تہاڈے مسئلیاں دا حل ہُن اک کلک دی دوری اُتے گو پنجاب ایپ

تکنیکی ترقی وچ پنجاب دا نہ رکن والا سفر جاری اے’ سفر دا بیانیہ پیش کیتا جاوے تے ایہہ اک نہ رکن والا سلسلہ اے جہڑا ہر ودھدے قدم دے نال ٹیکنالوجی دی دنیا وچ سنگ میل طے کر رہیا اے۔ چاہے گل صحت دی ہووے’ حفاظت دی یا گھر بیٹھے لائسنس دے حصول دی’ ہن ہر مسئلہ اک آن لائن کلک دی دوری تے اے۔ دنیا وچ ٹیکنالوجی دے ودھدے ہوئے استعمال نال نہ صرف انسانی زندگی آسان ہوئی اے بلکہ ویلے دی بچت تے ویلے تے مسئلیاں دا حل وی ممکن ہویا اے۔ ایہناں ودھدے قدماں دے نال جے موہنڈھے نال موہنڈھا نہ رلایا جاوے تے ایس صدی وچ رہن دا کیہ فیدا۔ ایسے قدم دی پیروی حکومت پنجاب ہمیشہ وانگوں کر رہی اے۔
ایسے طرحاں جے گل کیتی جاوے پنجاب وچ صحت دی تے تقریباً دو سو توں ودھ بیماریاں ایسیاں نیں جہڑیاں کہ خوراک دے نامناسب تے غیر معیاری ہون دی وجہ نال جان لیوا ثابت ہوندیاں نیں جہناں توں تقریباً ہر سال موتاں ہوندیاں نیں۔ ایس غیر معیاری فروغ نوں روکن لئی پنجاب حکومت نے بڑی واری پنجاب فوڈ اتھارٹی دے تحت غیر معیاری اشیائے خورونوش نوں تلف وی کیتا تے پنجاب وچ خوراک دے معیار نوں بہتر کرن دی کوشش وی جاری رکھی۔
فوڈ کنٹرول ہووے یا کسے شکایت اتے ردعمل پنجاب فوڈ اتھارٹی نے ہمیشہ ای اپنے مشن نوں اہمیت دتی اے مگر جتھے نظام اے اوتھے خرابی وی موجو رہندی اے جیویں کہ چھوٹے درجے دی نان رجسٹرڈ فیکٹریاں ہون یا دکاناں جہڑیاں کہ اپنے نان رجسٹر ہون دی وجہ نال فیدا چک رہیاں سن اوہناں جئے عناصر نوں قابو وچ لیان لئی کجھ ایسے اقدامات پنجاب حکومت نے کیتے نیں جہناں وچوں اک موبائل فوڈ لیب چیکنگ اے۔ہن جتھوں تک گل رہی اوہناں عناصر دے پس پردہ رہن دی تے کسے وی قسم دی سفارش اتے کوئی ردعمل نہیں تے نہ ای ہن اوہناں دے ریلیف اتے سمجھوتہ کیتا جاوے گا۔ محکمہ پنجاب فوڈا تھارٹی دی ایس کاوش نال نہ صرف پین داصاف پانی بلکہ خوراک دی چیکنگ وی یقینی بنائی جاوے گی جہدے توں بہت ساریاں غیر معیاری اشیائے خورونوش بنان والی کمپنیاں نوں طلب کر کے معیار دی بہتری لئی نوٹس تے جرمانے وی کیتے جا چکے نیں۔
خوراک تے پانی دے نال نال محکمہ فوڈ اتھارٹی پنجاب دے معیار نوں وی اپنے ٹارگٹ وچ رکھیا ہویا اے نہ صرف خوراک بلکہ دوائیاں وی معیاری ہون تے بیماریاں دی ہر سال افزائش نہیں ہووے گی۔ پنجاب فوڈ اتھارٹی دے ایس مشن توں نہ صرف خوراک بلکہ ساری ضروری شیواں جنہاں وچ خوراک توں دوائی تک ساریاں نوں چیک اینڈ کنٹرول کیتا جاوے گا جہدے توں صحت دے نال بیماریاں دی وی روک تھام ہووے گی۔
