ھک ھفتہ اوسلو وچ۔۔

19،مئی2022نوں ڈاکٹر اظہر محمود چودھری تے میں اوسلو ائیر پورٹ اَپڑے تاں،نعیم طارق تھتھال تے اوھناں دے سنگیاں پرویز اقبال، سکندر گمٹی،افضل عباس، کاشف تے تبسم شاہ ھوراں بھرواں سواگت کیتا، سبھ سجناں متراں نال پہلی ملنی آھی، خاص طور تے پرویز اقبال ھوراں نال، جیہناں دیاں گلاں میں خالد حسین تھتھال ھوراں توں زندگی بھر سندا رھیا، دل تے جیہناں نوں ملن دی تانگھ دل تے روح وچ جاگدی رھی، ملن تے پتہ لگا جو اوھناں دی ذات اوس توں ودھ سوھنی ھے، جناں اوھناں بارے سندا آیاں، سکندر گمٹی ھوریں تے ھور سجن وی ودھ چڑھ کے ھائن ۔
پہلی رات ای سبھ سجن نعیم ھوراں دے گھر اپڑے تے رج گلاں ھوئیاں،گلاں دا مرکز خالد ھوراں دی ذات رھی،دُوجے دیہاڑ سویرے سویرے قبرستان اپڑے، تے خالد حسین تھتھال ھوراں دی آخری آرام گاہ تے اَپڑے، فاتحہ پڑھی، اوھناں دے صاحب زادے کرن مان حسین، ارشد بٹ، پرویز اقبال وی نال ھائن،اوس مگروں اوسلو دیاں وَکھ وَکھ تھاھریں گئے،رات نوں نگھے انسان تے پیارے جی ظہیر عباس ھوراں ترکی ریسٹورنٹ علی بابا وچ پر تکلف کھانا کھوایا، جیہدے وچ اظہر محمود چودھری، میں، نعیم طارق تھتھال، رضوان صفدر، صغیر احمد سبھناں خاص ترکی کھانے نال من پرچایا جیہدے وچ ترکی آرٹ دے نال نال ظہیر عباس ھوراں دی محبت وی رلی ھوئی آھی، ایتھے بیٹھیاں ای ھک دم کسے دی سالگرہ مناون دا گاون گایا جان لگ پیا، تے ترک ریسٹورنٹ دے لوک ساز لے کے اوتھے اپڑ جاندے، انج ترکی کھانے دے نال نال ظہیر عباس ھوراں دی محبت رات یادگار بنا دتی ۔
گھر آ کے وی دیر تیک گل بات چلدی رھی ۔
20،اکتوبر نوں خالد حسین تھتھال ھوراں دی آخری آرام گاہ تے فاتحہ پڑھن مگروں اوسلو شہر پھرن دا پروگرام آھا، جس دوران شہر دے وچکار بنے ”فروگنر پارک جاون،اوسلو دی نویں بنی نیشنل لائبریری تے اوپیرا پھرن دا پلان آھا، ایس پاروں ناشتہ کر کے نکلے تاں باقی دوستاں دے آون وچ حالے کجھ ویلا آھا، ایس پاروں نعیم ھوراں دے گھر (ستوونر)نیڑے موجود جنگل تے لکڑی دے بنے اُچے پل تے چڑھن دا متا پکایا تے اودھر نوں ٹُر پئے، پل ڈھیر ای اُچا آھا، تے فیض احمد فیض ھوراں دے اکھان موجب ”یہاں سے شہر کو دیکھو”والی گل آھی، ایتھوں شہر دا ڈھیر حصہ پیا نظریں امدا آھا،”ناروے دیاں تن وڈیاں پیداواراں وچوں ھک پیداوار بہترین لکڑی ھے،تے ایس پل سمیت کئی تھاھراں تے تہانوں ایہ لکڑی ورتی نظر آوے گی،ھور دو پیداواراں وچ،تیل تے سالمن مچھلی ھے،تے ایہ تنوں پیداواراں پوری دنیا وچ جاندیاں نیں”نعیم ھوراں ساڈی معلومات وچ وادھا کیتا۔
