عمران خان اسمبلیاں توڑن دا آکھن گے تے اک منٹ وی نہیں لاواں گا،پرویز الٰہی

لہور(پنجابی میڈیا)وزیراعلی پنجاب نے آکھیا اے کہ صوبے دی حکومت عمران خان دی امانت اے جَد اوہ آکھن گے تے اسمبلی توڑن وچ اک منٹ وی لواں گے۔ لہوروچ میڈیا نال گل بات کر دیاں ہویاں وزیراعلی پنجاب نے آکھیا کہ اسیں خاندانی لوگ ہاں، جس نال چلدے ہاں اوس دا ساتھ نہیں چھڈ دے،عمران خان اسمبلیاں توڑن دا آکھن گے تے اک منٹ وی نہیں لاواں گے۔ اوہناں نے آکھیا کہ اللہ نے عمران خان نوں نویں زندگی دتی تے پنڈی جلسے وچ چیئرمین پی ٹی آئی دی سیاسی حکمت عملی فیصلہ کن مرحلے وچ داخل ہوگئی اے، عوام داٹھاٹھاں ماردا سمندر عمران خان دی مقبولیت دا منہ بولدا ثبوت اے ۔چوہدری پرویز الٰہی نے آکھیا کہ صوبائی اسمبلیاں دے استعفے آندیاں ہی پی ڈی ایم دا جعلی اتحاد وی انتشار دی شکل اختیار کرجائے گا، جدوں استعفے دیاں گے تے شہباز شریف دی27 کلومیٹر دی حکومت 27 گھنٹے وی نہیں چل سکے گی۔ اوہناں نے ہور آکھیا کہ ن لیگ والے شعبدہ باز جھوٹ بولن توں باز ہی نہیں آرہے، تہانوں سمجھ لگ جائے گی تہاڈے نال الیکشن وچ اوہ کجھ ہوئے گا کہ تہاڈیاںنسلاں وی یاد رکھن گیاں، ایس ملک وچ دین دی حکمرانی ہوئے گی تے اینج دے کم ہون گے جس نال عام تے غریب آدمی تے اوہناں دے بالاں نوں فائدہ ہوئے گا۔وزیراعلی پنجاب نے آکھیا کہ مذہبی حکمرانی دی ابتدا پنجاب توں ہو چُکی اے کینسرداعلاج وی انشا اللہ فری ہوئے گا:انشا اللہ روز اک نویں چیز نظر آئے گی جس دا فائدہ عام آدمی غریب آدمی نوں ہوئے گا۔