دوجے پاسے پنجاب حکومت دے عوام لئی سنگ میل ثابت ہون والے اک ہور ایسے اقدام دی گل کراں گے جہدے توں ہن تک 4لکھ شکایتاں دی نہ صرف ویلے تے سنوائی ہوئی بلکہ کئی حادثیاں جہناں وچ لہور دے چھ وڈے دھماکیاں وچ ملوث افراد دی 48 گھنٹیاں وچ گرفتاری عمل وچ لیائی گئی۔ اسیں ذکر کررہے آں پنجاب دے سیف سٹی کیمریاں دا جہدے توں عالمی سطح اتے لہور سٹریٹ کرائم لسٹ وچ بہتری ول جا رہیا اے۔ واضح طور تے ایس خوش آئند قدم نے ہن تک 395 تلاش گمشدہ بالاں تے 6948 وہیکلز دی نشاندہی کیتی اے۔ ایس سنگ میل ثابت ہون والے پراجیکٹ نوں پنجاب دے ہر ڈسٹرکٹ وچ قائم کرن دی نہ صرف منظوری ملی اے بلکہ ہر ڈسٹرکٹ وچ ایس پراجیکٹ اتے عملدرآمد وی جاری اے۔
ایس پراجیکٹ نال جڑی اک ایسی تکنیکی ایپ دا وی ذکر ضروری اے جہدے توں کہ ہن تک کئی واقعیاں وچ جہناں وچ زنانیاں جہڑیاں خود نوں غیر محفوظ تصور کردیاں نیں’ اوہناں نوں وی تحفظ اوہناں دے بوہے تک فراہم کیتا گیا اے۔ ویمن سیفٹی ایپ دے ذریعے ہن کسے وی قسم دے درپیش مسئلے جہناں وچ زنانیاں نوں ہراساں کرن والے عناصر دے خلاف کارروائی توں لے کے ویلے سر مدد دی سہولت موجود اے۔ ایس ایپ نال نہ صرف تہاڈی مدد کیتی جا سکدی اے بلکہ تسیں جے اپنا پتہ نہ وی دس سکو تے تہاڈے تک مدد تہاڈا موجودہ مقام ٹریس کر کے وی فراہم کیتی جاندی اے۔ اک کلک نال ہن تہاڈا تحفظ یقینی اے۔ ایہدے نال ای تہاڈی 15 نوں ملائی جان والی کال وی بنا کسے قسم دے چارجز دے اے تاں جے عوام تک تحفظ نوں یقینی تے ویلے تے ممکن بنایا جا سکے۔
صحت ہووے’ تحفظ ہووے یا کسے وی طرحاں دا سرکاری کم ہن اک پلیٹ فارم اتے موجود اے۔ ہن تعریف کیتی جاوے گو پنجاب ایپ جئے منفرد منصوبے دی تے ایہہ ایپ پنجاب دے لوکاں نوں آن لائن خدمات پیش کرن لئی بنائی گئی اے۔ خاص طور تے اوہناں زنانیاں لئی جہڑی ایس سروسز نوں اپنے گھر دی چار دیواری وچ رہندے ہوئیاں آرام نال استعمال کر سکدیاں نیں۔ جہناں وچ ڈرائیور دے لائسنس دی تجدید تے پاسپورٹ لئی درخواست دین توں لے کے رجسٹری دے اجرا تک ہر سہولت نوں اک دائری وچ بنھیا گیا اے۔ ایہہ ایپ حکومتی پروگراماں تے ضوابط دے نال نال پاکستان وچ ہون والی خبراں تے واقعات بارے حالیہ معلومات وی دیندی اے۔ ایہہ ایپ پاکستان وچ رہن والے ہر بندے لئی ڈائون لوڈ کرنا ضروری اے کیوں جے ایہہ مختلف حکام لئی ہنگامی رابطہ نمبراں دی اک آسان فہرست وی فراہم کردی اے۔
