پنجاب لئی زرداری فارمولا

پنجاب وچ آن والے کجھ دناں اندر زرداری فارمولانافذ ہون دا عندیہ مل رہیا اے۔ ذرائع دے مطابق وزیراعلیٰ پنجاب چودھری پرویزالٰہی’ چودھری شجاعت حسین’ آصف علی زرداری تے مسلم لیگ ن وچ مشترکہ تے مقتدر دوستاں دی ضمانت مگروں معاملات طے پا گئے نیں۔ معاملات طے پان مگروں پنجاب اسمبلی تحلیل ہون دے امکانات بالکل معدوم ہو گئے نیں جد کہ دُوجے پاسے پی ٹی آئی دی قیادت دیاں بیٹھکاں مگروں میڈیا نال گل بات وچ بڑے کمزور انداز وچ اسمبلیاں تحلیل کرن دے فیصلے اتے قائم رہن دے عزم دا اظہار کیتا گیا۔ پی ٹی آئی قیادت دے مطابق چیئرمین عمران خان آن والے کجھ دناں وچ پنجاب تے خیبر پختوانخوا اسمبلیاں توڑن دی حتمی تریخ دے دین گے۔ وزیراعلیٰ چودھری پرویزالٰہی کھل کے کہہ چکے نیں کہ تن مہینیاں توں پہلاں اسمبلی نہیں توڑی جا سکدی اے لہٰذا پی ٹی آئی قیادت دی ہٹ دھرمی پنجاب وچ زرداری فارمولے دے چھیتی نفاذ دا کارن بن جاوے گی جہدے تحت چودھری پرویزالٰہی وزارت اعلیٰ دے منصب اتے فائز رہن گے جد کہ کابینہ وچ پیپلز پارٹی تے ن لیگ دے وزرا شامل ہون گے۔ پی ٹی آئی کابینہ تحلیل کر دتی جاوے گی۔
ایس صورتحال تے چودھری پرویزالٰہی بڑے مطمئن نیں۔ ایہو وجہ اے کہ اوہناں نے عمران خان دی مرضی دے خلاف اپنی کابینہ وچ وادھا کیتا اے تے خیال کاسترو نوں وزیر بنادتا اے۔ خیال کاسترو ہے تے پی ٹی آئی دے ممبر صوبائی اسمبلی مگرپرویزالٰہی دے دیرینہ ساتھی تے 2003دے پرویزالٰہی حکومت وچ کابینہ دا حصہ رہن والے ڈاکٹر شفیق چودھری دے برادر نسبتی نیں۔ چودھری شفیق ولوں ایہہ یقین دہانی کروائی گئی اے کہ خیال کاسترو چودھری پرویزالٰہی ولوں دتی گئی پالیسی اتے کم کرے گا بلکہ اوہ چودھری برادران دا وفادار وی رہوے گا۔ چودھری پرویزالٰہی پی ٹی آئی دے اکثر وزیراں دی من مانیاں تے نڈر کرپشن توں خاصے نالاں نظر آندے نیں۔اک محکمے دے سیکرٹری تے اینے ڈپریشن دا شکار نیں کہ اوہناں دے پرسان حال ای کوئی نظر نہیں آندا۔ حال ای وچ اوہناں نے کرپشن دی شکایتاں حدتوں تجاوز کرن تے اک ڈائریکٹر کولوں اضافی چارج واپس لیا تے وزیر موصوف اوہناں دا فیصلہ واپس کروان لئی لڑائی جھگڑے اتے اُتر آئے۔ سیکرٹری نہ منے تے اینا شور پایا کہ سیکرٹری نوں اپنا فیصلہ واپس لے کے وزیر تے اوہناں دے بھرا دے سمدھی دے سامنے ہتھیار سٹنے پئے۔ حال ای وچ ہون والے ڈی جی پی آر دے تبادلے دے متعلق کہیا جا رہیا اے کہ پی ٹی آئی ترجمان نے کروایا اے مگر ایہدے وچ نہ ای کوئی حقیقت اے نہ سچائی۔ ایہہ تبادلہ بیورو کریٹک لڑائی دی نذر ہویاای۔
محکمہ پرائمری سیکنڈری ہیلتھ وچ ملتان نال تعلق رکھن والے افسراں نوں وزیر موصوف پرکشش پوسٹاں اتے تعینات کر رہے نیں۔ محکمہ دے سیکرٹری دے کول کسے قسم دا کوئی اختیار نہیں۔ اوہناں دے سارے اختیار وزیر موصوف استعمال کردے نیں۔ سپیشل سیکرٹری پرائمری سیکرٹری ہیلتھ نوں وی حال ای وچ تعینات کیتا گیا اے۔ اوہناں دی سپیشلائزیشن وی ملتان دا ڈومیسائل اے۔ محکمہ وچ کرپشن اسمان نوں چھو رہی اے مگر سارے ارباب اختیار اکھاں بند کر کے خواب خرگوش دے مزے لٹ رہے نیں۔
