مسئلے تے سخت نظریاتی اختلاف اے۔ مذہبی عقائد دے حامل یہودیاں دا کہنا اے کہ فلسطینیاں دے نال جو ناانصافیاں ہو رہیاں نیں تے اوہناں تے جو ظلم ڈھائے جا رہے نیں اوہ بالکل وی مناسب نہیں۔ کثیر عرب آبادی دے وچکار رہ کے اوہناں نوں اپنا مخالف بنا لینا ٹھیک نہیں اوہناں دا ایہ کہنا وی معقولیت تے مبنی اے کہ عرب ہمیشہ کمزور تے باہمی اختلافات دا شکار نہیں رہن گے جے اوہ اکمٹھ تے مضبوط ہو گئے تے اسرائیل دا کیہ حشر ہووے گا؟ پر صیہونی سیاست دے زیراثر جہناں دے کول فوجی قوت تے حکومت اے مذہبی عقائد دے حامل یہودیاں دی آواز موثر نہیں’ ایہدے باوجود مذہبی عقائد دے حامل یہودی (تے ہن فوجی جوان وی) اپنیاں کوششاں جاری رکھے ہوئے نیں۔ ایتھوں تک کہ فلسطینیاں دی تائید وچ جو جلوس کڈھے جاندے نیں اوہناں وچ یہودی مذہبی رہنما (ربی) وی شریک ہوئے نیں جو سمجھدے نیں کہ صیہونیت نہ صرف اسرائیل سگوں یہودیاں لئی وی خطرناک اے۔ ایہ حقیقت اے کہ صیہونی سخت نسل پرست نیں دنیا دی غیر یہودی آبادی توں اوہناں نوں ذرا برابر وی ہمدردی نہیں۔ امریکی تے عرب اوہناں دی نظراں وچ برابر نیں۔ باراں سو ورھے دی تریخ وچ ایس قوم تے ہر ملک نے یہودیاں دے نال ناانصافیاں کیتیاں تے اوہناں تے ظلم دے پہاڑ توڑے گئے۔ مسلماناں دی پوری تریخ وچ کسے وقت وی یہودیاں دے نال کوئی وی ناانصافی نہیں ہوئی تے نہ کدی یہودیاں نوں شکایت دا موقع ملیا۔ جدوں وی کسے ملک وچ خاص کر عیسائی مملکت وچ اوہناں دے نال ناانصافیاں حد توں ودھ جاندیاں تے اوہ اسلامی ملکاں تے شہراں وچ پناہ لیندے۔ اج اپنے اغراض دے تحت اوہناں نے امریکہ دی پشت پناہی حاصل کیتی اے پر ایہ ضروری نہیں کہ اوہ دلوں اوہناں دے دوست ہون۔ صیہونی لابی ایہ جان دی اے کہ اوہ اکلے عرباں دا مقابلہ نہیں کر سکدے تے عرباں دے ودھدے ہوئے جذبات تے عالم اسلام دی صیہونیت نال ودھدی ہوئی نفرت دی تاب نہیں لا سکدے۔ ایس لئی امریکہ ورگی سپر پاور دی بھرویں تائید حاصل کرنا اوہناں لئی بہوں ضروری اے۔
صیہونی ادارے ایہ وی جان دے تے مندے نیں کہ دنیا وچ مسلماناں دی گنتی جس تیزی نال ودھ رہی اے اوہدے توں دگنی تیزی نال اوہ اوہناں دی نفرت دا شکار ہو رہے نیں صرف مقبوضہ فلسطین وچ آبادی دی شرح تقریباً پنج فیصد اے۔ آبادی وچ وادھے دی رفتار جے انج ای رہی تے 2026ء وچ مقبوضہ فلسطین دی آبادی وچ فلسطینیاں دی آبادی دا تناسب 58فیصد ہو جاوے گا۔ ایس گل دا انکشاف اسرائیلی یونیورسٹی دے اک سروے وچ کیتا گیا اے۔ ایسے رپورٹ دے مطابق مقبوضہ فلسطین دی سرزمین تے فلسطینیاں دی آبادی 18ورھے وچ 18 لکھ توں ودھ کے 28 لکھ ہو جاوے گی جد کہ مغربی کنارہ تے غزہ پٹی وچ اوہناںدی آبادی 36 لکھ توں ودھ کے 58 لکھ ہو جاوے گی۔ ایس سروے دی وجہ نال جتھے اک پاسے اسرائیل دی صیہونی لابی مستقبل وچ فلسطین دی آبادیاتی بمب توں ڈاڈھا خطرہ محسوس کر رہی اے اوتھے یورپ وچ یہودیاں دی گنتی وچ کمی تے مسلماناں دی گنتی وچ غیرمعمولی وادھے پاروں یورپ دے یہودیاں وچ وی چنتا دی لہر دوڑ گئی اے اوہناں نوں خطرہ لگ گیا اے کہ مغربی یورپ وچ آ بادی وچ ہون والا ڈھیر وادھا آبادیاتی تبدیلی دے منفی اثرات تے خطرناک نتیجے اوتھوں دے یہودی باشندیاں تے ضرور مرتب ہون گے۔ مسلماناں دی ودھدی ہوئی گنتی توں گھابر کے بین الاقوامی یہودی کانگریس نے اپنی اک رپورٹ وچ یورپ وچ اسلام دا فروغ دے ناں توں اک سروے کیتا اے۔ ایس رپورٹ وچ یہودی کانگریس نے لکھیا اے کہ ویہویں صدی دے آخری دہائیاں وچ یورپ وچ مسلماناں دے حوالے نال غیرمعمولی آبادی انقلاب رونما ہویا اے۔ ایس رپورٹ وچ اگے چل کے کہیا گیا اے کہ اج کل یورپ وچ مذہب اسلام نوں زبردست فروغ حاصل ہو رہیا اے ایس لئی ایتھے یورپی یونین وچ شامل ملکاں وچ دو کروڑ بندے اجہے نیں جو اپنے آپ نوں مسلمان سمجھدے نیں۔ رپورٹ وچ کہیا گیا اے کہ حالیہ عرصے وچ یورپ دے مسلمان قابل لحاظ حد تک سیاسی طاقت دی نمائندگی کر رہے نیں۔ جے مستحکم سیاسی نمائندگی دا ایہو رجحان رہیا تے 2030ء وچ یورپ دی عام آبادی وچ اوہناں دی شرح دا تناسب 16فیصد ہووے گا۔ یورپی ملکاں وچ مسلماناں دی ودھدی ہوئی گنتی توں لگن والے خطرے دے ثبوت وچ یہودی عالمی کانگریس نے دو مثالاں پیش کیتیاں نیں۔ پہلی مثال برطانیہ دی اے’ رپورٹ دے مطابق برطانیہ وچ 1961ء وچ مسلماناں دی گنتی 82 ہزار سی تے ہن 56 لکھ توں وی ودھ اے۔ دوجی مثال فرانس دی اے۔ رپورٹ دے مطابق فرانس وچ ایس ویلے قنونی طور تے رہن والے مسلماناں دی گنتی 68 لکھ اے جد کہ غیرقنونی طور تے لکھاں تارکین وطن مقیم نیں۔٭