امتیاز الحق دی کتاب ادھی دعا دی مکھ وکھالی

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ خیبر پختوانخوا دے منے پرمنے شاعر امتیازالحق امتیاز دی کتاب ”ادھی دعا” دی تقریب رونمائی تے مشاعرے دا پربندھ کیتا گیا۔ تقریب داآغاز تلاوت قرآن پاک توں کیتا گیا۔ عبدالوحید بسمل’ ڈاکٹر ناصر بلوچ’ راجہ صادق اللہ’ امجد اقبال امجد تے ڈائریکٹر جنرل پلاک ڈاکٹر صغرا صدف نے کتاب بارے اظہار خیال کیتا۔ نظامت ڈاکٹر خاقان حیدر غازی نے سرانجام دتی۔
کتاب دی رونمائی مگروں مشاعرہ دا آغاز کیتا گیا جہدے وچ ملک تیمور مسعود’ وزیر برائے ثقافت پنجاب نے اچیچی رلت کیتی تے پروہنے شاعر امتیازالحق امتیاز نوں پھل پیش کیتے۔اوہناں نے کہیا کہ پنجاب حکومت فنکاراں’ ادیباں تے شاعراں دی پذیرائی لئی ہر ویلے کوشاں اے۔ ملک تیمور مسعود نے ادب و ثقافت دی ترویج دے سلسلے وچ پلاک دی کاوشاں نوں خوب سراہیا۔ مشاعرے دی صدارت منے پرمنے شاعر رائے محمد خان ناصر نے کیتی جد کہ دُوجے شاعراں وچ نذیر قیصر’ راجہ صادق اللہ’ڈاکٹر صغرا صدف، ڈاکٹر ناصر بلوچ، امتیاز الحق امتیاز، ڈاکٹر خاقان حیدر غازی، منصور آفاق، عبدالوحید بسمل، عدل منہاس لاہوری، ڈاکٹر غافر شہزاد، عرفان صادق، سرفراز صفی، صابر علی صابر، نصیر احمد، ابرار ندیم، امجد اقبال امجد، ممتاز راشد لاہوری، رانا اسد، اسلم شوق، عابد شاہ گیلانی تے جی اے نجم شامل سن۔مشاعرے وچ نظامت دے فرائض یوسف پنجابی نے سرانجام دتے۔
ڈائریکٹر جنرل پلاک ڈاکٹر صغرا صدف نے تقریب نال خطاب کردیاں کہیا کہ پلاک دوجے صوبیاں دے شاعراں’ ادیباں تے صحافیاں نوں مدعو کردا رہوے گا تاں جے ملک وچ ہم آہنگی دی فضا نوں فروغ دتا جا سکے۔ اوہناں نے وزیراعلیٰ پنجاب چودھری پرویزالٰہی دا شکریہ ادا کیتا جہناں نے ضلعی سطح تے مختلف ادبی تے ثقافتی پروگراماں دا پربندھ کرن لئی ادارے نوں اضافی بجٹ دین دا وعدہ کیتا اے۔