نویں سیٹ اپ توں امید

سعد اللہ شاہ

لفظ ٹوٹے لب اظہار تک آتے آتے
مر گئے ہم ترے معیار تک آتے آتے
ایک لمحے کی مسافت ہی بہت ہوتی ہے
ہم کو تو عمر لگی یار تک آتے آتے
لگدا اے محبوب کجھ زیادہ ای ناراض ہو گیا اے۔ انج ایہ وی عجب یار اے کہ عاشق تے محبوب دا منصب بدلدا رہندا اے۔ جہڑا کل محبوب سی اج اوہ عاشق نوں منا رہیا اے تے جگہ بدل چکی اے۔ ایہ سب کجھ چلدا رہندا اے۔ ہن ساڈے عمران خان بڑے ای پیار پیارے تے نیارے بیان دے رہے نیں کہ نویں آرمی چیف توں اوہ پرامید نیں تے فرماندے نیں کہ قوم نال ہووے تے فوج مضبوط ہوندی اے۔ میرا خیال اے کہ اوہناں دا پیغام کوئی زیادہ الجھیا ہویا نہیں۔ کہنا اوہ ایہ چاہندے نیں کہ فوج نوں قوم دی ضرورت اے تے قوم ایس ویلے خان صاحب دے نال اے۔ یقینا جواباً کوئی کجھ نہ کجھ تے سوچے گا۔ خان صاحب نے ایہ وی کہیا اے کہ جنرل عاصم حافظ قرآن نیں تے اوہناں دی بڑی تعریف سنی اے۔ چلو ایہ وی تے تعریف کرن دا اک انداز اے۔ خان صاحب نے امرالمعروف کردے ہوئے جنرل صاحب نوں امربالمعروف کرن دی ترغیب دتی اے۔ ملک دا سوچن نوں کہیا اے۔ ظاہر اے جنرل عاصم صاحب فوج دی کمانڈ سنبھالے ہوئے نیں تے دشمن تے نظر رکھے ہوئے نیں کہ ایہو اوہناں دا منصب اے۔ اپنے دوست مرحوم ناہید شاہد دا شعر یاد آ گیا:
میرے بدن پر غموں کا لباس رہنے دے
میں اپنے گھر میں ہوں مجھ کو اداس رہنے دے
ملکی حالات تے گل کرن توں پہلاں ایس گل نوں نظرانداز نہیں کیتا جا سکدا کہ عسکری تبدیلی دے نال دشمن کوئی نہ کوئی گل ضرور کھلاندا اے ۔ فوج دی ذمہ داری اے اپنے شہریاں دی حفاظت کرنا’ یقینا فوج اوسے صورتحال نوں سنبھالدی اے جو فرض دی حیثیت رکھدی اے۔ ظاہر اے اجہی صورتحال وچ قوم کتھے پچھے ہٹے گی۔ سیاسی صورتحال وی بہتری ول جا رہی اے۔ مثلاً صادق سنجرانی نے آکھیا اے کہ عمران خان اسمبلی وچ واپس آ جان۔ سب توں چنگا تے صائب مشورہ اے۔ میدان وچ رہ کے ای مقابلہ کرنا چاہیدا اے تے فیر طاقتوراں دے نال وی تے تسیں ای تعلقات خراب کیتے۔ لیان والے کارکردگی وی ویکھدے نیں کہ ہر صورت وچ لوکاں نوں مطمئن کرنا ضروری ہوندا اے جتھوں تک کارکردگی دا تعلق اے تے اوہ پی ڈی ایم حکومت دی کارکردگی دس دین۔ میرا خیال اے کہ خان صاحب ہن ٹھیک سمت تے صحیح تھاں آ گئے نیں کہ اک تے او ہ انٹراپارٹی الیکشن کرا رہے نیں پر ایس توں وی پہلاں اوہناں نوں کجھ نہ کجھ تنظیم سازی دا سوچنا چاہیدا اے۔ تنظیم سازی توں مینوں طلال چوہدری یادآ گئے کہ اوہ وی بڑی سنجیدگی نال کم کر رہے نیں۔ اوہناں نے گورنر نوں مل کے وزیراعظم نال ملاقات وی کیتی اے۔ ایس توں علاوہ ن لیگ نے وی ضلعیاں وچ کنونشن شروع کر دتے نیں۔ یقینا خان صاحب نے اوہناں نوں فکرمند تے کر دتا اے کہ اوہناں نے لوکاں نوں کجھ وی ریلیف نہیں دتا سگوں مہنگائی تریہہ فیصد توں اُتے جا چکی اے۔ جو وی لوکاں تے کم کرے گا فائدے وچ رہوے گا۔ وجہ ایہ کہ لانگ مارچ تے احتجاج اک حد تک تے چنگا لگدا اے پر جدوں لوک تنگ آ جان تے مقصد فوت ہو جاندا اے۔ ایسے لئی عمران خان نے ہدایتاں بدل دتیاں نیں۔
ہن پی ٹی آئی نوں نظر اٹھا کے کسے ہور تھاں رکھنی ہووے گی۔ اوہو جو ہیر رانجھے دا ڈائیلاگ اے کہ منورظریف نوں رانجھے تے نظر رکھن نوں کہیا گیا تے اوہنے کہیا ایہ کہڑی گل اے اساں ہیر توں اکھ چک کے تے رانجھے تے رکھ دینے آں۔ خان صاحب سنجیدگی نال پارٹی معاملات تے دھیان دین دی ضرورت اے۔ اوہناں تے نہ مشکل گھڑی اے ہن تے وفاقی وزیر طنزاً پچھن لگے نیں کہ کیہ خان صاحب نے اسمبلیاں تحلیل کر دتیاں؟ اوہ تے پرویزالٰہی نوں یقین دوان دی کوشش کر رہے آں کہ جے اوہ انج کر دین تے وزیراعلیٰ اوہو رہن گے پر سیاست وچ سارے جان دے نیں کہ رات گئی تے بات گئی۔ صرف پرویزالٰہی نہیں اسمبلی وچ کئی پرویزالٰہی نیں۔ سچی گل تے ایہہ وے کہ خان صاحب دا کم ودھدا جا رہیا اے۔ ہن ویکھو ناں کہ رانا ثناء اللہ دا منشیات دا کیس عدالت نے ختم کر دتا اے اوہ باعزت بری ہوچکے نیں۔ ایس توں علاوہ سلمان شہباز دا واپس آ جانا حالات دی غماضی کر رہیا اے کہ سب سکھ چین اے پر اجے تک وی نوازشریف واپس نہیں آ رہے سگوں کجھ وڈے لوک اوہناں نوں ملن لندن جا رہے نیں۔ یاں فیر سارے حالات اوہناں دے آن توں پہلاں ٹھیک کیتے جا رہے نیں۔
نوازشریف تے کہہ رہے نیں کہ اگوں اوہ دوتہائی اکثریت حاصل کرن گے۔ سمجھ وچ نہیں آندا کہ ایتھے جدوں معاملات ٹھیک ہون تے آندے نیں تے ہر پاسیوں فیور ملدی جاندی اے۔ سیاست وچ لچک ضروری اے پر لچک وی اوس ویلے جدوں اوہدی لوڑ ہووے۔ سنیا اے کہ ہن چوہدری شجاعت نوازشریف نوں ملن لندن جان گے۔ ظاہر اے کجھ اپنی زبان وچ اوہناں نوں سمجھان گے۔ دوریاں دا ودھنا تے قربتاں دا نیڑے ہو جانا وی کھیڈ دا ای حصہ اے۔ جو وی اصل مقابلہ پی ٹی آئی دا ن لیگ نال ای اے تے اوہ وی خان صاحب تے نظر رکھے ہوئے نیں۔ میں سعدرفیق دا بیان ویکھ رہیا سی جہدے وچ اوہناں آکھیا خان صاحب دا نویں سیٹ اپ توں امید رکھنا شرمناک گل اے۔ اک شعر دے نال اجازت:
رنجش کار زیاں دربدری تنہائی
اور دشمن بھی خفا تیرے گنہگار کے ساتھ