طارق عزیز شو دے تسلسل وچ اک معیاری کوئز شوسلام پاکستان شو۔۔۔۔

کوئز پروگراماں دی تریخ وچ بلاشک و شبہ پی ٹی وی توںپیش کیتا جان والا پروگرام نیلام گھر’بزم طارق عزیز تے مگروں طارق عزیز شو دا ریکارڈ اج تک برقرار اے۔ اگرچہ ایس کوئز شو توں ہن تک بہت سارے کوئز شو تے انعامی پروگرام منظر عام اتے آ چکے نیں لیکن طارق عزیز شو جئی مقبولیت تے ناظرین دی توجہ اج تک کوئی دُوجا پروگرام حاصل نہیں کر سکیا۔ ایہناں حالات وچ جدید تقاضیاں تے ٹی وی ناظرین دی نفسیات نوں پرکھدے ہوئے ایہہ فیصلہ کیتا گیا اے کہ کوئی ایسا کوئز شو ڈیزائن کیتا جاوے جہدے وچ طارق عزیز جیسی لیجنڈ شخصیت نال جڑیاں یاداں وی ہون۔ اوہناں جیسا معلومات فراہم کرن دا انداز وی ہووے تے اوہناں دے انداز وچ پچھے گئے سوالاں دے جواباں اتے حوصلہ افزائی دے طور تے قیمتی انعام وی لوکاں تک پہنچ سکن جہدے مگروں سیماب پروڈکشنز دے پلیٹ فارم اتے قریبی احباب دی مشاورت’ تعاون تے اوہناں دے تجربے توں استفادہ کرن لئی سلام پاکستان شو دا آئیڈیا سامنے لیایا گیا۔ منے پرمنے میزبان اسلم سیماب جہڑے ناصرف بولن دا فن جاندے نیں بلکہ اک عرصہ توں ریڈیو تے سٹیج دی دنیا دے سٹار دے طور تے اپنی خدمات پیش کر رہے نیں۔ اوہناں دے کریڈٹ اتے بہت سارے ریڈیو پروگرامز’ سینکڑاں سٹیج شوز تے دور حاضر وچ کاسمٹیکس مصنوعات دے ایمبیسیڈر دے طور تے معروف کمپنیاں دے کامیاب شوز شامل نیں۔سب توں ودھ کے ایہہ کہ اوہ دل و جان نال طارق عزیز دی صلاحیتاں دے معترف تے اوہناں نال عقیدت رکھدے نیں۔ اوہناں دے ایسے جذبے نوں ویکھدے ہوئے سلام پاکستان شو دا رنگ کجھ ایس انداز نال جمایا گیا اے کہ ویکھن والیاں نوں اک لمحے لئی ایہہ طارق عزیز شو ای وکھائی دیوے گا۔ ایس شو دے ڈائریکٹر لئی ایکیو عباس دا انتخاب کیتا گیا جد کہ ایس شو دے رائٹر اے آر گل تے ایہدی ٹیم وچ ڈائریکٹر فنانس شاہد ملک’ سجل خان’ اقبال رضوی’ کیمرا مین محمد اکرم سنے پروگرام دی معاون میزبان ماہم بٹ شامل نیں۔ سلام پاکستان شو دے پروڈیوسر وی اسلام سیماب خود نیں تے خوش قسمتی نال اوہناں نوں ملٹی نیشنل کمپنیاں دا تعاون وی حاصل ہو گیا اے جہدے پاروں اوہناں دے ہر شو وچ کار’ موٹرسائیکل’ لیپ ٹاپ’ موبائل فون’ واشنگ مشین توں لے کے ہر طرحاں دا قیمتی انعام آن والے معزز پروہنیاں نوں دِتا جاوے گا۔
ایس شو دے پہلے پروگرام دی ریکارڈنگ پچھلے ہفتے الحمرا ہال وچ کیتی گئی جہدے وچ رلت لئی زندہ دلان لہوردی وڈی تعداد الحمرا ہال پہنچ گئی۔ قومی ترانے مگروں تیزی نال مقبولیت حاصل کرن والے باصلاحیت گلوکار جہانزیب اسلم نے سلام پاکستان دا ٹائٹل سانگ پیش کر کے حاضرین کولوں زبردست داد حاصل کیتی۔ ایسے طرحاں پروگرام دے دوران موسیقی لئی وقف سگمنٹ وچ گلوکار راگنی نے اپنی آواز دا جادو جگا کے شرکا نوں محظوظ کیتا۔ ایس شو دے دوران بصارت توں محروم جوڑے سید فرخ شاہ تے اوہناں دی اہلیہ نے بانسری وجا کے سماں بنھ دتا۔ گلوکار ممتاز علی وی شو دا حصہ سن۔ ایس شو وچ ہر ہفتہ نامور شخصیات نوں بطور مہمان مدعو کیتا جاوے گا۔ پہلے پروگرام دے اُچیچے پروہنے پرائڈ آف پرفارمنس اداکار راشد محمود سن جہناں نے گل بات کردیاں طارق عزیز نوں خراج عقیدت پیش کیتا تے نال ای سلام پاکستان شو لئی نیک خواہشاں دا اظہار کردیاں ہوئیاں اسلم سیماب دے جذبے تے لگن نوں وی سراہیا۔ اوہناں دا کہنا سی کہ اج دے دور وچ ایسا پروگرام پیش کرنا آسان کم نہیں لیکن سلام پاکستان دی ٹیم نے جہڑا قدم چکیا اے اوہ یقینا قابل تحسین اے۔ شو دے دوران حاضرین نوں انعام دین تے اوہناں دی معلومات نوں جانچن لئی سوالاں دا سلسلہ وی جاری رہیا۔ میزبان دی نوک جھوک تے اوہناں دے انداز تکلم دی شرکا نے داد دے کے اپنے انداز وچ تعریف کیتی۔ ہال وچ موجود افراد وچ سلائی مشین’ واشنگ مشین’ کاسمیٹکس تے سب توں ودھ کے 3موٹرسائیکلاں دے انعامات نے ایس شو دی قدروقیمت وچ کئی گنا وادھا کر دتا۔ اسلم سیماب نے اعلان کیتا کہ آئندہ پروگراماں وچ کار دا تحفہ وی دتا جاوے گا۔ ایس شو وچ کامیڈین لکی ڈیئر نے ہال وچ موجود افراد دے ہونٹاں اتے قہقہے بکھیر دِتے۔ نویں نسل نوں شعرو ادب ول راغب کرن لئی بیت بازی دا وی پربندھ کیتا گیا جہدے وچ نوجوان منڈیاں تے کڑیاں نے منے پرمنے شاعراں دے معیاری شعر پڑھ کے اپنی صلاحیتاں نوں ثابت کیتا۔ ایسے طرحاں کھیڈاں دی اہمیت نوں مدنظر رکھدے ہوئیاں شادی شدہ جوڑیاں نوں سٹیج اتے بلا کے گیماں کھیڈیاں گئیاں۔ بڑی چھیتی نویں شادی شدہ جوڑیاں نوں وی پروگرام دا حصہ بنایا جاوے گا۔ سلام پاکستان شو دی ریکارڈنگ پنج گھنٹیاں تک مسلسل جاری رہی تے ایس شو وچ عوام دی دلچسپی دا اندازہ ایس گل توں لایا جا سکدا اے کہ ایس لمے دورانیے دے باوجود وی ہال دے شرکا پورے انہماک نال پروگرام ویکھدے رہے تے ہر پاسوں تالیاں تے ہاسیاں دا شور سنائی دیندا رہیا۔
حاضرین دی اکثریت دا کہنا سی کہ طارق عزیز شو مگروں اک سوہنا فیملی شو ویکھن نوں ملیا تے ایہہ سلسلہ مستقبل وچ وی جاری رہنا چاہیدا اے۔ اسلم سیماب تے اوہناں دی ٹیم وی ایس شو دی کامیاب ریکارڈنگ اتے خوشی نال نہال اے۔اسلم سیماب دا کہنا سی کہ ساری مشکلاں تے رکاوٹاں دے باوجود اوہ ایس پروگرام نوں جاری رکھن لئی پرعزم نیں تے اوہ ویلا دور نہیں جدوں ایہہ پروگرام لہور دے علاوہ ملک دے دُوجے شہراں ملتان’ فیصل آباد’کراچی وچ وی ریکارڈ کیتا جاوے گا بلکہ اگلے مرحلے وچ اسیں ایہدی ریکارڈنگ متحدہ عرب امارات’ برطانیہ تے دوجے ملکاں وچ وی کراں گے۔ پہلے پروگرام وچ تن موٹرسائیکل حاصل کرن والے خوش نصیب افراد وچ محمد اکرم شانی’ محترمہ سحرش’ ناہید شامل نیں جہناں نوں موٹرسائیکل دا ایہہ تحفہ سپارکو پینٹ’ چاندنی بیوٹی کریم تے جھلک بیوٹی کریم ولوں دتا گیا۔ ایس شو دے دوجے سپانسراں وچ صوفی بناسپتی’ فیس فریش کاسمٹیکس’ ون ڈالر شاپ’ مرحبا لیبارٹریز’ لائبہ بیوٹی کریم’ صفورا بیوٹی کریم’ چاندنی بیوٹی کریم’فائزہ بیوٹی کریم’ جھلک بیوٹی کریم’ سپارکو پینٹ’ ٹیکنو موبائل’ بائیو کاس بیوٹی کریم سرفہرست نیں۔
سلام پاکستان شو دے اگلے پروگرام دی ریکارڈنگ 27دسمبر نوں الحمرا ہال وچ ہووے گی۔