نجمہ حمید ورگے لوک

مظہر برلاس

ساڈی سیاست وچ اجہے لوک نہ ہون دے برابر نیں جہڑے ہن وی اپنے پرانے آبائی محلیاں وچ رہندے نیں۔ سیاست داناں نے اپنے آپ نوں لوکاں توں دور کر لیا اے اوہ وڈے وڈے فارم ہائوسز وچ منتقل ہو گئے نیں جتھے نہ عام لوکا ںدی رسائی اے تے نہ ای اوتھے عام لوکاں نوں وڑن دتا جاندا اے۔ عام لوکاں دا لیڈر نال رشتہ سمجھن والے نوابزادہ نصراللہ خان لہور وچ ریلوے اسٹیشن دے نیڑے بوہڑوالا چوک دے کول سادہ جہے مکان وچ رہندے سن پر ہن تے لہور’ کیہ پنجاب دی حالت ایہہ وے کہ ایس صوبے دے وڈے وڈے سیاستدان ڈی ایچ اے وچ رہندے نیں۔ ووٹ عام محلیاں توں لیندے نیں ایسے رجحان پاروں دوریاں نے جنم لیا اے۔ سیاستداناں دے گھر وڈے’ گڈیاں وڈیاں ہو گئیاں نیں’ رہائشی محلے تے شاپنگ سنٹر وکھرے ہو گئے نیں ایس لئی لوک سیاستداناں توں دور ہو گئے نیں۔
نجمہ حمید لوکاں توں کدی دور نہیں سن رہندیاں۔ اوہ جدوں کونسلر بنیاں تے اوہناں دا گھر راولپنڈی دے علاقے سیٹلائٹ ٹائون وچ سی ایسے گھر وچ رہندے ہوئے اوہ ایم پی اے بنیاں’ وزیر بنیاں تے فیر سینیٹر بنیاں’ پر اوہناں نے نہ گھر بدلیا نہ لوکاں نال رویہ’ نجمہ حمید کمال خاتون سن راولپنڈی شہر وچ اوہ صرف مسلم لیگ وچ ای مقبول نہیں سن’ اوہناں دا احترام دوجیاں پارٹیاں دے لوک وی کردے سن۔ عام لوک اوہناں نال محبت کردے سن سگوں جدوں اوہ پہلی واری کونسلربنیاں تے اوہناں دی مخالف سیاسی پارٹی دے لوکاں نے وی اوہناں نوں ووٹ دتا۔ اوہ جدوں ایم پی اے بنیاں اودوں وی انج ای سی’ کجھ دن پہلاں جدوں خاکسار نے نجمہ حمید دی وفات تے کالم لکھیا تے بائو ریاض دے بیٹے شہریارریاض نے اپنے والد دے نال نجمہ حمید دی ایم پی اے بنن ویلے دیاں فوٹو شیئر کیتیاں۔
پنڈی دی پرانی سیاست دے جانن والے بائو ریاض تے حاجی مشتاق نوں چنگی طرح جان دے نیں۔ حاجی مشتاق دا بیٹا وی کجھ دن پہلاں نجمہ حمید دے گھر تے مینوں ملیا’ ایہ ساریاں گلاں ایس لئی لکھ رہیا واں کہ پنڈی دی سیاست وچ نفرت نہیں سی’ ہر پاسے محبت ای محبت سی’ ذاتی لالچ توں ہٹ کے لوک سماجی خدمت دا سوچدے سن۔ سینے وچ یاداں دا سمندر لے کے تعزیت کرن اپڑیا تے نجمہ حمید دے صاحبزادے عمر حمید اچانک لوکاں دے درمیان چوں اٹھے تے مینوں ڈرائنگ روم وچ لے گئے جتھے مریم اورنگزیب تے اوہناں دی والدہ طاہرہ اورنگزیب کجھ دوجے سیاستداناں دے نال تشریف فرما سن۔ ایتھے چوہدری بردیس طاہر’ سردار نسیم تے ضیا اللہ شاہ دی موجودگی وچ طاہرہ اورنگزیب دسن لگیاں کہ کل میاں نوازشریف دا فون آیا تے میاں صاحب دسن لگے کہ میرا نجمہ حمید نال 1983ء وچ تعارف ہویا سی پر اوہناں نے مینوں کدی کوئی ذاتی کم نہیں کہیا ہمیشہ کہندیاں کہ فلاں کڑیاں دا سکول اے اوہنوں بہتر کرنا اے فلاں عورتاں دا پارک اے اوہدی بہتری دی ضرورت اے یاں کدی کہندیاں کہ فلاں محلے وچ عورتاں دے پارک یاں سکول دی ضرورت اے بس اوہ علاقے دی ترقی دے کم ای دسدیاں سن۔ اوہناں نے کدی کوئی ذاتی کم دسیا ای نہیں نہیں تے لوکاں دے تے ذاتی کم ای ختم نہیں ہوندے۔ شاید بڑے گھٹ لوکاں نوں ایہ پتہ ہووے کہ نجمہ حمید دے صاحبزادے عمر حمید (گلو) برسلز وچ کمرشل اتاشی نیں۔ اوہ ہن گریڈ 21 دے افسر نیں گلو نے ورھیاں پہلاں سی ایس ایس کیتا سی پر نجمہ حمید نے کدی اپنے بیٹے دی پوسٹنگ لئی وی کسے نوں نہیں کہیا۔
مخدوم جاوید ہاشمی نوں صرف اک خط دا بہانہ بنا کے مشرف دور وچ پھڑ کے جیل وچ بند کر دتا گیا۔ اوہناں نے بڑیاں سختیاں برداشت کیتیاں جدوں اوہ رہا ہوئے تے میں ایس رہائی دی خوشی وچ جاوید ہاشمی دے اعزاز وچ عشائیہ دتا۔ ایس کھانے تے اے آرڈی دی قیادت تے خاص طور تے مسلم لیگی قیادت نوں سدیا۔ مینوں چنگی طرح یاد اے کہ ایس موقعے تے نجمہ حمید اک کونے وچ لے جا کے مینوں کہن لگیاں مظہرجی! تسیں کس طرح دے صحافی او ایہ کم تے سیاستدان کردے نیں جو تسیں کر رہے او بس جواباً ایہو کہہ سکیا کہ میں ڈیرے دار آدمی وی آں۔ صحافت ضرور کرنا واں’ بلیک میلنگ نہیں کردا تے نہ ای ایس شعبے دے راہیں دولت کمان دے راہ لبھنا واں۔
مشرف دور وچ گریجویشن دی شرط لائی گئی تے نجمہ حمید تے طاہرہ اورنگزیب دوویں بھیناں بالکل پریشان نہ ہوئیاں کیوں جے اوہناں دے والد سید محمد شاہ اپنی دھیاں نوں سٹھ دی دہائی وچ اعلیٰ تعلیم دلوا چکے سن ایتھے اک ہور گل دسدا جاواں کہ موجودہ وزیر اطلاعات مریم اورنگزیب جدوں 9 ورھے دیاں سن تے ملتان وچ اک حادثے پاروں اوہناں دی لت ٹُٹ گئی سی فیر اوہناں دے خاندان نے دنیا دے بہترین ڈاکٹراں توں علاج کروایا۔ سوشل میڈیا تے ایس خاندان بارے بڑیاں کہانیاں گھڑیاں گئیاں ایہناں کہانیاں وچ کوئی سچائی نہیں پر کیہ کیتا جاوے؟ ساڈے معاشرے وچ لوک جھوٹ ایس انداز وچ پھیلاندے نیں کہ سچ لگن لگ پیندا اے۔ انج دیاں ای کہانیاں طاہرہ اورنگزیب بارے سوشل میڈیا تے پھیلائیاں گئیا پر سچ غالب آ کے رہندا اے۔ سچ ایہہ وے کہ بیگم نجمہ حمید دی قل خوانی تے پورا پنڈی شہر آ گیا پتہ نہیں کتھوں کتھوں لوک آئے۔ نجمہ حمید دی وفات تے اوہناں دا پیدائشی شہر ملتان وی اداس رہیا کیوں جے اوہ ملتان دے سابق ناظم فیصل مختار دی والدہ مسز فرخ مختار تے راحت ملتانیکر دی والدہ ثریا ملتانیکر وی دکھی نظر آئیاں۔ مسز فرخ مجلس شوریٰ دی رکن رہیاں نیں جد کہ راحت بانو ملتانیکر (راتو) دی ماں ثریاملتانیکر نے گائیکی دی دنیا وچ منفرد مقام پایا۔ نجمہ حمید نال صرف پنڈی تے ملتان دے لوک ای محبت نہیں سن کردے سگوں پورے پاکستان وچ اوہناں دے چاہن والے سن خاص طور تے عورتاں اوہناں نال بہت زیادہ محبت کردیاں سن بقول عباس تابش:
اندازہ مت لگائیے بس بیٹھ جائیے
خوشبو بتائے گی پسِ دیوار کون ہے