فوج غیرسیاسی رہن دے فیصلے اُتے ثابت قدم رہے گی،آرمی چیف

دبئی/پنڈی(پنجابی میڈیا گروپ)آرمی چیف جنرل قمر جاوید باجوہ نے آکھیا اے کہ افواج پاکستان پروپیگنڈے تے جھوٹے بیانیے دے باوجود غیر سیاسی رہن دے فیصلے اُتے ثابت قدم رہے گی،افواج پاکستان نے اندرونی خلفشار اُتے قابو پان وچ ہمیشہ کردار ادا کیتا افواج پاکستان نے بذریعہ عسکری سفارتکاری عالمی سیاست وچ توازن قائم رکھیا ، فوج دے غیرسیاسی ہون اُتے کجھ بندیاں نے ہدف تنقید بنایا،فوج دے غیر سیاسی ہون نال جمہوری اقدار پروان چڑھے گا تے پاکستان وچ سیاسی استحکام نوں ودھا ملے گا ، فوج دے غیرسیاسی ہون نال فوج دے عوام نال تعلقات مضبوط ہون گے، پاکستان نے ہمیشہ اپنے مشرق وسطیٰ دے دوستاںدے مفاداں دی حمایت کیتی اے تے مستقبل وچ وی کردا رہے گا ۔آرمی چیف جنرل قمر جاوید باجوہ نے غیر ملکی میڈیا نوں دتے گئے انٹرویو وچ آکھیا کہ پاک فوج دا ہمیشہ قومی فیصلہ سازی وچ اہم کردار رہیا اے،ملکی سیاست وچ اپنے تریخی کردار پاروں فوج نوں عوام تے سیاستداناںولوں شدید تنقید دا سامنا کرنا پئیا۔آرمی چیف نے آکھیاکہ اسیں فوج دے کردار نوںغیر سیاسی بنان دا فیصلہ کرکے صرف اوس دے آئینی ذمہ داری تک محدود کر دتا اے،ایہ فیصلہ اگرچہ معاشرے دے اک طبقے ولوں منفی طوراُتے ویکھیا جارہیا اے تے ذاتی تنقید دا سامنا کرنا پئیا۔