ایس ایپ دے استعمال وچ پرائیویٹ سکولاں دی رجسٹریشن تے پنجاب احساس راشن پروگرام لئی سائن اپ کرنا وی شامل اے۔ مختلف پروگراماں تے تعلیمی اداریاں دی فہرستاں جہناں وچ صارف تعلیمی اداریاں تے پروگراماں بارے آگاہی’ ادارے دی قسم یا پروگرام دی قسم بارے آگاہی حاصل کر سکدے نیں۔ ایپ ہر سکول تے پروگرام بارے گہرائی نال معلومات فراہم کردی اے۔ بشمول رابطے دی تفصیلات’ داخلے دے معیار’ اخراجات تے کورس دی پیشکس’ آن لائن داخلہ درخواست جمع کروانا ہن صارفین لئی ممکن اے جہڑے ایس ایپ توں ای اپنے فارم مکمل کر کے بھیج سکدے نیں۔ ہور اوہناں وچ نصاب کتاباں’نصاب تے لیکچر نوٹ وغیرہ وی شامل نیں۔
گو پنجاب ایپ صحت توں متعلق متعدد خدمات وی فراہم کردی اے۔ ایس ایپ دے استعمال کرن والیاں نوں صحت دی دیکھ بھال فراہم کرن والیاں دی اک وڈی تعداد تک رسائی حاصل اے۔ بشمول ڈاکٹرز’ نرساں تے دوجے طبی ماہرین۔ ہور صارفین اپوائنٹمنٹس شیڈول کر سکدے نیں۔ اپنے میڈیکل ریکارڈز تک رسائی حاصل کر سکدے نیں تے اپنی صحت دی بہتری دی نگرانی کر سکدے نیں۔
ایہہ ایپ نجی کمپنیاں تے اداریاں جہناں وچ چھوٹے کاروباری اداریاں توں لے کے اہم عالمی کارپوریشنز تک اے ساریاں دی مدد کردیاں ہوئیاںانٹر اپرینیورشپ نوں فروغ دینا تے کاروباری برادری نوں آن لائن خدمات پیش کرنا اے۔ ایہہ ایپ متعدد خدمات فراہم کردی اے جیویں کمپنی فائلنگ’ ٹیکس فائلنگ تے بزنس رجسٹریشن سب اک ای ایپ اتے موجود اے۔
گو پنجاب ایپ دے ذریعے ساڈے ملک وچ آن والے سیاحواں دی مدد لئی مختلف قسم دی آن لائن خدمات دستیاب نیں۔ ایہناں وچ ویزا تے سفری معلومات’ ہوٹل تے سفری سہولتاں دا انتخاب تے دوجی سیاحتی سرگرمیاں شامل نیں۔ ایہہ ایپ تہاڈے پاکستان وچ ہون دے دوران پیش آن والی کسے وی ہنگامی صورتحال لئی 24گھنٹے مدد فراہم کردی اے۔
پنجاب حکومت دی پیش کردہ خدمات وچ اک سرکاری معلوماتی پورٹل جہڑا ساری ضروری سہولتاں اک پلیٹ فارم اتے یکجا کر کے اوہناں دی فراہمی نوں یقینی بناندی اے’ ایہہ اک بے مثال تے منفرد منصوبہ اے جہدے نال صرف باآسانی بلکہ رشوت خوری نوں وی یقینی طور تے ختم کرن دا پربندھ کیتا گیا اے۔
پنجاب حکومت دے گوایپ جئے منصوبے توںنہ صرف سرکاری دفتر بلکہ عام عوام دی وی سہولت ہووے گی’ ہن پنجاب دا ہر شہری اپنے موبائل توں بل’ پاسپورٹ تے لائسنس توں لے کے ٹیکس تک دی معلومات گھر بیٹھے اک کلک اتے حاصل کر سکے گا۔ پنجاب حکومت نے بڑی واری ایس طرحاں دے منصوبے متعارف کروائے نیں جہناں توں عوام دی فلاح و بہبود تے خوشحالی ممکن ہو سکے۔ مستقبل وچ وی پنجاب حکومت دی کاوشاں نال بہت سارے نویں تے منفرد منصوبے پایہ تکمیل تک پہنچائے جان گے۔