پِلاک تے ویسکو پی کے دی سانجھ نال نیشنل آرٹ نمائش دا پربندھ

پنجاب انسٹیٹیوٹ آف لینگویج آرٹ اینڈ کلچر،”پلاک” تے ”ویسکو پی کے” دے اشتراک نال ”نیشنل آرٹ نمائش” دا پربندھ کیتا گیا جہدا افتتاح میاں عمران مسعود’ چیئرمین وزیراعلیٰ ٹاسک فورس برائے تعلیم نے کیتا۔ ایہہ نمائش 8تا14دسمبر 2022تک جاری رہوے گی۔
ایس نمائش وچ جہناں آرٹسٹاں دے فن پارے نمائش لئی رکھے گئے نیں اوہناں وچ رابعہ ناصر، سارہ طارق، عائشہ ملک، سیدہ ماہ نور، قندیل نوید، سحر شاہد، زارہ فیصل، افشاں ناز، دانیہ ظہیر، ماہ نور چغتائی، نور العین، لاعبہ عابد، مبشرہ ندیم، ہما فاروق، فائقہ نوشین شوکت تے زائرہ ندیم شامل نیں۔
اچیچے پروہنے میاں عمران مسعود نے کہیا کہ تعلیم لئی حکومت پنجاب اہم اقدامات کر رہی اے۔ آرٹ وی تعلیم دا اہم جز اے۔ پلاک آرٹ’ کلچر تے ادب دی ترویج وچ نمایاںخدمات سرانجام دے رہیا اے۔ انشاء اللہ پلاک نوں مضبوط کرن لئی ہور اقدامات کراں گے۔ تقریب وچ منے پرمنے فلم سٹار حیدر سلطان نے وی خطاب کیتا۔
ڈائریکٹر جنرل پلاک ڈاکٹر صغرا صدف نے اچیچے پروہنے نوں جی آیاں نوں آکھدے ہوئے دسیا کہ پلاک نوجوان مصوراں نوں ہمیشہ پرموٹ کردا اے۔ آرٹ تے کلچر دی ترقی نال ای معاشرے وچ امن تے خیر دی فضا پیدا کیتی جا سکدی اے۔ منے پرمنے شاعر امجد اقبال امجد’ احسان چھینہ’ فیصل مدنی’ ٹھاکر لہوری تے دوجیاں نے اچیچی رلت کیتی۔