غزل
جان کاشمیری
ڈول پواں تے فوراً کہندا دَسّو دَسّو فیر کیہ ہویا
بات کراں تے فوراً کہندا دَسّو دَسّو فیر کیہ ہویا
ہس ہس بیشک پاگل ہوواں اُس نوں کوئی فرق نہ پیندا
رو، کے ہساں تے فوراً کہندا دَسّو دَسّو فیر کیہ ہویا
ڈاہڈا شاطر لگدا مینوں حیلے بہانے ٹھک دا مینوں
پیر پھڑاں تے فوراً کہندا دَسّو دَسّو فیر کیہ ہویا
پکّا پیڈا کوئی صحافی اُس دے اندر نظری آوے
آہ بھراں تے فوراً کہندا دَسّو دَسّو فیر کیہ ہویا
اوکڑاں نوں اوہ گھا نہ پاوے عشق سیاپے وَل نہ جاوے
جشن مناں تے فوراً کہندا دَسّو دَسّو فیر کیہ ہویا
شعر سنن دا شوق نہ ماسا جانے کیہڑی ٹوہ وچ رہندا
غزل پڑھاں تے فوراً کہندا دَسّو دَسّو فیر کیہ ہویا
فلم دے کرداراں وچوں کردار لبھ کے ہیرے ورگا
نقل کراں تے فوراً کہندا دَسّو دَسّو فیر کیہ ہویا
فیر کیہ ہویا، فیر کیہ ہویا پک گئے سُن سُن کنّ نمانے
کجھ نہ کواں تے فوراً کہندا دَسّو دَسّو فیر کیہ ہویا
جان دی پاواں خیر تے آکھاں مینوں پُلس دا مخبر لگدا
بُھل کے مِلاں تے فوراً کہندا دَسّو دَسّو فیر کیہ ہویا
