جنرل قمر جاوید باجوہ سبکدوش،جنرل عاصم منیر نے پاک فوج دی کمان سنبھال لئی

پنڈی (پنجابی میڈیا گروپ) نویں آرمی چیف جنرل عاصم منیر نے پاک فوج دے17 ویں سپہ سالاردی کمان سنبھال لئی، سبکدوش ہون والے آرمی چیف جنرل قمر جاوید باجوہ نے پاک فوج دی کمان جنرل عاصم منیر دے حوالے کیتی ۔منگل نوں پاک فوج وچ کمان دی تبدیلی دی پر وقار تقریب جنرل ہیڈ کوارٹرز (جی ایچ کیو) وچ منعقد ہوئی جس دے اُچیچے پروہنے سبکدوش ہون والے آرمی چیف جنرل قمر جاوید باجوہ سن ۔ تقریب وچ چیئرمین جوائنٹ چیفس آف اسٹاف کمیٹی، مسلح افواج دے سربراہواں، سینئرحاضرسروس تے ریٹائرڈفوجی افسراں ، اوہناں دیاں فیملیاں دے علاوہ وزیر داخلہ رانا ثنااللہ، وزیر خارجہ بلاول بھٹو زرداری، وزیر خزانہ اسحاق ڈار تے وزیر اطلاعات مریم اورنگزیب تے وفاقی سیکرٹریاں رَلت کیتی ۔تقریب دے شروع وچ پاک فوج دے سبکدوش ہون والے سربراہ جنرل قمر جاوید باجوہ تے نویں آرمی چیف جنرل عاصم منیر نے پہلاںشہیداں دی یادگار اُتے حاضری دتی جیتھے اوہناں نے یادگار شہدااُتے پُھلا چڑھائے تے اوہناں دے بلند درجے لئی دعا کیتی، ایس توں بعد پاک فوج دے بینڈز نے قومی ترانے تے ملی نغمیاں دیاں دھناں پیش کیتیاں تے قومی پرچم نوں سلامی دتی گئی۔تقریب دے اُچیچے پروہنے جنرل قمر جاوید باجوہ دی جنرل عاصم منیر دے ہمراہ پنڈال آمد اُتے گارڈز نے اوہناںنوں سلامی دتی جس توں بعد تلاوت کلامِ پاک نال تقریب دا آغاز کیتا گیا جس دے بعد جنرل قمر جاوید باجوہ نوںالوداع گارڈ آف آنر پیش کیتا گیا ۔ سبکدوش ہون والے آرمی چیف جنرل قمر جاوید باجوہ نے آرمی کمان دی علامت سمجھی جان والی ملادا اسٹک اعزازی شمشیر یافتہ جنرل سید عاصم منیر دے حوالے کیتی تے اوہناں نوں گلے لا کے مبارکباددتی ۔ فوج دی کمان سنبھالن توں بعد جنرل عاصم منیر پاک فوج دے17ویں سربراہ بن گئے نیں ۔لیفٹیننٹ جنرل عاصم منیر ایس ویلے سب دے سینئر ترین جنرل نیں، اوہناںنوں ستمبر2018 وچ3 اسٹار جنرل دے عہدے اُتے ترقی دتی گئی سی۔