ودھدی آبادی تے مسئلیاں دے انبار

کدی آبادی دنیا وچ قوت تے طاقت تے معاشی تے سیاسی استحکام دا ذریعہ سمجھی جاندی سی لیکن اج ودھدی ہوئی آبادی نوں خوف دی علامت سمجھیا جاندا اے تے پاکستان دا شمار اوہناں ملکاں وچ ہوندا اے جتھے ہر سال آبادی وچ ریکارڈ وادھا ہو رہیا اے۔ یورپی ملکاں نے اپنی آبادی نوں قابو وچ رکھیا تے اج اوتھے وسائل دی تقسیم تے مسئلیاں دا حل ساڈے توں بہت بہتر نظر آندا اے۔ ودھدی آبادی مسئلیاں نوں ودھاوے گی۔ ایسے سوچ دے تحت 1973 توں اقوام متحدہ نے کنٹرول آبادی نوں اک عالمی پالیسی بنایا ہویا اے۔ آبادی وچ تیز رفتار وادھے دی شرع چونکہ ترقی پذیر ملکاں وچ بوہتی رہی اے ایس لئی ترقی پذیر ملکاں توں آبادی کنٹرول کرن دی یقین دہانیاں لیتی جاندیاں نیں تے قرض تے ترقیاتی فنڈز لئی تخفیف آبادی دے اہداف نوں بطور شرط منوایا جاندا اے۔ ایس لئی اج ماہرین کہہ رہے نیں کہ ساڈے ودھدے ہوئے مسئلیاں دی وڈی وجہ آبادی دی تیز رفتار بڑھوتری اے۔ ساڈے پیارے رسولۖ دا فرمان عالیشان اے کہ علم حاصل کرو چاہے تہانوں چین جانا پووے۔ چین اوس ویلے وی اپنا اک مقام رکھدا سی تے اج وی چین دا دنیا وچ اک خاص مقام اے۔ چین تیبنگلہد یش اوہ دو ملک نیں جہناں نے آبادی گھٹ کرن تے سب توں ودھ عمل کر وکھایا اے۔ دسیا جاندا اے کہ چین دی کمیونسٹ حکومت نے ستر دی دہائی وچ آبادی کنٹرول کرن لئی ون چائلڈ پالیسی نافذ کیتی۔ لوکاں نوں بھاری جرمانے کیتے تے بہت کجھ کر کے اپنی آبادی وچ نمایاں کمی لے آوے۔ بھارت وچ وی آبادی نوں کنٹرول کرن داعمل کافی موثر انداز وچ چل رہیا اے۔ بھارت تے چین تے غیر مسلم ملک نیں ایس لئی شاید ساڈے لوکاں نوں اوہانں دی فلاسفی سمجھ آنا اوکھا ہووے۔ چلو اج اسیں اپنے وچھڑے بھراں کولوں کجھ سکھن دی کوشش کردے نیں۔ جتھے آبادی دی شروع شروع وچ ساڈے جئی ای سی لیکن اوہناں نے اک پاسے شرع خواندگی وچ قابل قدر وادھا کیتا تے دوجے پاسے شرع آبادی نوں نمایاں طور تے گھٹ کر کے دنیا نوں حیران کردتا۔ قیام پاکستان ویلے ملک دی کل آبادی ساڈے ست کروڑ دے کول دسی جاندی اے جہدے وچ مغربی پاکستان دی آبادی پونے چار کروڑ تے مشرقی پاکستان دی آبادی سوا چار کروڑ سی۔ اگلے 20سال مگروں جدوں ایہہ ملک دو ٹکڑیاں وچ تقسیم ہویا تے مشرقی پاکستان دی آبادی 6کروڑ 60لکھ تے مغربی پاکستان دی آبادی 5کروڑ 70 لکھ تک پہنچ چکی سی یعنی دو عشریاں وچ آبادی دی شرع ڈبل ہو چکی سی۔ سن 1971 وچ اک آزاد ریاست دے بطور قائم ہون والے بنگلہ دیش وچ خاندانی منصوبہ بندی دے پروگراماں اتے عمدہ انداز توں عملدرآمد کیتا گیا اے۔ اوہناں نے خاندانی منصوبہ بندی دے طریقہ ہائے کار تے خدمات وچ بھاری سرمایہ کاری کیتی اے۔ ہراہل جوڑا خاندانی منصوبہ بندی توں متعلق مواد حاصل کردا اے جو مقامی ہیلتھ ورکراں دی مدد نال اوہناں تک پہنچایا جاندا اے۔ اک اوکھا کم پاکستان وانگوں بنگلہ دیش دی 160 ملین آبادی وچوں 90 فیصد مسلمان نیں جہناں وچ وڈی تعداد قدامات پسنداں دی اے۔ ایس وجہ نال سماجی حقوق دے کارکناں لئی شادی شدہ زنانیاں’ خصوصی طور تے دیہی علاقیاں نال تعلق کرھن والی زنانیاں نوں خاندانی منصوبہ بندی توں متعلق شعور تے آگاہی دین وچ مشکلات دا سامنا وی رہیا۔ سب توں ودھ مذہبی رہنماواں ولوں مزاحمت ویکھن نوں ملدی سی۔ مگر فیر حکومت ولوں مسلم مذہبی رہنماواں نوں خاندانی نصوبہ بندی توں متعلق کورسز کروائے گئے۔ ایس طرحاں اس مہم دا رستہ ہموار کیتا گیا۔ بنگلہ دیش وچ میڈیا لوکاں نوں مسلسل سمجھاندا آیا اے کہ مالیاتی بوجھ توں بچن تے بالاں دی بہتر دیکھ بھال تے نگہداشت لئی خاندانی منصوبہ بندی بہت ضروری اے تے ایہہ خبر بڑی حیران کن اے کہ اج پاکستان دی آبادی 22کروڑ توں تجاوز کر چکی اے تے بنگلہ دیش دی آبادی سوا سولہ کروڑ دے کول اے۔ ایہدی وجہ ایہہ اے کہ پچھلے 50 ورھیاں وچ بنگلہ دیش وچ پیدائش دی شرح فی خاتون 7 بالاں توں گھٹ ہو کے 2.1بال تک پہنچ گئی اے۔ ایہہ قریب یورپی اوسط دے برابر اے۔ شرح پیدائش وچ کمی براہ راست زنانیاں دی بہتر تعلیم’ ملازمت دے موقعے تے صحت دی سہولتاں تک رسائی نال جڑی اے۔ دنیا وچ جہناں ملکاں نے وی ترقی کیتی اے ایہدی وجہ اوتھے لوکاں نے 5 سال دی بجائے 50 سال تے 100سال نوں سامنے رکھدے ہوئے پالیسیاں بنان دا عمل شروع کیتا اے۔ ترقی یافتہ ملکاں وچ تعلیم’ صحت تے ٹرانسپورٹ دے جدید نظام نوں ویکھیے تے فیر اپنی بدحالی نوں ویکھو تے حقیقت سمجھ آجاندی اے کہ ساڈے منصوبہ سازاں توں بھل ہوئی اے۔ اج توں 50 ورھیاں پہلاں جدوں اقوام عالم نے آبادی تے مسئلیاں دی اہمیت نوں ویکھدے ہوئے کم شروع کیتا تے کاش ایس ملک وچ وی خاندانی منصوبہ بندی اتے انج ای عمل ہوندا جیویں ساڈے پڑوسی ملکاں نے کروکھایا۔ اج ساڈی حکومت نوں سارے سیاسی تے مذہبی جماعتاں نوں نال بٹھا کے آبادی کنٹرول کرن دا کوئی ایسا لائحہ عمل اختیار کرنا چاہیدا اے جو ہر حال جاری رہوے۔ عوام نوں سمجھایا جاوے کہ مہنگائی’ بیرزوگاری’ صحت’ لاقانونیت تے سموگ جئے مسائل آبادی کنٹرول کرن توں ای گھٹ ہون گے۔ کدی اسیں دشمن دے بالاں نوں پڑھان دا عہد کیتا سی چلو اج اپنے بالاں دے بتہر مستقبل لئی اپنے دوست چین’ مسلم ملک بنگلہ دیش تے دشمن بھارت کولوں کجھ سکھن دا عہد کر لین۔ آبادی کنٹرول ہووے گی تے ملکی معیشت پھلے پھولے گی تے لوکاں دی زندگی دا معیار بہتر ہون لگے گا۔