تحریک انصاف دا اجلاس:استعفے نہیں اسمبلیاں توڑن اُتے اتفاق

لہور( پنجابی میڈیا گروپ)سابق وزیراعظم عمران خان ولوں اسمبلیاں توں نکلن دے اعلان توں بعد تحریک انصاف دے مشاورتی اجلاس وچ اتفاق ہویا اے کہ استعفے نہیں دتے جان گے جدکہ اسمبلیاں توڑیاں جان گیاں ۔ عمران خان دی زیر صدارت پی ٹی آئی سینئر لیڈر شپ دے اجلاس دا انعقاد کیتا گیا ،اجلاس وچ پنجاب، کے پی کے تے سندھ توں لیڈر شپ رَلت کیتی۔اجلاس وچ اسد عمر، شاہ محمود قریشی، فواد چودھری، وزیر اعلی کے پی کے محمود خان، شفقت محمود، تیمور جھگڑا، علی امین گنڈا پور، علی ظفر ایڈووکیٹ، بابر اعوان، جمشید چیمہ، اعجاز چودھری، فردوس شمیم نقوی، عثمان بزدار، سپیکر پنجاب اسمبلی سبطین خان، ڈاکٹر یاسمین راشد، عاطف خان، عمر ایوب، سینئر صوبائی وزیر میاں اسلم اقبال، میاں محمود الرشید، سیکرٹری اطلاعات فرخ حبیب، قاسم سوری تے پارٹی دے ہور رہنما وی رَلتی ہوئے۔بابراعوان تے علی ظفر ولوں اجلاس دے رَلتیاں نوں آئینی تے قنونی معاملیاں اُتے بریفنگ دتی گئی، اسمبلی توں استعفٰی دین لئی آئینی مرحلہ توں آگاہ کیتا گیا ،اجلاس وچ حکومت مخالف تحریک دے ہور آپشناں دا وی جائزہ لیا گیا۔قنونی ماہرین نے بریفنگ وچ دسیا کہ اسمبلیاں ٹٹ دیاں نیں تے نگران سیٹ اپ تک موجودہ وزیراعلی ہی رہن گے۔ حکومت تے اپوزیشن دے وچکار نگران سیٹ اپ اُتے اتفاق نہ ہویا تے الیکشن کمیشن فیصلہ کرے گا۔ نگران سیٹ اپ دا اختیار الیکشن کمیشن نوں ملن توں فائدہ پی ڈی ایم نوں ہوئے گا ۔ پی ٹی آئی دے اجلاس دے دوران اسمبلیاں توں استعفٰی دین دی بجائے تحلیل کرن دے آپشن اُتے مشاورت کیتی گئی۔