غزل
مجاہد اقبال مجاہد
ربا تیریاں بے پرواہیاں خورے کیوں؟
لکھیاں ساڈے لیکھ جدائیاں خورے کیوں؟
پتراں نالوں کردیاں بھاویں پیار ودھیرا
فیر وی دھیاں ہون پرائیاں خورے کیوں؟
جیوں جیوں دنیا ویکھ ترقی کردی پئی
تیوں تیوں ودھدیاں جان برائیاں خورے کیوں؟
اک ویلا سی پل وی نہیں ساں وکھرے رہندے
مدتاں توں نہیں خبراں آئیاں خورے کیوں؟
روگ اجیہا لا چھڈیا تیرے ہجراں نیں
اثر نہ کردیاں کجھ دوائیاں خورے کیوں؟
میں اوہنوں آکھیا سی توں چنگا لگنا ایں
کھریاں کھریاں اوس آکھ سنائیاں خورے کیوں؟
