15 ویں شریف کنجاہی ایوارڈ ز اکٹھ

ادارہ کامرانیاں کنجاہ دے پربند ہیٹھ 15ویں شریف کنجاہی ایوارڈ اکٹھ دا پربند میونسپل لائبریری میونسپل کمیٹی کنجاہ وچ کیتا گیا ۔جس وچ پورے ملک چوں 10علمی، ادبی، صحافتی، سماجی تے فنون لطیفہ وچ خدمات دیون والی مہان شخصیات نوں شریف کنجاہی ایوارڈ 2022 پیش کیتا گیا۔ اکٹھ دی صدارت خطہ پوٹھوہار دے معروف شاعر، مصنف جناب زمان اختر آف سوہاوہ نے کیتی، جد کہ مہمان خصوصی مانو چک پھالیہ دی پسندیدہ سماجی شخصیت جناب صوبیدار (ر)مرزارشید احمد سابق کونسلر سن تے مہمان اعزاز خطہ پوٹھوہار دے معروف محقق، مصنف، روحانی شخصیت جناب اشتیاق احمد نوشاہی آف گوجر خاں وی اسٹیج تے براجمان سن۔ ایہناں توں اَڈ اسٹیج تے براجمان معزز مہماناں نوں منیر صابری کنجاہی، منیر چشتی کنجاہی، اشرف نازک، محمد بلال بٹ، لیاقت گڈگور تے ماسٹر شوکت ہوراں نیں پنجاب دی روایتی پگاں بنھیاں۔
اکٹھ دے مجمان احسان فیصل کنجاہی نیں مہان مہماناں نوں جی آیاں نوں آکھیا تے شریف کنجاہی ایوارڈ دے حوالے نال روشنی پائی،تے آکھیا کہ2008 توں لے کے ہن تک ایہہ سلسلہ جاری اے تے اسیں اپنے دوستاں دی مہربانی نال ایہ سلسلہ جاری رکھاں گے۔ ایوارڈ حاصل کرن والیاں وچ محبوب علی محبوب (چورہ وزیر آباد)محمد افضال رانجھا (کنجاہ)، چوہدری محمد اشرف وڑائچ(واہ کینٹ)،فراست اللہ چٹھہ (گوجرانوالہ) ،محمد یعقوب فردوسی(بھلوال)میڈم ڈاکٹر ماریہ چوہدری(گجرات) ڈاکٹر طارق محمود آکاش (ڈسکہ)،احسن رضا بھٹی (لاہور)،پروفیسر ڈاکٹر محمد ایوب(فیصل آباد)،مظفر سعیدی (راجن پور)شامل نیں۔
اکٹھ وچ محمد بلال بٹ سرپرست پریس کلب کنجاہ، چوہدری محمد سلیم صدر آرائیں موومنٹ و رہنما مسلم لیگ ن کنجاہ،ماسٹر شوکت محمود پرنسپل گورنمنٹ اسلامیہ ہائی سکول کنجاہ تے ایوارڈ حاصل کرن والیاں شخصیات نے اپنے اپنے خیالات دا اظہار کردے ہوئے آکھیا کہ احسان فیصل کنجاہی شریف کنجاہی دا پتر ثابت ہویا اے جو2008توں لے کے اج تک علم و ادب دی بڑھوتری لئی تے لکھن والیاں دی حوصلہ افزائی لئی ایوارڈ دے رہ ہیا اے اس دے نال باقی دوست وی ڈھیر مانتا دے حقدار نیں شریف کنجاہی دی علمی تے ادبی خدمات دا اک زمانہ معترف اے اسیں اج اوہناں دیاں کتاباں توں فیدہ حاصل کر رئے آں اوہ کنجاہ دا فخر سن، فخر ہین تے فخر رہین گے۔ حاکم وقت نوں اوہناں دے ادبی کماں نوں نویں نسل تک پہنچان دا بندوبست کرنا چاہی دا اے۔
اکٹھ وچ جہڑے شاعراں نے اپنا اپنا کلام پیش کیتا اوہناں وچ منیر صابری کنجاہی، اشرف نازک کنجاہی، منیر چشتی کنجاہی، سعید اختر سعید، سخی کنجاہی، لیاقت گڈگور، بشیر ملنگ، نوید عباس کنجاہی، عمران سہیل، شریف فیاض وزیر آبادی، محمد بلال بٹ، اشرف رنگیلا، محمد سلیم رحمانی شامل نیں جد کہ اکٹھ وچ پیر محمد سلیم رحمانی آستانہ عالیہ پیر نتھا شاہ بخاری، میری عبدالباقی سابق منیجر نیشنل بینک، عبدالحفیظ صراف جنرل سیکرٹری پریس کلب کنجاہ، محمد سلیم آرائیں صدر آرائیں موومنٹ کنجاہ، ماسٹر شوکت محمودپرنسپل اسلامیہ ہائی سکول کنجاہی، ماسٹر محمد احسان کھوکھر، با ماجد سماجی شخصیت، عمران نمبردار، حکیم لیاقت بٹ ہمدرد ویلفیئر سوسائٹی کنجاہ، محمد منیر آرائیں ایم ای او، علی احمد گجراتی، چیئر مین دل دریا تنظیم پاکستان، توں علاوہ ڈاکٹر آفتاب کپور، ڈاکٹر امجد محمود وڑائچ، عمران قیصر صحافی، شاہ زیب باجوہ صحافی، محمد اسلم، قمر رشید چشتی سینئر صحافی، محمد یوسف بٹ، معیز منیر، غلام شبیر بٹ، محمد غوث، عدیل خاں، چوہدری مظہر طارق آف پھالیہ، چوہدری امتیاز نمبردارآف مانگا منڈی، ماسٹر عظمت قریشی تے ہور لوگ وی شامل سن۔ اکٹھ دے آخر تے کھانا پیش کیتا گیا تے نال قہوہ پلایا گیا اکٹھ دے مجمان احسان فیصل کنجاہی نے معزز مہماناں دا شکریہ ادا کردے ہوئے اوہناں نوں رب راکھا آکھیا ۔