ایس دوران ای باقی دوست اَپڑ گئے تاں جنگل ویکھن دا پروگرام اَگے تے پئے گیا ۔
فروغنر پارک ،اوسلو شاید دنیا دا واحد پارک ھے،جتھے ھتھ دے بنے مجسمے وڈی گینتری وچ موجود نیں،282،دے نیڑے ایہ مجسمے، گستاو ویگلند تے اوھدے ساتھیاں 20،سالاں توں ودھ سمے وچ مکمل کیتے،گستاو ویگلند (1 869 (1943ع) نوں وی ھور فنکاراں وانگ ڈھیر مخالفتاں دا ساھمنا کرنا پیا،پر اوہ انسانی زندگی دے سفر نوں ایہناں مجسمیاں راھیں بیان کرن وچ کامیاب رھیا، ارشد بٹ ھوراں دے اکھان موجب تسی اوسلو آوو،تے فروگنر پارک نہ پھرو تاں سمجھو تہاڈا سفر ادھورا رھیا، ویکھن مگروں احساس ہویا جو بٹ صاحب نے ٹھیک ای آکھیا، اوس ای دن اسیں، اوسلو دی نیشنل لائبریری تے اوپیرا پھرن گئے، اوپیرا دے ہال وچ بنے کافی ہائوس وچ کافی پیتی، تے ڈھیر گلاں ھوئیاں، اتنیاں ڈھیر جو پاکستانی سیاست وی موضوع بنی ۔
ایہ لائبریری تے اوپیرا ہائوس، سمندر وچ مٹی پا کے بنائے گئے نیں، تے بہوں سوھنے نیں ۔21،اکتوبر نوں گھروں نکلدیاں دیر ھو گئی، نعیم ہوراں اپنے اک دوست نوں وی بلا لیا سی،رستے وچوں دوست سکندر گمٹی ھوراں نوں لیا، گمٹی ھوریں ہر فن مولا نیں تے جدوں گلاں کردے نیں تہانوں کئی ویکھے تیان ویکھے جہاناں دی سیر کراندن،اسیں سبھ سجن پرانے شہر وَل ٹُر گئے، جتھے بادشاہ دا میحل ویکھیا تے نال ای نال نعیم تے سکندر ھوریں ایہدی تواریخ وی بیان کردے رہے، اظہر محمود چودھری سفر توں پہلاں ای لکے دی پیڑ دا شکار ہو گئے ہائن، ہن اوھناں نوں ارام دی لوڑ آھی، سو ھک کافی ھاوس دا رُخ کیتا، اوتھے ای برادر بزرگ پرویز اقبال ھوراں وی سانوں جوائن کر لیا،ایہ ہک سوہناں کافی ہائوس آہا جتھے ناروے جناں دی وڈی گینتری موجود آہی۔ ساڈے ساہمنے ای دو بزرگ نارویجن بیٹھے سن،جیہناں وچوں اک ریڈیو پیا سندا آھا، ایس دوران ھک وڈی عمر دی زنانی منگدی ویکھی، اوسلو وچ عام طور تے انج گھٹ ای لوکی دَسدن، اوس دسیا جو اوہ بلغاریہ توں ہے تے بڑے مندے حالیں ہے۔
باہر نکلے تاں اوسلو یونیورسٹی ویکھی،خالد حسین تھتھال ھوراں جتھے تعلیم حاصل کیتی، ایہ شاندار یونیورسٹی اوسلو نیشنل تھیٹر دے نیڑے آھی، جیہدے باھر ہنری ابسن، تے ناروے دے قومی شاعر دے مجسمے نال ہور شاعراں فنکاراں دے مجسمے وی لگے ھائین،ٹھیتر ویکھن اندر گئے تاں پرویز اقبال ھوراں دے پچھن تے پتہ لگا جو مرمت وجہوں بند ھے، ایس لئی ٹر پھر کے ویکھن تے ای گذارا کیتا،کافی دیر ھو گئی آھی، تے ھک دوست تبسم شاہ ھوراں اپنے ریسٹورنٹ وچ کھانا رکھیا آھا، ظہیر عباس، پرویز اقبال، سکندر گمٹی تے اظہر محمود چودھری ھوریں گڈی تے اوتھے اپڑے، جدوں کہ میں تے نعیم طارق