توہین عدالت کیس:رہنما پی ٹی آئی اسد عمر نے معافی منگ لئی
پنڈی( پنجابی میڈیا گروپ)پاکستان تحریک انصاف دے سیکرٹری جنرل اسد عمر نے توہین عدالت کیس وچ غیر مشروط معافی منگ لئی ۔ لہور ہائیکورٹ پنڈی بینچ دے جسٹس جواد حسن نے سیکرٹری جنرل پی ٹی آئی اسد عمر نوں جاری توہین عدالت نوٹس اُتے سماعت کیتی ۔ عدالتی حکم اُتے اج اسد عمر اپنے وکیل ایڈووکیٹ فیصل چودھری دے ہمراہ عدالت وچ پیش ہوئے ۔ جسٹس جواد حسن نے فیصل چودھری نال استفسار کیتا کہ تہاڈے مکل کیتھے نیں اوہناںنوں پیش کرو، جس اُتے اسد عمر نے عدالت دے روسٹرم اُتے آکے اپنی تقریر اُتے غیرمشروط معافی منگی تے آکھیا کہ اسیں عدلیہ دااحترام کردے ہاں تے کردے رہواں گے ۔ عدالت نے آکھیا کہ مسئلہ توہین عدالت دا نہیں اداریاں تے اوہناں دی شخصیتاں اُتے الزاماں دااے،جس اُتے اسد عمر نے آکھیا کہ میری تقریر وچ کسی جج دا نام نہیں سی ۔ دوران سماعت اسد عمر نے عدالت توں غیر مشروط معافی منگدیاں آکھیا کہ میرا مقصد عدالتاں یا ججاں نوں نشانہ بنانا نہیں سی، جس اُتے جسٹس جواد حسن نے آکھیا کہ میرے کول تہاڈے ویڈیو بیان نیں، ساہنوں چنگی طرح علم اے کہ تُسی کیہ آکھیا ۔ جسٹس جواد حسن نے ریمارکس دتے کہ عدالتاں نے تہانوں لانگ مارچ دی اجازت دتی، تُسی عدالتاں نوں ہی نشانہ بنایا۔اسد عمر نے آکھیاکہ میرے کسی بیان نال اگر کوئی لائن کراس ہوئی تے معافی منگدا ہاں۔عدالت نے پی ٹی آئی رہنما ولوںغیر مشروط معافی منگن اُتے اسد عمر اُتے جاری توہین عدالت نوٹس کیس نمٹا دتا ۔ واضح رہے کہ اسد عمر نے 26نومبر نوں پنڈی وچ پی ٹی آئی جلسے دے دوران تقریر وچ ججاں اُتے تنقید کیتی سی۔
