فرائض تک محددورہن وچ عزت

ایدھر اودھر تانک جھانک یا مداخلت دے بجائے فرائض تک محدود رہیا جاوے تے بدمزگی تے شکوے شکایتاں جنم نہ لین تے عزت و تکریم وی ملے۔ دائرہ کار توں تجاوز کرن تے انگلیاں اٹھدیاںتے تنقید دے نشتر چلدے نیں۔ چنگی گل ایہہ ہے کہ اپنے پیش رو وانگوںموجودہ عسکری قیادت نے وی سیاسی سرگرمیاںتوں وکھ رہن مگروں اپنی ساری توجہ پیشہ وارانہ امور تے دین دا پختہ تہیہ کیتا اے جہدے تے کجھ سیاستدان محض ایس وجہ توں خفا نیں کہ اوہناں نوں خدشہ اے کہ جے صحیح معنیاں وچ انج ای ہوندا رہیا تے اوہ ماضی وچ تعاون نال جیویں اقتدار حاصل کردے رہے نیں۔ مستقبل وچ تعاون حاصل نہ ہونے دی بنا تے ہمیشہ لئی اقتدار توں دور ہو سکدے نیں۔ ایسا سوچنا غلط اے سیاسی قیادت نوں عوامی تائید و حمایت حاصل کرن تے توجہ دینی چاہیدی اے۔ عسکری قیادت نوں مداخلت دے جواز فراہم کرن تے فیر عسکری قیادت دا مداخلت دے جواز تلاش کرنا غلط روایت اے جہڑی ملک دی جمہوری اقدار کمزور کرن دا کارن اے۔ا نج دی حرکتاں توں ملک دولخت ہویا۔ سارے اپنی حدودوقیود نوں پیش نظر رکھ کے فرائض سرانجام دین تے نہ صرف جمہوری قدراں مضبوط ہون گئیاںبلکہ دفاعی نوعیت دے مسئلیاں دا تدارک ہو سکدا اے۔
بار بار سیاسی تنازعیاں دا حصہ بنن توں ملک دے نیک نام تے احترام دے لائق ادارے دی ساکھ وچ کمی آئی۔ ایہہ سیاسی تنازعیاں وچ حصہ لین دا نتیجہ اے کہ ایس ویلے ملک دی ساری جماعتاں کسے نہ کسے حوالے نال شکوہ کناں نیں تے ماضی وچ عسکری قیادت نوں ہدف تنقید بناندی رہیاں نیں۔ ایہہ لائق تحسین یا قابل تعریف روش نہیں چنگی گل ایہہ ہے کہ موجودہ عسکری قیادت نے خود نوں فرائض تک محدود رکھن دا عہد دہرایا اے جہدے توں قوی امکان اے کہ عوام دی عسکری ادارے نال نہ صرف قربت بحال ہو جاوے گی بلکہ فوج نوں ماضی وانگوں حاصل عزت و احترام وی دوبارہ ویکھن نوں ملے گا۔ سیاسی قیادت نوں چاہیدا اے کہ اوہ دُوجے اداریاں ول ویکھن دے بجائے اپنے سیاسی مسئلے خود حل کرے۔ سیاسی لوک گل بات نال الجھے معاملے سلجھاندے نیں مگر بدقسمتی دی گل ایہہ اے کہ سیاسی قیادت اکثر ویلے جمہوری قدراں دے مطابق ظرف وکھان توں قاصر رہی اے۔ اج وی حکومت تے اپوزیشن وچ گل بات سلسلہ بند اے جہدی تعریف تے توصیف نہیں کیتی جا سکدی کیوں جے ایسے حالات ای دوجی قوتاں نوں دخل اندازی دا جواز فراہم کردے نیں۔ لوڑ ایس امر دی اے کہ سیاسی اختلافات اپنی جگہ مگر اک دوجے لئی گل بات دے بوہے کھلے رکھے جان۔
نویں فوجی قیادت لئی ایس ویلے سب اچھا نہیں بلکہ کئی اک چیلنج درپیش نیں۔ ایس ویلے سب توں وڈا چیلنج تے ایہہ ہے کہ ادارے دی عوام الناس وچ عزت وساکھ بحال کیتی جاوے۔ ایہدے لئی زبانی طور تے ایہہ آکھ دینا کافی نہیں کہ ہن اوہدا سیاسی تنازعیاں نال کوئی تعلق نہیں بلکہ عملی طور تے وی انج یقینی بنانا ہووے گا کہ ماضی وانگوں حکومتاں بنان تے توڑن’ انتخابی عمل نوں کسے اک فریق دے حق وچ ہموار کرن’ ذرائع ابلاغ نوں قابو کرن سنے طاقت وکھان یا مراعات تے نوازشاں دے عمل دا خاتمہ کرنا ہووے گا۔ جے انج نہیں کیتا جاندا تے محض زبانی کلامی پارسائی ظاہر کرن تے توجہ دتی جاندی اے تے عوامی اعتماد بحال نہیں ہو سکداتے شبہات دی فضا وچ کمی نہیں آ سکدی۔ ذہن وچ رکھن والی گل ایہہ اے کہ ہن سٹھ یا ستر دی دہائی نہیں کہ جو سرکاری ٹی وی دَسے گا لوک من و عن یقین کر لین گے بلکہ معلومات دے ذرائع بہت وسیع ہو چکے نیں۔ سوشل میڈیا وکھرا رائے عامہ اتے اثرانداز ہون دا ذریعہ اے جہنوں قابوکرنا ناممکنات وچ اے لہٰذا بہتر ایہہ اے کہ تن سالہ مدت ایسے عزت و وقار نال لنگھائی جاوے کہ سبکدوشی مگروں وی لوک چنگے نام توں یاد کرن۔ انج دے نتیجے ادارے دے وقار تے آئین دی بالادستی اتے سمجھوتہ نہ کرن نال ای ممکن نیں۔