تھتھال ھوراں ٹرام راھیں اوتھے اپڑن دا پروگرام بنایا، نعیم ھوراں آپنے موبائل فون تے ای دو ٹکٹ مل لئے تے انج اسیں ٹرام راھیں ”حویلی”ریسٹورنٹ اپڑے، جتھے ھور سجناں دے نال چودھری اقبال وی موجود ھائن ،تبسم شاہ ھوراں بہت پر تکلف کھانا بنوایا تے کھوایا جیہدے وچ بکرے دی ران وی شامل آھی، تے کھانے دے نال نال جلیبیاں وی ڈھیر سن،کھانے مگروں 22،اکتوبر 2022ع نوں ھوون والی تقریب وچ گائی جاون والیاں آئیٹماں دی ریہرسل دا پروگرام بنیا، سکندر گمٹی تے اظہر محمود چودھری ھوراں چنگا سماں بنھیا تے مڑ کے تبسم شاہ تے پرویز اقبال ھوراں غزلاں سنائیاں، پرویز اقبال ھوراں تے”ہیر”دے وی بند سنائے تے پنجاب دا ماحول خوب بنایا ،انج ایہ یادگار شام، ڈھیر گوھڑی رات وچ بدل گئی، سبھ سجن آپنیاں سوھنیاں کسباں راھیں بھرویاں یاداں رات دے سینے تے اُلیکیاں۔
…٭…
خالد حسین تھتھال ھوراں دیاں یاداں( 3)
اخیر 22،اکتوبر 2022ع دا ڈیہنہ چڑھیا،
جس ڈینہ خالد حسین تھتھال میموریل سوسائٹی، ولوں اوھناں دیاں یاداں سانجھیاں کرن دا دیہاڑ متھیا گیا آھا،
21،اکتوبر دی شامیں اوھناں دے بھرا چودھری اعجاز ، آفتاب حسین تے بھتیجے وسیم خادم وی اوسلو اپڑ گئے ھائن، ڈھیر چر تیک اوھناں نال خالد صاحب بارے گلاں ھوندیاں رھیاں، اوھناں دی ذات سجناں، متراں دے نال نال گھر آلیاں واسطے بہوں غنیمت آھی، خاندان دے ڈھیر فیصیلیاں وچ اوھناں نوں ڈھیر عمل دخل ھوندا، گل وی سچی ھے جو اوہ بہوں محبتی جی ھائن تے محبت تے دانش نال کم تے فیصلے کردے، ایہی دانش تے لوک وزڈم سانوں اوھناں دی شاعری تے ھور لکھتاں وچ وی گوھڑے طور تے دسدی ھے،
نعیم، اظہر محمود چودھری تے میں ایہ رات نوں ای متھ بیٹھے آھے جو کل دے دیہاڑیں پروگرام دی تیاری توں وکھ ھور کجھ نہیں ھووے گا، سو انج ای ھویا،
ناشتہ خالد صاحب دے گھر رکھیا گیا آھا، جتھے خالد صاحب دی ساری فیملی، بھرا، پتر، نونہاں تے پوترے اکٹھے ھائن، بس ھک اوھناں دی ای کمی آھی تے ایس کمی نوں اسی اوھناں دیاں گلاں کر کے پوریاں کرن دا جتن کردے رھے،
کرن مان حسین دا وڈا پتر ھن دو سالاں دا ھو گیا آھا خالد ھوراں نال جیہدی ڈھیر محبت تے موہ آھا۔نکا حالے ھک ھفتے دا ای آھا، پورس مان حسین آپنے بچیاں نال موجود اھا، ناشتہ بہت ودھیا سی، سگوں کھانا آکھناں چاھیدا ھے،
شامیں پنج وجے تیک پروگرام شروع ھویا ،ھال اوسلو وسدے پاکستانیاں نال بھریا ھویا اھا، جیہدے وچ نیڑے شہراں دے لکھاری وی شامل آھے،
صدارت پنجابی تے اردو دے منے پرمنے شاعر مسعود منور ھوراں کیتی، مہماناں وجہوں اظہر محمود چودھری تے میں موجود ساں،