چیف سیکرٹری پنجاب جہڑے کئی مہینیاں توں ڈیلی ویجز دے طور تے خدمات انجام دے رہے سن اوہناں دے عہدے دا تقدس ایہہ اے کہ اوہناں دا باقاعدہ بطور چیف سیکرٹری نوٹیفکیشن کیتا جاوے نہ کہ اوہناں نوں گھنٹے’ دناں’ مہینیاں دی ایکسٹیشن دتی جاوے۔ جہڑے صوبے دا آئینی قنونی سربراہ خود اپنی تعیناتی دے حوالے توں تذبذب دا شکار ہووے گا اوس صوبے وچ بیوروکریسی اوسے طرحاں مبینہ کرپٹ سیاستداناں دے ہتھوںپسپا ہوندی رہوے گی۔
صوبہ پُلس سربراہ دے بغیر چل رہیا اے۔ پلس دا مورال وی ڈائون جیا نظر آندا اے۔ اخیر غلام محمود ڈوگر نوں اعلیٰ عدلیہ کولوں انصاف تے مل گیا مگر اسٹیبلشمنٹ دے غیر قنونی احکامات دی تلوار وی اوہناں دے سر اتے لٹک رہی اے۔ دوجے پاسے خیبر پختوانخوا وچ پی ٹی آئی دے اپنے وزیراعلیٰ تے اوہناں دی صوبائی قیادت خیبر پختوانخوا اسمبلی توڑن دے حق وچ نہیں ۔ ایس صورتحال نے عمران خان نوں سخت مشکل وچ پا دتا اے تے اوہ ایہدے توں نکلن دا محفوظ رستہ لبھ رہے نیں۔
ایسے طرحاں اج کل توشہ خانہ کیس دے بہت چرچے نیں۔ اک دن پہلاں پچھلی خاتون اول بشریٰ بی بی تے زلفی بخاری وچ گھڑیاں ویچن دے حوالے نال آڈیو لیک ہوئی اے۔ ایس آڈیو وچ سنیا جا سکدا اے کہ بشریٰ بی بی نوں جو کہ وٹو فیملی توں نیں سید زلفی بخاری مرشد مرشد کہہ کے مخاطب کر رہے نیں۔ ایتھوں اندازہ لا لو کہ ایس دور وچ اُلٹی گنگا بہہ رہی اے۔ جے اسیں توشہ خانہ دے حوالے نال دنیا دے سب توں وڈی سلطنت رکھن والے مسلمان خلیفہ حضرت عمر فاروق دے دور اقدس توں کجھ مثالاں لکھیاں تے توشہ خانے اتے ڈاکہ پان والے حکمراناں لئی بڑی شرمندگی والی گل ہووے گی۔ حضرت عمر فاروق دے دور خلافت وچ بصرہ دے گورنر حضرت ابو موسیٰ دے خلاف شکایت آئی۔ آپ نے ابو موسیٰ نوں طلب کیتا تے کہیا:ابوموسیٰ! میں سنیا اے تہانوں جہڑے تحفے ملدے نیں اوہ تسیں خود رکھ لیندے او بیت المال وچ جمع نہیں کرا ندے۔
حضرت ابو موسیٰ بولے! حضور! اوہ تحفے مینوں ای ملدے نیں۔ حضرت عمر نے فرمایا: اوہ تحفے تہانوں نہیں بلکہ تہاڈے عہدے نوں ملدے نیں۔حضرت عمر نے حضرت ابو موسیٰ نوں گورنر دے عہدے توں معزول کیتا’ ٹاٹ دے کپڑے پوائے’ ہتھ وچ چھڑی دتی تے بیت المال توں سینکڑاں بکریاں دے کے کہیا جائو تے ہن بکریاں چرانا شروع کر دیو۔ ابو موسیٰ ہچکچان لگے تے حضرت عمر نے فرمایا: تہاڈے پیو دادا ایہو کم کردے سن’ گورنری تے حضور پاکۖ دے وسیلے نال تہانوں ملی سی۔ کافی عرصے مگروں حضرت عمر جنگل وچ گئے جتھے بکریاں چر رہیاں سن۔ حضرت ابو موسیٰ اک ٹیلے نال ٹیک لائے زرد چہرے نال بیٹھے سن کوئی پرسان حال نہیں سی۔ حضرت عمر نے فرمایا: سنائو ابو موسیٰ! ہن وی تہانوں تحفے ملدے نیں؟ حضرت ابو موسیٰ بولے: کہ حضور مینوں سمجھ آگئی اے میں اپنے موقف اتے نادم آںمینوں معاف کر دیو!!
ایہہ اوہ واقعہ اے جہنوں سانوں مشعل راہ بنانا چاہیدا اے۔