عنقریب گمنامی وچ چلا جاواں گا، فوج نال روحانی رابطہ ہمیشہ قائم رہے گا،جنرل قمر جاوید باجوہ

پنڈی(پنجابی میڈیا گروپ)سبکدوش ہون والے آرمی چیف جنرل قمر جاوید باجوہ ہوراں آکھیا کہ اوہ عنقریب گمنامی وچ چلے جان گے لیکن فوج نال روحانی رابطہ ہمیشہ قائم رہے گا ،فوج نے ہمیشہ میری آواز اُتے لبیک آکھیا ، میںاوہناںتوں جیتھے پسینہ منگیا اوہناں خون دتا، اوہناں دیاں ایسی قربانیاں پاروں اج ملک امن دا گہوارہ اے،جنرل عاصم نال میری رفاقت24سالہ پرانی اے،اوہ حافظ قرآن ہون دے علاوہ پیشہ ور، باصلاحیت تے اعلیٰ اصولاںدے قابل افسر نیں ، یقین اے کہ فوج اوہناں دی قیادت وچ نویاں منزل طے کرے گی، اوہناں دی تعیناتی مثبت ثابت ہوئے گی، خوشی اے کہ فوج اک مایہ ناز تے قابل افسر دے حوالے کرکے جارہیا ہاں،اپنی فوج اُتے فخر اے، جیہڑی گھٹ وسائل دے باوجود سیاچن توں لے کے صحرا تک سرحداں دی حفاظت کردی اے ، ایہ لسانیت، رنگ نسل تے مذہب دی تفریق توں بالاتر ہو کے ملک دے چپے چپے دا دفاع کردی اے، یقین اے کہ آن والے ویلے وچ فوج جنرل عاصم دی قیادت وچ اوہناں توںوَدھ کے ملک دی خدمت کرے گی ۔منگل نوں جی ایچ کیو وچ کمان دی تبدیلی دی تقریب نال خطاب کردیاں ہویاں سبکدوش ہون والے آرمی چیف جنرل قمر جاوید باجوہ نے نویں آرمی چیف جنرل عاصم منیر نوں مبارکبا دتی ۔ جنرل قمر جاوید باجوہ نے آکھیا کہ پاک فوج دے نال عمر بھر دی رفاقت اُتے میں اللہ تعالیٰ دا شکر گزار ہاں کہ جس نے مینوں فوج وچ خدمت دا موقع دتا تے بامقصد زندگی عطا کیتی۔