پروگرام دا مڈھ حسنات نعیم ولوں کیتی گء تلاوت کلام پاک نال ھویا، نظامت دے فرائض آفتاب وڑائچ ھوراں بھرویں طور تے ادا کیتے،
نعیم طارق تھتھال ھوراں مہماناں نوں جی آئیاں آکھیا تیایس عزم دا وی اظہار کیتا جو خالد حسین تھتھال میموریل سوسائٹی نہ صرف خالد صاحب دیاں ان چھپیاں کتاباں چھاپے گی بلکہ گاھے گاھے اجیہے پروگرامز دا وی پربندھ کردی رھوے گی ۔
ارشد بٹ، سکھ دیو سنگھ سدھو، طلعت محمود بٹ، چودھری اعجاز، ملک عابد، چودھری سکندر گمٹی، سروش چندر شکلا، خالد محمود، خالد سلیمی،تے پرویز اقبال ھوراں خالد ھوراں بارے آپنیاں یاداں سانجھیاں کیتیاں۔ زارا فاطمہ، سکندر گمٹی، نعیم طارق تھتھال ھوراں اوھناں دیاں نظماں پیش کیتیاں، جدوں کہ خالد صاحب دی واج وچ ریکارڈ کیتیاں گئیاں نظماں وی سنائیاں گئیاں،
کرن مان حسین تے خالد صاحب دی زوجہ محترمہ سبھ لوکاں دا شکریہ ادا کیتا، تے خالد صاحب دیاں یاداں انج ای جگاء رکھن دے آدم تے آھر دی گل کیتی،
پروگرام دے دوجے حصے وچ اظہر محمود چودھری، سکندر گمٹی ھوراں خالد حسین تھتھال دیاں نظماں گا کے سامعین توں ڈھیر داد وصول کیتی، جدوں کہ شوکت چنگیزی تے مبشر بلوچ ھوراں وی آپنے فن دا بھرواں مظاہرہ کیتا،
خالد حسین تھتھال ھوراں دیاں یاداں تے گلاں دے حوالے نال ایہ ھک یادگار شام بن گئ، جو مدتاں یاد رکھی جاوے گی، تے جس نوں اپنی سوھنی نظامت راھیں آفتاب وڑائچ ھوراں ھور سوھنیاں کر دتا۔
ایس یادگار پروگرام دا سہرا خالد صاحب دے بھائی نعیم طارق تھتھال ھوراں نوں جاندا ھے، جیہناں ایہنوں کامیاب کرن وچ ڈینہ رات ھک کیتا، اخیر تے نعیم ھوراں میاں محمد بخش ھوراں دا شعر پڑھیا،جو حسب حال آھا:
ع،پیو مرے سر ننگا ھووے، بھائی مرن کنڈ خالی
ماوان باجھ محمد بخشا، کون کرے رکھوالی
…٭…
اوسلو، دے نیڑے بوگسٹد فارم ھاوس تیسرکیدائلن کیفے۔
ھفتہ 22،اکتوبر2022ع نوں جدوں خالد صاحب دی یاد وچ ساڈیاں سدھراں تے توقعات دے مطابق ھک کامیاب پروگرام ھو گیا،تے ایہنوں اوسلو وچ وسدے لوکاں شرکت کر کے یادگار بنا دتا، تاں ساڈیاں روحاں شانت ھو گئیاں، خاص طور تے نعیم ھوراں دی ڈیہنہ رات دی محنت رنگ لے آء تاں سوچیا جو سویرے آرام نال اٹھاں گے، تے شہر توں کجھ باھر پھراں گے۔