جدوں آئین وچ حکومتی تے عسکری قیادت دے دائرہ کار دا واضح تعین اے تے کسے نوں وی تجاوز یا مداخلت دا کوئی حق نہیں جو اایسے کسے فعل دا مرتکب ہووے۔ اوہدے محاسبے دا باقاعدہ طریقہ کار وی موجود اے۔ تجاوز تے مداخلت دے مرتکب کسے نوں اج تک کٹہرے وچ کھڑا نہیں کیتا جا سکدا مگر ہمیشہ انج نہیں ہو سکدا۔ بہتر ایہو اے طاقتور بنن تے نیچا وکھان دا کھیڈ دوبارہ شروع نہ ہووے کیوں جے فرد دے خلاف تادیبی کارروائی نال ادارے دی بدنامی دے نال استعداد وی متاثر ہو سکدی اے۔ پہلاں ای صدی دا تہائی حصہ محاذ آرائی تے کھچا تانی دی نظر کر چکے جہدے پاروں نہ صرف اداریاں دی ساکھ مجروح ہوئی بلکہ ملک آئے دن تجربیاں دی بنا تے معاشی دلدل وچ دھنس چکیا اے۔ ہو رایسی کسے غلطی دی گنجائش نہیں۔ حکومت نوں اپنا کم کرن دتا جاوے تے عسکری قیادت اپنے فرائض اتے توجہ مرکوز کرے۔ ایہہ خوشی دی گل اے کہ نویں عسکری قیادت اپنے پیش رو دے عزم دا اعادہ کردے ہوئے خود نوں پیشہ وارانہ سرگرمیاں تک محدود رہن دی دو ٹوک گل کر رہی اے۔ ہن سیاسی قیادت دی ذمہ واری وی اے کہ اوہ اقتدار وچ آن لئی مدد حاصل کرن لئی تانک جھانک توں گریز کرے تے سیاسی فیصلے کرن دی صلاحیت پیدا کرے ۔ نیز سیاسی اختلاف رائے نوں دشمنی دے قالب وچ ڈھالن توں گریز کیتا جاوے۔
جیویں ملک لئی سولین حکومت ناگزیر تے اہم اے اوسے طرحاں وطن عزیز دے دفاع وچ پاک فوج تے آئی ایس آئی دے بہادر جواناں دا کلیدی کردار اے۔ ساریاں نوں اختیاات تے دائرہ کار دی پاسداری کرنی چاہیدی اے جدوں اک فریق دوجے فریق نوں دبان تے خود حاوی ہون دی کوشش کردا اے تے جوابی ردعمل وی آندا تے کرپشن دی راہ ہموار ہوندی اے۔ بہتر ایہوا ے انج دی صورتحال نہ پیدا ہون دتی جاوے۔جدوں آئین وچ سویلین حکومت تے دُوجے اداریاں دے اختیارات تے فرائض دی وضاحت اے تے فیر دبان تے حاوی ہون دی سرگرمیاں ناقابل فہم نیں تے انج کرن نال اداریاں نوں نیک نامی نہیں ملدی۔ جے سیاسی قیادت بیساکھیاں تلاش کرن تے اداریاں دی قیادت طاقتور بنن دے جنون توں نکل کے فرائض دی بجاآوری نوں یقینی بنان تے نہ صرف سیاسی مسئلے حل ہو سکدے نیں بلکہ ات گردی جئے ناسور’ سیاسی عدم استحکام تے معاشی مسئلیاں اتے قابو پان دی راہ ہموار ہوسکدی اے۔
ماضی دی غلطیاں دہرانا دانشمندی نہیں۔ انج دیاں غلطیاں دی سزا سقوط ڈھاکہ جئے المناک سانحے دی صورت وچ بھگت چکے۔ ایہہ چرکا محب الوطناں نوں مردے دم تک نہیں بھلے گا ملک نوں معاشی طور تے مضبوط کرنا’ امن و امان دے مسئلے حل تے اندرونی شورشاں اتے قابو پانا اے تے فرائض تک محدود رہن دا باعزت رستہ اختیار کرنا ہووے گا۔ ہر ویلے طعنے دینے یا چڑان وچ ملک و قوم دا فیدہ نہیں نقصان اے۔ اختیارات توں تجاوز دا نتیجہ اے کہ 75 ورھیاں وچ اجے تک کوئی ٹھوس تے نتیجہ خیز معاشی پالیسی نہیں بنا سکے اج وی ملک دا انحصار قرضیاں اتے اے۔ ساڈے توں مگروں آزاد ہون والے رقبے تے آبادی دے لحاظ نال چھوٹے ملک ترقی دی منزلاں طے کر گئے جد کہ ساڈے ملک وچ اج وی نظام دے حوالے نال ایہہ بحث جاری اے کہ پارلیمانی ہونی چاہیدی اے’ لاحاصل بحث وچ الجھنا ویلا ضائع کرن دے مترادف اے۔ کرپشن دی وڈی وجہ وی اختیارات توں تجاوز کرنا اے جہدے تے فوری نظرثانی تے دائرہ کار دی پاسداری ای ملک وقوم لئی سودمند اے۔ فرائض تک محدود رہن نال عزت و تکریم ہوندی اے۔ سیاسی قیادت اپنا کم کرے تے عسکری ادارہ اپنے فرائض اتے توجہ دیوے۔