عمران سب توں وڈا سیاستدان

سعد اللہ شاہ

میں کیا کہوں اسے کہ مقدر نہیں رہا
یا پھر میرے یقین کا پیکر نہیں رہا
پیچھے نہ چل سکا میں کسی کے بھی آج تک
منزل جسے ملی وہی رہبر نہیں رہا
ایس دور وچ راہبر تے رہزن وچ بڑا تھوڑا جیہا فرق اے۔ جیویں ذہانت تے پاگل پن دیاں لکیراں وچ کوئی خاص فرق نہیں ہوندا زیادہ ذہین و فطین ای شدید احساس پاروں ابنارمل ہو جاندے نیں۔ تقرریاں دا جہڑا کم ہونا سی اوہ ہو چکیا۔ پانیاں وچ بڑی طغیانی رہی تے موجاں نے ساحل دے نال وی سر ماریا تے آپس وچ وی ٹکرا ٹکرا کے جھگ بناندیاں رہیاں۔ جھگ آخر بہہ ای جاندا اے کیہ تماشا جیہا لگا رہیا کہ فلاں ایہ چاہندا اے تے فلاں اوہ چاہندا اے۔ حالاں کہ چاہن والے جان دے سن کہ اوہناں دے چاہن یاں نہ چاہن نال کجھ نہیں ہووے گا۔ مضبوط ادارے دا اپنا اک ڈیکورم ہوندا اے۔ کمزو رتے طفیلی لوگ اپنے پالن والیاں نال معاملات طے نہیں کردے بہرحال ایہ چنگا اے کہ سارے متفق نیں کہ ایہدے وچ عدم تعاون دی کوئی گنجائش نہیں۔ تہانوں جے میری گل وچ کاٹ نظر آوے کہ تے ایہ اوہو کٹائو اے جو دل تے آیا ہویا اے۔ میر نے کہیا سی:
دل کی بربادی کا کیا مزکور ہو
یہ نگر سو مرتبہ لوٹا گیا
اک نگر اک دل ای تے ہوندا اے ساڈے دل وچ تے اک ہور دل اے جہنوں لہور کہندے نیں اوہو سائنس دی گل کہ مرکز دے اندر اک مرکز وچ ای ہوندا اے فیر تے اسیں کہیا سی۔ اک دل بنا رہا ہوں میں دل کے مکین میں، مشکل سے بات بنتی ہے مشکل زمین میں۔ اچانک مینوں میر دا ای اک لاجواب شعر یاد آ گیا کہ اج دا بیانیہ لگدا اے:
دیواریں تنی ہوئی کھڑی تھیں
اندر سے مکان گر رہا تھا
میں اوہناں ازمائے ہوئے سیاستداناں دی تائید نہیں کر سکدا کہ جو بار بار کہہ رہے نیں کہ عمران خان سیاستدان نہیں۔ جناب تسیں غلط کہندے او خان تہاڈے توں وڈا سیاستدان اے پر ہاں کدی اک ویلا سی جدوں اوہ سیاستدان نہیں سی۔ اوہ اوس ویلے بالکل وی سیاستدان نہیں سی ایہو ادا لوکاں نوں بھاندی وی اے’ ڈاکٹرز’ استاد تے انجینئر تے سارے مکاتب فکر اوہدے بارے یکسو سن اوہ ساریاں دے چاہن دے باوجود نکام ہو گیا کسے نے اوہدے کن وچ کہیا:
وہ بھٹکتا ہے وہی راہ بنا جاتا ہے
ورنہ بستی میں کہاں سیدھا چلا جاتا ہے
