ماموں میر شکاری تے فیتے دی پیمائش

شاہ جی نے پچھیا کہ کدی تسیں ماموں میرشکاری دا قصہ سنیا اے؟ ساڈی جانے بلا’ اسیں انکار کر دتا۔ شاہ جی کہن لگے تے فیر سنو’ ماموں دا اصلی ناں تے اللہ جانے کیہ سی پر علاقے دے لوک اوہناں نوں اوہناں دے منہ تے ماموں میر شکاری تے غیرموجودگی وچ ماموں گپ باز دے ناں توں پکاردے تے یاد کردے سن۔ اوہ محلے وچ بڑے مقبول تے ہردلعزیز اپنے اک بھانجے دی وجہ نال جگت ماموں بن چکے سن۔ ہر چھوٹا وڈا اوہناں نوں ماموں کہندا سی۔ ماموں دی شخصیت وچ تن چیزاں بڑیاں اہم سن۔ پہلی ایہ کہ ماموں اک اوسط درجے دے ریٹائرڈ شکاری سن پر اوہناں دی زندگی دا محور اوہناں دے شکار دے قصے سن۔ دوجی ایہ کہ اوہ بڑی چھیتی غصے وچ آ جاندے سن پر اوہناں دا غصہ فوراً ٹھنڈا وی ہو جاندا سی تے تریجی ایہ کہ اوہ بڑے اعلیٰ قسم دے گپ باز سن تے ایہ ساریاں گپاں شکار دے قصیاں تے مبنی سن۔ گپ اوہ اینی لمی چھڈدے کہ لوکاں دا ہاسا نکل جاندا جہدے تے اوہ فوراً غصے وچ آ جاندے پر سامعین فوراً ای اپنے ہاسے دا کوئی الٹا سدھا جواز گھڑ لیندے تے ماموں اوہدے تے جھٹ یقین کر کے اپن غصہ تھک دیندے تے قصہ اوتھوں فیر شروع کر دیندے۔
ماموں دے بقول اوہ جم کاربٹ تے کینتھ اینڈرسن توں ڈھیر وڈے تے بہادر شکاری سن پر اوہ ہر دو حضرات صرف انگریز ہون دی وجہ نال عالمی سطح تے مشہور و معروف ہو گئے پر ماموں نے اوہناں توں وڈے وڈے شکار کیتے سن تے اوہناں انگریزاں دے مقابلے وچ اوہناں دے کول دوربین لگی رائفلاں دی تھاں صرف بارہ بور دی بندوق سی جہدے نال اوہناں نے اپنے محیرالعقول شکاری کارنامے سرانجام دتے سگوں ایس کارتوساں والی بارہ بور دی بندوق’ جو آپ اوہناں نے اپنے ہتھاں نال بنائی سی توں پہلے اوہ توڑے دار بندوق جہنوں اوہ ”بھرمار” کہندے سن۔ دو انچ موٹی بیرل والی اپنی ایس قدیم توڑے دار بندوق نال جو دنیا وچ صرف دو عدد تیار ہوئیاں سن اوہناں نے درجناں ہاتھی’ گینڈے تے اک عدد دریائی گھوڑا وی ماریا سی۔ ایہناں قصیاں دے درمیان کوئی نہ کوئی شریر سامع جزوی سوالات وی جڑ دیندا۔ کسے نے پچھیا کہ تسیں دریائی گھوڑا کتھے شکار کیتا تے ماموں نے بلاتوقف دس دتا کہ اوہناں نے ایہ دریائی گھوڑا دریائے جمنا وچ ماریا سی۔ کسے ستم ظریف نے کہہ دتا کہ دریائی گھوڑے تے صرف افریقہ وچ پائے جاندے نیں۔ بس ماموں نوں غصہ آ گیا تے اوہناں نے اگے قصہ سنان توں انکار کر دتا۔ ساریاں نے منت سماجت کرن دے نال نال سوال کرن والے معترض دی ڈانٹ پھٹکار کیتی تے ماموں قصہ دوبارہ شروع کرن تے راضی ہو گئے۔
