ساڈا مجرم نیب دا چیئرمین،حساب چُکتا کراں گے، شاہد خاقان عباسی

اسلام آباد( پنجابی میڈیا گروپ)سابق وزیر اعظم شاہد خاقان عباسی نے آکھیا اے کہ ملک وچ نام نہاد احتساب دااک سلسلہ چل رہیا اے، ساڈا مجرم نیب دا چیئرمین اے، اسیںحساب چُکتا کراں گے۔ احتساب عدالت اسلام آباد دے باہر میڈیا نال گل بات کردیاں ہویاں شاہد خاقان عباسی نے آکھیا کہ کئی وار کہہ چکیا ہاں ملک دی بقا لئی احتساب دے ادارے نوں ختم ہونا چاہیدا اے، کئی سال توں ایتھے آرہیا ہاں تے70پیشیاں بھگت چکیا ہاں ، اگر کیس وچ کجھ ہُندا تے 3 پیشیاں وچ فیصلہ ہو جانا چاہیدا سی ۔ سابق وزیر اعظم ہورآکھیا سی کہ نیب نے ساڈے اُتے کوئی کرپشن دا الزام نہیں لایا ، ساڈا خبراں وچ نام آندا اے لیکن کیس وچ کجھ نہیں اے، ملک دا جنا نقصان جسٹس(ر)جاوید اقبال تے نیب نے کیتا تے کسی نے نہیں کیتا ، اوہناں نے آکھیا کہ اج کل اعتراف دا زمانہ اے ،جسٹس جاوید صاحب وی ایس دا اعتراف کرلین ۔ شاہد خاقان عباسی نے آکھیا کہ پاکستان نوں ایل این جی ٹرمینل نال ہزاراں ارب دا فائدہ ہویا ،حکومت نے معیشت نوں استحکام دتا تے ہور کوشش کررہی اے، حکومت نے پاکستان نوںڈیفالٹ توں بچایا ، مشکل فیصلے کرنے پین گے، اوہناں نے اکھیا کہ عمران خان تے اوس دی جماعت نے پورا زور لایا لیکن کوئی کیس ثابت نہیں کر سکے۔