پنڈی ٹیسٹ:قومی ٹیم مشکل وچ پَھس گئی

پنڈی(پنجابی میڈیا گروپ)پنڈی وچ جاری ٹیسٹ میچ اندر انگلینڈ ولوں دتے گئے343سکور دے ہدف دے تعاقب وچ قومی ٹیم مشکلاں دا شکار ہو گئی۔2وکٹاں25دے سکور اُتے ہی ڈِگ گئیاں۔دن دے اختتام تک80سکور بنا لئے۔قومی ٹیم نوں جِت لئی ہور263سکور درکار نیں ۔ پنڈی سٹیڈیم وچ کھیڈے جان والے پاک انگلینڈ سیریزدے پہلے ٹیسٹ میچ دے چوتھے دن پاکستان نے 499سکور7وکٹاں دے نقصان اُتے اننگز دا آغازکیتا تے آغا سلمان53،زاہد محمود17 تے حارث رئوف12سکور بنا کے پویلین چلے گئے۔اوس دے بعد انگلش ٹیم نے بیٹنگ شروع کیتی تے اوپنر بین ڈکٹ صفر، اولی پوپ 15، جو روٹ 73، کپتان بین سٹوکس صفر، ول جیکس 24، ہیری بروکس 87 سکور بنا کے آئوٹ ہوئے۔ انگلینڈ نے اننگز ہور جاری نہ رکھن دا فیصلہ کردیاں ہویاں7وکٹاں دے نقصان اُتے264سکوراں اُتے ڈکلئیر کردتی ۔ پاکستان ولوں زاہد محمود، نسیم شاہ تے محمد علی نے 2،2جدکہ آغا سلمان نے 1وکٹ حاصل کیتی ۔ انگلینڈ ولوں پاکستان نوں343 دا ہدف دتا گیا ۔جس دے تعاقب وچ پاکستان دی ٹیم شروع توں ہی مشکلاں دا شکار ہو گئی۔ امام الحق تے عبد اللہ شفیق نے اوپننگ کیتی تے تھوڑی دیر بعد ہی عبد اللہ شفیق اولی روبنسن دی گیند اُتے ہیری بروک ہتھوں کیچ آئوٹ ہو گئے۔ اظہر علی وی امام الحق دا ہور دیر ساتھ نہ دے سکے تے گیند لگن نال زخمی ہونے پاروں ریٹائرڈ ہرٹ ہو گئے۔اظہر علی دے کریز چھڈن توں بعد کپتان بابر اعظم نے بیٹنگ سنبھالی تے اوہ وی زیادہ مزاحمت نہ کر سکے تے4سوکر ہی بناپائے۔کپتان بابر اعظم بین سٹوک دی گیند اُتے آئوٹ ہو کے پویلین چلے گئے۔ امام الحق43سکور تے سعود شکیل24سکور دے نال کریز اُتے موجود نیں۔چوتھے دن دے اختتام تک پاکستان نے2وکٹاں دے نقصان اُتے80سکور بنا لئے جدکہ جِت لئی ہور263سکور درکار نیں۔