وِگڑدی معاشی صورتحال قومی سلامتی لئی خطریاں نوں ہوا دے رہی اے: عمران خان
لہور( پنجابی میڈیا گروپ)پاکستان تحریک انصاف دے چیئرمین تے سابق وزیراعظم عمران خان نے آکھیا کہ صاف شفاف الیکشن دا انعقاد ویلے دی اہم لوڑ اے، تیزی نال وِگڑدی معاشی صورتحال قومی بقا و سلامتی لئی غیرمعمولی خطریاں نوں ہوا دے رہی اے ۔ مجلسِ وحدت المسلمین دے اعلٰی سطحی وفد نے سربراہ علامہ راجہ ناصر عباس دی سربراہی وچ زمان پارک دا دورہ کیتا تے سابق وزیراعظم نال خصوصی ملاقات کیتی ۔ملاقات دے دوران سیاسی صورتحال، دوناں جماعتاں دے مابین اشتراکِ عمل تے باہمی دلچسپی دے امور اُتے تفصیلی تبادلہ خیال کیتا گیا۔مجلس وحدت السلمین نے پنڈی وچ حقیقی آزادی مارچ دے فقیدالمثال انعقاد اُتے عمران خان نوں مبارکباد پیش کیتی تے آئندہ سیاسی حکمتِ عملی دی مکمل تائید وحمایت دا اعلان کیتا۔ایس موقع اُتے علامہ راجہ ناصر عباس نے آکھیا کہ پاکستان پیچیدہ ترین سیاسی تے معاشی چیلنجاںدا شکار اے، حقیقی آزادی دے بیانیے نوں سارے مکاتبِ فکر وچ غیرمعمولی قبولیت تے پذیرائی میسر اے، فوری صاف و شفاف الیکشن دے انعقادذریعے بحران دے حل دی تدبیر اُتے عمران خان دے موقف دی مکمل تائید کردے نیں۔ سیاسی جدوجہددے ہر مرحلے اُتے تحریک انصاف دی قیادت دے شانہ بشانہ رہن گے۔