پرویز ھوراں تے عدنان مظفر ھوراں رات نوں ای Bogstad Farmhouse تےSorkedolen Cafe جان دا متا پکا لیا ھویا آھا، سو اسی حالے خالد صاحب ھوراں دے گھر چودھری اعجاز، آفتاب حسین، وسیم شہزاد، پورس مان حسین، کرن مان حسین تے نعیم ھوراں نال پر تکلف ناشتہ کر کے نکلے ای اھیتاں عدنان مظفر ھوریں خالد صاحب دے یاران دیرینہ پرویز اقبال تے ارشد بٹ دے نال گھر دیباھر کھلوتے ھائن،اچنتے سبھ نوں ھک چنگی سوچ آئی جو کیوں نہ نعیم ھوراں نوں آج آرام آسطے گھر چھڈ دئیے تے راتیں سکندر گمٹی صاحب ھوراں دے کھانے تے اکٹھے ھویا جاوے، ایہ سوچ سبھ نوں کلک کر گئ، تے اسیں اوسلو توں کوء چار پنج میل دور بوگسٹد فارم ھاوس نوں ٹر وگے۔ راہ وچ جدوں ادب بارے گل بات ٹری تاں پتہ لگا جو اظہر محمود چودھری ھوراں سنے ارشد بٹ، پرویز اقبال تے عدنان مظفر ھوراں میرے توں ودھ کے ای چار کتاباں پڑھ رکھیاں نیں، ۔۔جدوں اسیں بہت دور نکل آئے تاں پرویز اقبال ھوراں دسیا جو میں عام طور تے ایس فارم ھاوس تے آپنے سائیکل تے آوندا ھوندا ساں، جدوں تیک اوہ چوری نہیں ھو گیا، فارم ھاوس تے اپڑ کے اوھناں سانوں اوہ ھٹ وی وکھایا جتھے اوہ آپنے محبتی سائیکل نوں ساہ دواندے ھوندے سن،
خیر ایس فارم ھاوس دی وی ھک اپنی تواریخ ھے جیہڑی کہ جانن لائق لگدی ھے۔اٹھارویں صدی توں انیسویں صدی دے ادھ وچکار تیک ایس فارم ھاوس تے ایہدے وچ قائم شاندار حویلی وچ رھن والی فیملی نے ایہنوں رکھاں، جھیلاں تے شاندار ھٹاں نال شنگھاریا، سنواریا تے اخیر ایس ای حویلی وچ جنم لیں والیاں تن بھیناں ایہنوں حکومت دے حوالے کیتا تے آپوں دور جا امریکہ وچ وسیاں، اوھناں بھنیاں دیاں مورتاں تے فارم ھاوس دی تواریخ اوتھے درج ھے تے ھن ایس فارم ھاوس نوں انج دا انج ای رکھیا گیا ھے،
فارم ھاوس دا تفصیلی جائزہ لین مگروں پتہ لگا جو ایتھے موجود کیفے تاں بند ھے اسی میں تے عدنان مظفر اندر ای موجود انٹیک شاپ وچ وڑ گئے، عدنان دے کجھ پچھن تے اندر موجود دوہیں کڑیاں بہت ھسیاں پر ایہ خیال کر کے جو میں ویکھ رھیاں، بالکل چپ چان ھوگئیاں،
ارشد بٹ ھوراں دسیا جو نیڑے ای پنڈ سرکے دالن کیفے موجود ھے، اوتھے چل کے کافی پیندے واں، کافی پیندیاں احساس ھویا جو بٹ صاحب دا مشورہ بڑا ای صائب آھا، ۔۔ایہ تجربہ وی بہوں چنگا رھیا،
مڑدیاں بٹ صاحب کسے ضروری کم وجہوں آپنے گھر ٹر گئے، اسیں نعیم طارق تھتھال ھوراں دے گھر ول نوں مونہہ کیتا، تے اگے سکندر گمٹی ھوراں دے کھانے تے اکٹھے ھون لء ٹر گئے، کھانا تے آپنی تھاھریں پر تکلف تے شاندار ھے سی پر سکندر ھوراں اوتھے سمجھو وڈی گینتری وچ پاکستانی کمیونٹی اکٹھی کیتی آھی، بہوں گپ شپ لگی تے دیر تیک کھانے تے گل بات چلدی رھی، دیر بہت ھو گء آھی تاں پرویز اقبال ھوراں تے عدنان مظفر ھوراں کہ جیہناں بہت دور جاونا آھا اجازت لے کے اگلے دن ملن دا وعدہ کیتا، قمر فاروق ھوراں دے کھانے اپر، تے اسیں ڈاکٹر ارشد سلطان ھوراں دے گھر چائے پین ٹر گئے، اوسلو دے نال ای اوھناں دے گھر ایہ چائے وی کھانے توں ودھ پر تکلف آھی ۔۔۔ایتھے جو گل بات چلی تاں رات دا ھک ای وج گیا ،انج اوسلو وچ سجناں متراں نال پہلی واریں ای سہی ھک ھور ودھیا تے یادگار ڈیہنہ لنگھیا ۔
