نوازشریف تے عمران خان دی سیاست دا موازنہ

ورلڈکپ جتن توں پہلاں تے مگروں عمران خان نہ صرف پاکستان بلکہ دنیا وچ شہرت دی بلندیاں نوں چھو رہے سن۔ شہرت تے عزت دا معیار ایہہ سی کہ ملکہ برطانیہ عمران خان دے اعزاز وچ شاہی پروٹوکول وچ عشائیہ دین اتے فخر محسوس کردیاں سن۔ شاہی خاندان دی بہو لیڈی ڈایانا جہدی اک جھلک ویکھن لئی دنیا مر مٹن نوں تیار سی نہ صرف برطانیہ بلکہ پاکستان آ کے شوکت خانم لئی فنڈ ریزنگ کرنا باعث اعزاز سمجھدیاں سن۔ دنیائے کرکٹ دے سپر سٹارز نال خان دیاں دوستیاں سن۔ اچانک اک موڑ آیا تے دنیادے نامور ترین خاندان گولڈ سمتھ جہڑے اپنی دولت دے لحاظ نال پہلے نمبراں وچ شمار ہوندے نیں نے جمائما گولڈ سمتھ نوں عمران خان دے نال ویاہ دے بندھن وچ بنھ دتا۔ ایس ویاہ دا پوری دنیا وچ چرچا ہویا۔ جمائما نال ویاہ دے کجھ عرصہ مگروں سیاست وچ وی انٹری دے ماری۔ ایہہ سی عمران خان دے عروج دا مختصر تعارف۔
دُوجے پاسے نواز شریف سن جہناں دی سیاست وچ انٹری توں پہلاں اوہناں دے حلقہ احباب وچ بھولی جوس والا’ نفیس دہی بھلے’ ریگل چکڑ چنے’ گوالمنڈی دے کجھ کونسلر وغیرہ وغیرہ سن۔ نواز شریف ہمیشہ اوہناں دے آسے پاسے گُھمدے رہے۔مگروں اوہ وی سیاست
دے بھنور وچ پھس گئے۔ نواز شریف ہولی ہولی بلندی دا سفر طے کرن لگے۔ تن واری وزارت عظمیٰ دا منصب اپنی دانشمندی راہیں حاصل کیتا جہدے دوران اوہناں دے کریڈٹ اتے ملک وچ موٹرویز دے جال وچھائے گئے۔ لاتعداد عوامی تے فلاحی منصوبے لیائے گئے عوام دے مفادات نوں ترجیح دتی گئی۔ معیشت نوں مستحکم رکھن وچ اپنے قریبی عزیز تے دوست اسحاق ڈار کولوں مدد لیندے رہے۔ مہنگائی دے جن نوں قابو رکھیا۔نواز شریف دے چھوٹے بھرا شہباز شریف ملک وچ نمبرون گڈ ایڈمنسٹریڈ ے طور تے سامنے آئے۔ اوہناں نے وی اپنے وڈے بھرا دے قدم نال قدم ملاندے ہوئے پنجاب وچ بجلی گھراں دا قیام لاتعداد پل’ سڑکاں’ ہسپتالاں دا قیام عمل وچ لیاندے رہے۔
جدید علاج تے تعلیم لئی وی گرانقدر خدمات انجام دتیاں۔ نواز شریف نے اوس ویلے پوری دنیا نوں حیرانگی وچ پا دتا جدوں بہترین سفارتکاری کردیاں ہوئیاں دشمن ملک بھارت دی پرتشدد سیاسی پارٹی توں منتخب وزیراعظم اٹل بہاری واجپائی نوں لہور وچ لیا کے اوس مقام تے کھڑا کیتا جہدی بھارت ہمیشہ توں نفی کردا آیا اے۔ یادداشت دی کتاب وچ اٹل بہاری واجپائی نے قرارداد پاکستان تے مستحکم پاکستان دی ریاست نوں مینار پاکستان دے سائے تھلے تسلیم کر لیا۔ جدوں کارگل وچ مشکلاں ودھیاں تے اک فون کال اتے بغیر کسے اپوائنٹمنٹ دے اوس ویلے دے اریکی صدر بل کلنٹن نوں ثالث دے طور تے شامل کیتا تے ایٹمی جنگ وَل ودھدے ہوئے قدماں نوں روک لیا۔ سفارتکاری دے حالات ایہہ سن کہ ہن دنیا دی اک وڈی حقیقت طاقتور ریاست چین دے صدر نواز شریف دے ذاتی دوست نیں۔ ساڈے بھیڑے حالات وچ ہمیشہ کم آن والا برادر اسلامی ملک سعودی عرب دے بادشاہ ترکیہ دے صدر اردگان’ قطر دے فرمانروا تے بہت سارے سربراہ مملکت نواز شریف’ شہباز شریف دے قریبی دوستاں وچ شمار ہوندے نیں۔ ایہہ سی گوالمنڈی توں سربراہ مملکت نال دوستیاں دا حال و احوال۔
