ایہہ احمقاں دی صدی اے

شکیل امجد صادق

اک طالب علم نے اپنے ہم جماعت دی کنڈ تے اک کاغذ چپکا دتا جہدے تے لکھیا سی ”I m Stupid” تے باقی ہم جماعت منڈیاں نوں کہیا کہ لڑکے نوں نہ دسن۔ سارے ہسن لگ پئے’ دوپہر نوں ریاضی دی کلاس شروع ہوئی تے اوہناں دے استاد نے بورڈ تے اک مشکل سوال لکھیا۔ سٹیکر والے لڑکے توں علاوہ کوئی وی اوہدا جواب نہیں سی دے سکدا اوہ بورڈ ول ودھیا تے مسئلہ حل کیتا۔ استاد نے کلاس نوں کہیا کہ اوہ اوہدے لئی تاڑیاں مارن تے اوہدی کنڈ تے موجود کاغذ ہٹا دین۔ ٹیچر نے لڑکے نوں کہیا: ”انج لگدا اے کہ توں ایس کاغذبارے نہیں جان دا جو تیرے ہم جماعتیاں نے تیری کنڈ تے چموڑیا اے”۔
فیر استاد نے باقی کلاس ول ویکھیا تے کہیا ”ایس توں پہلاں کہ میں تہانوں سزا دیواں میں تہانوں دو گلاں دسنا واں۔ سب توں پہلے’ زندگی بھر لوک تہاڈی ترقی نوں روکن لئی بہت سارے برے الفاظ دے نال تہاڈے تے لیبل لان گے جے تہاڈے ہم جماعت نوں ایس سٹیکر بارے پتہ ہوندا تے اوہ سوال دا جواب دین لئی نہ اٹھدا۔ ایہ واضح اے کہ تہاڈے ساریاں دے وچ ایہدا وفادار دوست نہیں جو اوہنوں سٹیکر بارے دسے۔ ایہدے نال کوئی فرق نہیں پیندا کہ تہاڈے کنے دوست نیں۔ ایہ اوہ وفاداری اے جو تسیں اپنے دوستاں دے نال ونڈدے او جو اہم اے۔ تسیں اپنے اُتے لائے کسے وی لیبل تے دھیان نہیں دینا۔ عمران خان نوں وی توشہ خانہ دی گھڑی تے دھیان نہیں دینا چاہیدا کیوں جے ایہ احمقاں دی صدی اے۔ ایس ملک وچ سب کجھ اوہ ممکن اے جو تسیں سوچ وی نہیں سکدے۔
ایہ 1998ء دی گل اے مصر وچ مشہور ڈانسر فیفی عبدو دا طوطی بولدا سی’ حکومتی ایواناں توں بزنس کلاس تک فیفی دے ٹھمکیاں دی زد وچ سن۔ قاہرہ دے اک فائیوسٹاک ہوٹل وچ اپنے جلوے وکھان دے بعد فیفی نے شراب پین لئی بار دا رخ کیتا۔ شراب زیادہ پین دی وجہ نال اوہ اپنے ہوش کھو بیٹھی تے بار وچ ہنگامہ کھڑا کر دتا۔ ہوٹل وچ وی آئی پیز دی سکیورٹی تے مامور پولیس افسر چھیتی اوتھے اپڑ گیا۔ اوہنے بڑے مودبانہ انداز وچ فیفی نوں کہیا کہ تسیں اک مشہور شخصیت او ایس طرح دیاں حرکتاں تہانوں زیب نہیں دیندیاں۔ ایہ افسر خوش مزاجی تے خوش اخلاقی لئی مشہور سن ایس ہوٹل وچ قیام کرن والی اہم شخصیات اوہناں نوں پسند کردیاں سن۔ اوہ اک فرض شناس افسر سن۔ فیفی نوں پولیس افسر دی مداخلت پسند نہ آئی اوہنے نشے دی حالت وچ ای ایواناں دا نمبر گھمایا تے پولیس افسر دا کدھرے دور تبادلہ کروایا۔ اگلی شام جدوں فیفی دا نشہ اتریا اوہنے ہوٹل انتظامیہ توں پولیس افسر دے بارے پچھیا اوہنوں دسیا گیا کہ تسیں اوہدا تبادلہ کروایا اے۔ فیفی نے فون گھمایا سرکار نے پولیس افسر نوں واپس ہوٹل رپورٹ کرن دا حکم دتا۔ پولیس افسر نے پولیس دے متعلقہ وزیر نوں اپنا استعفیٰ پیش کیتا۔ اوہناں دیہاڑیاں وجدی صالح وزیر ہوندے سن وزیر نے حیرت نال پولیس افسر توں پچھیا کہ ایس ہوٹل وچ ڈیوٹی کرن لئی پولیس افسر وڈیاں وڈیاں سفارشاں کرواندے نیں تہانوں دوجا موقع ملیا پر تسیں استعفیٰ پیش کر رہے او؟ پولیس افسر نے تریخی جواب دتا ”جس ملک وچ اک شرابی عورت دے اشارے تے ٹرانسفر تے اک رقاصہ دے حکم تے واپسی ہووے اوس ملک وچ کسے غیرت مند دا رہنا عار تے عیب اے”۔ کجھ مہینے بعد اوس افسر نے مصر ای چھڈ دتا اج اوہ امریکہ وچ اپنے بڑھاپے دے دن خوشی نال گزار رہیا اے۔
ایہ صرف اک مصر دی کہانی نہیں ایہ ساڈے ہر غریب دیس دی کہانی اے۔ ایہ میرے ملک دی وی کہانی اے پر ساڈی انفرادی تے اجتماعی غیرت مر چکی اے۔ عدالت جنہوں مرضی این آر او دیوے کیوں جے ایہ احمقاں دی صدی اے تے ساڈی غیرت مر چکی اے۔ رانا ثناء اللہ اپنے کیساں توں بری ہون یاں سلمان شہباز واپس آوے یاں نوازشریف دے کیس ختم ہون۔ سانوں کوئی غرض نہیں کیوں جے ساڈی غیرت مر چکی اے تے ایہ احمقاں دی صدی اے۔ ایتھے سب کجھ ممکن اے۔٭