…٭…
اوسلو؛ 23،مارچ 22ع
اوسلو وچ 24،اکتوبر دا ڈیہنہ ڈھیر مصروف گزریا، تے ایس ساری مصروفیت داسبب ڈاکٹر اظہر محمود چودھری ھوراں دے کارن آھا ،اوھناں دی ڈیمانڈ ڈھیر آھی، تے ویلے دے دامن وچ ویہل گھٹ آھی، حقی گل تاں ایہ ھے جو حالے وی اوھناں کء احباب توں معذرت کیتی،سو،ایس ڈیہنہ اسی ناشتے واسطے تصدق صاحب ھوراں دے گھر اپڑے، تے جیویں تسیں جاندے او،ایہ سارا نعیم طارق تھتھال ھوراں دیاں اگواء وچ ای ھورھیا آھا، کجھ تاں اسی وی لیٹ ھوگئے تے کجھ اوھناں وی ڈھیر بندوبست کیتا ھویا آھا، تصدق صاحب تے ڈاکٹر صاحب آپت وچ وی گلاں سانجھیاں کردے رھے،
ھن اگے اک تے قمر فاروق ھوراں آپنے ریسٹورنٹ تے سبھ سنگتیاں نوں دعوت دے رکھی آھی تے نال ای چودھری اعجاز تے آفتاب حسین صاحب( برادران خالد صاحب ) نے واپس یو کے جاونا آھا، تے اوہ سارے دوست اوتھے اکٹھے ھو چکے ھائن، سو تصدق صاحب توں آگیا لء تے قمرفاروق ھوراں دے ریسٹورنٹ اپڑے، جتھے ھک ھور پر تکلف کھانا اڈیک وچ آھا۔۔۔کھانے دوران ای اعجاز صاحب تے آفتاب صاحب خالد صاحب دے صاحب زادے پورس مان حسین نال ائیر پورٹ نکل گئے کیوں جو ویلا نکلدا جا رھیا آھا،
اگوں ھک ھور فیسی نیشن، پء اڈکدی آھی، پرویز صاحب دے فارم ھاوس دا پروگرام موجود آھا، سو سبھ سجن دو گڈیاں تے بیٹھ کے سویڈن تے ناروے دے وچکار فارم ھاوس اپڑے، اسیں عدنان مظفر ھوراں نال آھے، میں، پرویز اقبال، نعیم طارق تھتھال,ارشدبٹ ھوریں، تے باقی سجن دوجی گڈی تے۔۔۔فارم ھاوس وی کمال دی تھاھر آھا، دس مربعے دے رقبے تیپسریا فارم ھاوس ادھا سڑک دے اروار تے ادھا پار آھا، پرویز صاحب فارم ھاوس والے دوست نے جلیبیاں تے موتی چور لڈووآں دا بندوبست کیتا ھویا آھا، موسم بدل گیا آھا تے کن من وی پء ھووندی اھی، ھن رات دا کھانا جاوید صاحب ھوراں دے ریسٹورنٹ تے آھا جو اوسلو شہر دے اکا وچکار آھا، پر اوس توں پہلے ایہ طے ھویا جو جاندے ھوے رستے وچ اقبال صاحب ھوراں دے کاراں دے شو روم تے کجھ چر رکاں گے، شوروم وی کمال آھا جو نویں ماڈل دیاں گڈیاں دے نال نال ،پرانے ماڈل دیاں کجھ یونیک قسم دیاں گڈیاں وی موجود ھائن جو اقبال صاحب دے صاحب زادے دی پسند ھائن۔۔
ٹھردی شام نوں جاوید صاحب ھوراں دے ریسٹورنٹ اپڑے، جتھے کجھ ھور دوست وی موجود سن،سپیشل مچھی تے ابلیاں سبزیاں نال دوست ڈھیر گپ شپ لاندے رھے، ایہ ھک یادگار کھانا تے یادگار شام رھی، جاندے جاندے سبھ دوستان، مہربان نے ھک مورت بنائ، مورت بنان والے دوست یقینی طور تے ٹرام دی لائن تے کھلو کے مورت کھچی۔