باقی تے سب خیر سی پر محلے دے نوجوان بعد وچ بھانجے نوں اوہدے ماموں دی گپ بازی’ لاف زنی تے لمی لمی چھڈن تے چھیڑدے۔ تنگ آ کے بھانجے نے اپنے ماموں نوں کہیا کہ اوہ اپنے شکار دے قصے سناندے ہوئے محتاط قسم دی پیمائش تے وزن بیان کیتا کرن۔ ہن بھلا دس سیر تن پائو تے دو چھٹانک دا تیتر وی ہوندا اے؟ ماموں ہمیشہ وزن سیراں وچ تے پیمائش گزاں تے فٹاں وچ دسدے سن۔ بقول اوہناں دے جدوں اوہناں نے اپنے شکار کردہ جانوراں دا وزن یاں پیمائش کیتی سی اودوں وزن تے پیمائش دے ایہو پیمانے لاگو سن۔ اک دن تے حد ای ہو گئی ماموں میرشکاری اپنی پوری ترنگ وچ سن تے اُتوں بالاں نے کسے خوفناک شکار دے قصے دا مطالبہ کر دتا۔ اودوں نوجواناں دے کول موبائل تے ہے نہیں سن کہ ایہدے وچ مگن رہندے۔ لے دے کے ایسے قسم دیاں مصروفیات سن۔ ماموں نے قصہ سنانا شروع کر دتا۔ ماڑی قسمت کہ اوس دن اوس محفل وچ بھانجا بذات خود موجود سی۔ ہن ماموں حسب معمول لمی لمی چھڈ رہے سن۔ ماموں دی ہر گپ تے لڑکے اپنے دوست نوں ویکھ کے مسکرا رہے سن تے بھانجا اپنے ماموں دی لاف زنی تے دوستاں دیاں حرکتاں توں شرمندہ ہو رہیا سی۔ اُتوں ماموں مبالغے دی حد کر دتی۔ کہن لگے انھیری رات سی’ ہتھ نوں ہتھ وی نظریں نہیں سی آ رہیا جنگل وچ ہو دا عالم سی تے پتہ وی ڈگدا تے دل دہل جاندا سی۔ بس انھیرا ای انھیرا۔ اچانک میرے چارے پاسے چمکدیاں اکھاں نمودار ہو گئیاں۔ میں اک نظر وچ اندازہ لا لیا کہ ایہ بارہ سو اکھاں نیں نہ اک گھٹ نہ اک ودھ۔ پہلے تے میں تھوڑا گھبرایا کہ کیہ کراں؟ فیر میں اپنے شکاری تھیلے چوں دو کلو بارود کڈھیا تے گن کے باراں سو چھرے اپنی توڑے دار بندوق وچ بھر لئے کسے نے بارود دی مقدار تے چھریاں دی گنتی تے انگلی اٹھائی تے اوہنوں جھڑک کے کہن لگے: میں کئی واری پہلے وی دس چکیا واں کہ ایس قسم دی دوانچ دہانے والی اج تک صرف دو ای بندوقاں بنیاں نیں۔ میں باراں سو چھرے تے دو کلو بارود بھریا’ شت لئی تے فائر کر دتا۔ باراں دیاں باراں سو اکھاں ایس اک فائر نال مر گئیاں۔ کسے نے پچھیا ماموں’ ایہ باراں سو اکھاں ہے کہدیاں سن؟ ماموں غصے نال کہن لگے اینے انھیرے وچ مینوں اپنیاں اکھاں وکھائی نہیں سن دے رہیاں بھلا میں ایہ کیویں ویکھدا کہ ایہ کہدیاں اکھاں نیں؟ بس ایناں پتہ اے کہ ساریاں دیاں ساریاں مر گئیاں۔ سارے لڑکے ماموں دے سامنے تے چپ رہے پر بعد وچ اوہناں نے بھانجے دا رج کے مذاق اڑایا۔٭