عوامی طاقت دا ڈھونگ صرف رچایا جاندا اے طاقت دا سرچشمہ کدھرے ہور اے فیر ایس اکھڑ تے ضدی بندے نوں عقل آ گئی اوہدے اندر دا سیاستدان جاگ گیا اوہ سیاستدان سی اوہنے تے اپنے ساتھیاں نوں دسیا کہ اوہ غلط ٹیم دے نال میچ کھیڈ رہیا سی ایتھے کرکٹ میچ ہاکی ٹیم دے نال تے ہاکی میچ کرکٹ ٹیم دے نال کھیڈیا جاندا اے یعنی ایتھے الٹی گنگا چلدی اے اوہو حسن نثار دے بقول الٹا لٹکو گے تے سدھا نظر آئو گے فیر اوہنے اوہ کر وکھایا کہ سارے ویکھدے ای رہ گئے فیر اوہنے یوٹرن نوں حکمت بنا دتا۔ مولانا فضل الرحمن وی سر پھڑ کے بہہ گئے اوہنے الیکٹی بلز تے سمجھوتہ کر لیا لوٹیاں دا ہار گلے وچ پانا وی قبول کر لیا ایتھے وی محبت تے جنگ دے قنون اپنا لئے گئے اوہنوں وزارت عظمیٰ مل گئی اوہدے تے کھلیا کہ خزانہ تے خالی اے وعدے کیویں پورے ہون گے ہن اوہ مکمل سیاستدان ہو چکیا سی لوک اوہدے سحر وچ سن۔ فیر مہنگائی ودھدی گئی تے اوہ لوکاں نوں حوصلہ دیندا رہیا کہ گھبرانا نہیں۔ ایس طرح ساڑھے تن ورھے گزار دتے گئے فیر ساریاں دے کن کھڑے ہو گئے مختصر ایہ کہ سارے مل بیٹھے تے اوہناں نے اسٹیبلشمنٹ نوں نیوٹرل کرکے اپنے گیئر لائے تے گڈی اپنے قبضے وچ کر لئی جو وی ہویا پر ایتھے وی عمران خان اوہناں توں کدھرے وڈے سیاستدان ثابت ہوئے۔ اوہ اقتدار توں لہہ کے وی ساریاں دے سر تے سوار نیں۔ بیانیہ بنان وچ اوہناں دا کوئی ثانی نہیں اوہ اپنے معاصرین توں بہت اگے نیں۔
35 پنچر وی اوہناں دے مشہور ہوئے سن جہنوں اوہناں نے آپ ای اک مذاق قرا ر دے دتا ہن دے سازش بیانیے نوں اسماناں تک اپڑا کے آپ ای جھٹک دتا۔ کس کمال نال امریکہ نوں اکھاں وکھائیاں تے کسے محبوبانہ انداز وچ اکھاں جھکا دتیاں۔ اوہناں نے کمال ہوش مندی نال ابتری تے شورشرابا برپا کرکے کجھ اداریاں نوں وی دبائو وچ رکھیا حکومت تے وچاری دفاع تے ای رہی۔ عمران خان دے نال اک مسئلہ ہویا کہ کجھ قریبی لوک اوہدے اپنے نہیں سن کسے ہور دے سن انج ای جیویں پنجاب حکومت وی خان دے ناں تے پر اوہناں نوں پتہ اے کہ پنجاب کہدا اے پر کمال ایہہ وے کہ اوہ سب کجھ جاندے ہوئے کھیڈ رہے نیں تے اوہ ہمیشہ سیاست نوں کھیڈ بنان وچ کامیاب رہے نیں ایہ جو کہیا جا رہیا اے کہ 69فیصد لوک خان صاحب نوں کامیاب ویکھنا چاہندے نیں غلط نہیں وجہ ایہہ وے کہ آن والیاں نے لوکاں نوں ریلیف تے کیہ دینا سی اوہناں دی زندگی اجیرن بنا دتی اے اوہ تے نوازشریف نوں واپس نہیں لیا سکے سگوں نوازشریف دے جان وچ وی اوہناں دا ہتھ نہیں سی۔ آخری گل ایہ کہ لوکاں لئی اوکڑاں پیدا کر کے نقصان اٹھاواں گے لوک تنگ آ کے کسے نوں چھڈ دیندے نیں۔ اک شعر:
تجھ کو کچھ تو بنا دیا ہے
ہم نے تھوڑا سا دھیان دے کر