آواز حق تے داستان سوہنی مہینوال دا مکھ وکھالی اکٹھ

ڈاکٹر شبیر حسین شبیر سخنوی ہوراں دیاں دو کتاباں ”آواز حق”تے ”داستان سوہنی مہینوال”دا مکھ وکھالی اکٹھ منعقد کیتا گیا۔ ایہہ اکٹھ کیفے ٹیریا ڈسٹرکٹ بار سیالکوٹ وچ چوہدری عبدالقیوم چیف ایڈیٹر بسالت سیالکوٹ، لاہورتے ہفتہ وار انکار سیالکوٹ دے آہر نال رکھیا گیا سی۔ ایہناں ای ایس پروگرام دی نقابت کیتی۔ مصنف تے کتاباں بارے میاں جاوید ایڈووکیٹ ، ملک ناظم ایڈووکیٹ، عبدالمجید صابری، محمد ایوب صابر تے اکٹھ دے آہری نے گل بات کیتی۔ عبدالمجید صابری تے اکٹھ دی صدارت کرن والے محمد ایوب صابر ہوراں اپنا پنجابی کلام وی سنایا۔ میاں جاوید ایڈووکیٹ ہوراں سوہنی مہینوال دی کہانی بڑے بھرویں طریقے نال سنائی تے شاعر موصوف دی داستان سوہنی مہینوال تے وی سوادلی گل بات کیتی۔ ڈاکٹر اکبر علی غازی مطلب راقم نوں ایس اکٹھ دا اچیچے پروہنا متھیا گیا سی ۔ راقم نے دسیا پئی میرا پی ایچ ڈی دا موضوع ای پنجابی قصہ سوہنی مہینوال دی روایت سی تے سنن والیاں تاڑیاں مار کے خشی دا وکھالا کیتا۔ ذیل وچ راقم دی اوہ گل بات پیش اے جیہڑی ایس موقعے تے راقم نے پروگرام وچ کیتی:ہومیو ڈاکٹر شبیر حسین شبیر سخنوی ہوراں دا اصل ناں شبیر حسین اے تے شبیر تخلص اے۔محمد بشیر ہوراں دے گھر پنڈ سخنیاں، ڈاکخانہ جوڑیاں تحصیل وضلع سیالکوٹ وچ 20ستمبر1963 نوں پید اہوئے۔ ایہناں مڈل تک پڑھائی گورنمنٹ ہائی سکول بوائز جوڑیاں کلاں توں کیتی تے دس جماعتاں گورنمنٹ ہائی سکول بوائز اگوکی سیالکوٹ توں 1980 وچ پاس کیتیاں۔ ڈی کام 1994 وچ گورنمنٹ کمرشل کالج قلعہ سیالکوٹ توں کیتا تے 1993 وچ ڈی ایچ ایم ایس دا امتحان علامہ اقبال ہومیو پیتھک کالج سیالکوٹ توں کیتا اے۔ہن تک ایہناں دیاں چار کتاباں چھپ چکیاں نیں:۔داستان سوہنی مہینوال، ۔صوفانہ کلام، ۔نعتیہ کلام، ۔آوازِ حقشبیر حسین شبیر سخنوی ہوراں دے اک کتابچے دا ناں صوفیانہ کلام اے۔ ایہدے سولہ صفحے نیں۔ایہدے وچ شاعر دا صوفیانہ کلام شامل اے۔دوجاکتابچہ نعتیہ کلام دے ناں نال اے۔ ایہدے وی سولہ صفحے نیں۔ صفحیاں اتے پندرہ تک نمبر لگے ہوئے نیں۔ پہلا صفحہ سرورق دا اے جدوں کہ اگے دو حمداں تے پنج شعراں دی اک غزل دی ہیئت دی نظم اٹھ جاگ شامل اے۔ ایس توں بعد تیراں نعتاں تے وچ فضائل کلمہ تے فضائل درود و سلام دے عنوان نال لکھیاں ہویاں نظماں وی شامل نیں۔ کتاب وچ کل اٹھاراں شیواں پیش کیتیاں گئیاں نیں جنھاں وچوں صرف اٹھ اردو وچ تے باقی پنجابی وچ نیں۔ایہناں دا اک اردو شعری مجموعہآواز حق دے ناں نال وی چھپ چکیااے۔ ایس مجموعے نوں زمزمہ پرنٹنگ پریس سیالکوٹ نے 2020وچ شائع کیتا۔ ایہدے وچ سخنوی ہوراں دامارچ 2016توں اگست2020تک دا کلام شامل اے۔ ایس کتاب دے 100عنوانات نیں۔ حمد و نعت تے مناقب توں شروع ہون والی ایس کتاب دا آخری عنوان علامہ محمد اقبال اے۔ تن صفحیاں اتے کھلرے ہوئے ایس عنوان ہیٹھ ایہناں ڈاکٹر علامہ محمد اقبال ہوراں بارے اپنے وچار سانجھے کیتے نیں۔ کارڈ والی جلد نال ایہدے وچ چٹا کاغط لگا ہویا اے۔ایہدے 170صفحے نیں۔ہومیو ڈاکٹر شبیر حسین شبیر سخنوی ہوراں دی جیہڑی کتاب مینوں سب توں بہتی پسند اے اوہ داستان سوہنی مہینوال اے۔ 2022وچ ایہہ کتاب دوجی واری چھپی اے ۔ نویں ایڈیشن وچ کوئی وادھا نئیں کیتا گیا۔ ایس لئی میں پہلے چھاپے بارے گل کراں گا تاں جے سجن 1995 توں وی پہلے دے شبیر حسین سخنوی توں جانو ہو سکن۔ایہناں داستان سوہنی مہینوال 30اگست 1995 نوں بدھ والے دن اپنی کتابداستان سوہنی مہینوال مکمل کیتی سی۔ ایہدی کتابت محمد حنیف بھٹی دفتر ہفت روزہانکار نہال چند سٹریٹ سیالکوٹ نے کیتی سی تے ایہدا دیباچہ پروفیسر محمد اصغر سودائی ہوراں لکھیا سی۔ایس کتاب اتے چھپن ورہا تے لکھیا ہویا نئیں پر میرے کول پئی ہوئی کتاب اتے اک سجن نوں پیش کرن دی تاریخ 11دسمبر1997 لکھی ہوئی اے جہدے توں گویڑ لایا جا سکدا اے پئی ایہہ 1995توں 1997دے وچکار چھاپے چڑھی ہووے گی۔ شاعر نے اپنی کتاب دا مڈھ روایتی انداز وچ حمد،نعت، منقبت(چار یار)، شہید اعظم (حضرت امام حسین)، عزت مآب آدم توں بعد دیس پنجاب توں بنھیا اے تے آخری سرخی وچ قائداعظم محمد علی جناح ہوراں نوں خراج عقیدت وی پیش کیتا اے۔داستان وچ قصہ سوہنی مہینوال بڑے کنجے ہوئے ڈھنگ نال بیان کیتا اے۔ ایہناں بہتے صفحے وی نئیں لائے پر گل پوری سنا دتی اے۔حیرت ہندی اے پئی اوس ویلے وی قصہ کار کنی پیڈی سوچ رکھدے سن تے اک داستان وچ صوفیانہ سوچ نوں گنھ کے پیش کرن اتے قادر سن۔ بعد وچ چھپن والی کتابصوفیانہ کلام توں اندازہ ہندا اے پئی مصنف دی سوفیانہ سوچ واہوا پرانی تے پیڈی اے۔ مصنف ہن صوفیانہ تے مذہبی پکھ بہتا مارن لگ پئے نیں پر اوہناں دی ایہہ مجازی عشق والی کتاب صدیاں تیک ایہناں نوں زندہ رکھے گی۔ایس کتاب وچ ایہناں مقولہ شاعر نوں شاعر دے قول دا عنوان دے کے پیش کیتا اے۔ ایس کتاب وچوں اک شاعر دا قول پیش اے:جِتھے چاہوے عشق اگ لا آپی پِچھے بہہ رہے مورچہ مل میاں ایہہ تخت ہزارا چھڈ کے تے گھل دیندا اے جھنگ دے ول میاں دیندا کرن آرام نئیں جھنگ وچ وی کہے چل میاں ایتھوں چل میاں اے تاں زاہداں نوں روہڑ لے جاندی میئیں عشق دی اِکو ای ٹھل میاں جیہڑا سبق پڑھائے اس تے عمل کرائے کرن دیندا ناہیں دوجی گل میاں چھپے راز نہ رہن دے پردیاں وچ کوٹھے چڑھ کھڑکاوندا ٹل میاں اِک پل چ خاک رلا دیندا بھاویں ہوئے کِڈی بل بل میاں چنگے چنگے شبیر اِس توں منگن پناہ ساتھوں ٹل میاں ساتھوں ٹل میاں ۔