…٭…
اوسلو۔25،اکتوبر 22ع
اصولی طور تے اوسلو وچ آج آخری دیہاڑ آھا، 26،اکتوبر نوں وآپسی آھی، اج سویلے ای ٹھٹڈ وچ وادھا ھو گیا آھا تے نال ای نکی نکی کن من وی لگ پء اھی، اج اظہر محمود چودھری ھوراں نوں آپنے کجھ عزیز رشتہ داراں ول جاوناں آھا، تے میں وی پہلے ای ڈیہنہ ازائم وسدے دوست تے پنجابی، اردو شاعر افضل عباس ھوراں نوں ملن دا وعدہ کر رکھیا سی، پر ایس توں وی پہلے سنٹر جاون دا پروگرام بن گیا، نعیم طارق ھوراں مینوں سویلے سنٹر چھوڑ کے آپ اک بہت ضروی کم کرن چلے گئے، اوتنی چر میں سنٹر وچ ٹردا پھردا وتیا، ادھے پونے گھنٹے تیکر نعیم ھوریں وآپس مڑ آئے، آپنیاں لوڑیندیاں کجھ شیواں لئیاں تے ایس ای دوران افضل عباس ھوراں دا فون آگیا جو اوھناں دا دوست مینوں لین آرھیا ھے۔
شہر دے اندر ای ھک جگہ نعیم ھوراں مینوں نوید گوندل ھوراں دی گڈی کول چھڈ دتا تے اسی گل بات کردے ای کوء ادھے گھنٹے تیک افضل عباس ھوراں دے گھر اپڑے، گھر چنگا کھلا بنایا ھویا آھا اوھناں، شاعری ادب لء لوڑیندی تنہائی وافر مقدار وچ موجود آھی، یعنی پورا شاعرانہ ماحول بنایا آھا اوھناں، تھوڑی دیر وچ ای کجھ ھور دوست وی اکھٹے ھو گئے، اسیں تھوڑی دیر آسطے اوھناں دے گھر توں دور کجھ فارم ھاوس تے جھیلاں، جنگلاں ول نکل گئے،
واپس مڑے تاں لاھور توں ای ھک دوست شامی ھوریں آئے ھوئے ھائن، جیہناں پنجابی اردو گیت سنا کے چنگی محفل جماء ھوء آھی، ڈھیر چر گپ شپ رھی۔
پر،ایس ای دوران پرویز اقبال، ارشدبٹ تے مظفر ھوریں نعیم ھوراں دے گھر اپڑ چکے ھائن، شام پئے گئی آھی تے وآپس مڑنا بہت ضروری ھو گیا آھا، نوید گوندل ھوراں دے بھنیویں مینوں وآپس چھڈ دتا، ڈاکٹر صاحب تے نعیم ھوریں تاں وآپس نہیں مڑے ھائن پر اوھناں دے ڈھیر سجن متر آونا شروع ھو گئے ھائن، چودھری غلام رضا، قمرفاروق، جاوید صاحب، فیصل نواز چودھری، تے ھورس دوستان نے پاکستان وچ پنجابی زبان دے مستقبل بارے چنگا بھلا مذاکرہ برپا کر دتا، پنجاب تے پنجابی بارے گل ایس واسطے وی لازمی طور تے چلدی رھی جو اسی جس دوست خالد حسین تھتھال ھوراں دیاں یاداں سانجھیاں کرن تے اوھدے فن تے فکر بارے گلاں کرن اکٹھیاں ھوئے ساں اوھناں دی مڈھلی محبت ای پنجابی رھی آھی، ایہ صحیح طور تے الوداعی رات بن گء جو سبھ دوستان بہت محبت تے آدر نال وداع کیتا تے اسی میں، اظہر محمود چودھری ھوراں تے نعیم طارق ھوراں رات جلد سوون دا جتن کیتا تاں جو سویلے وآپسی دا سفر ذرا بہتر طور تے کٹ جاوے۔