ہن عمران خان دی گل کرنے آں ۔ جدوں نواز شریف گولمنڈی وچ گھمیا کردا سی تے عمران دی عزت سربراہ مملکت کردے سن۔تازہ ترین حالات ایہہ نیں کہ ملکہ برطانیہ’ شہزادہ چارلس’ گولڈ سمتھ خاندان دے داماد نے ترقی دے بجائے تنزلی ول سفر طے کرنا شروع کردتا۔ جمائما
گولڈ سمتھ نال علیحدگی مگروں اک عام جئی نیوز کاسٹر نال ویاہ رچا لیا۔ اوہناں نال اختلافات مگروں گولڈ سمتھ فیملی نال شروع ہون والا سفر ہن آخرکار پاکپتن جا کے پایہ تکمیل تک پہنچیا تے اوہناں نے اک روحانی پیردی شہرت رکھن والی خاتون بشریٰ بی بی نال ویاہ کر لیا۔ اوہناں دی پچھلی بیوی ریحام خان دی کتاب دے حوالے نال کجھ لکھو تے عمران خان دی شخصیت مزید واضح ہو جاوے گی مگر ریحام دی کتاب دے حوالے دین مگروں اوہ جہڑا سلوک کسے وی صحافی نال کر سکدے نیں اوہدا منہ بولدا ثبوت محسن بیگ دی شکل وچ ساڈے سامنے اے کہ اوہناں نوں کیویں انتقام دا نشانہ بنایا گیا۔
عمران خان دی سفارتکاری دے حالات ایہہ نیں کہ ساڈے بھیڑے ویلے وچ آن والے برادر ملک دے محمد بن سلمان گھڑی ویچن توں پہلاں ای اینے ناراض ہوئے کہ عمران خان نوں امریکہ جان لئی دتا اپنا رائل طیارہ فضا وچ اڑان بھردے ای واپس اتروا لیا تے حکم دتا کہ
ہن کمرشل فلائٹ وچ واپس جائو جہدے تے سونے اتے سہاگہ دے مترادف گھڑی والا واقع ہو گیا۔ امریکہ دے خلاف اینیاں تقریراں کیتیاں کہ قریب سی کہ جے اوہناں دی حکومت ہوندی تے سانوں بیل آئوٹ پیکج نہ ملدا تے اسیں ڈیفالٹ کر جاندے۔ یو این اسمبلی دے اجلاس وچ صدر اردگان تے مہاتیر محمد نوں اسلامی ملکاں دی سربراہی وچ کانفرنس بلان لئی آمادہ کیتا جدوں اوہناں نے اعلان کردتا تے سعودیہ ولوں اک پیغام وصول ہون مگروں موصوف صاف مکر گئے۔ یعنی اوہناں ملکاں دے سربراہان نوں شدید ناراض کردتا۔ اپنے دور حکومت دے عروج تے کشمیر بغیر کسے حیل وحجت دے انڈیا دے حوالے کردتا۔ افغانستان تے ایران نال وی تعلقات انتہائی کشیدہ سن۔ امریکہ نوں ناراض کر کے روس دے دورے تے گئے۔ روس نے یوکرائن اتے اوسے دن حملہ کردتا۔ یورپی یونین نے پاکستان دی روسی حمایت سمجھی تے اوہدا بائیکاٹ کردتا۔ کجھ عرصہ پہلاں روس دے دورے تے جان دا بیان دے کے وڈی غلطی سی ایس طرحاں روس نوں وی ناراض کر لیا۔ نواز شریف حکومت ڈالر 120روپے اتے چھڈ کے گئی۔ موصوف نے 150 توں کراس کرا دتا۔ 70 ورھیاں وچ جنی حکومتاں نے قرضے لیتے اوہناں تون دوگنا چار سالہ دور وچ قرض لیتا۔ سب کجھ تباہ و برباد کردتا۔ ملک دا چار سالہ دور وچ دیوالیہ کڈ دتا گیا۔ نااہل ترین بندے نوں وزیراعلیٰ پنجاب لا کے پنجاب نوں وی تباہ و برباد کردتا۔ لٹ مار عام رہی۔ ہن تسیں خود اندازہ لا سکدے او کہ ساڈے ملک لئی کہڑا حکمران بہتراے۔