مکمل آباد کاری تک چین نال نہیں بیٹھاں گے،شہبازشریف
خیر پور( پنجابی میڈیا گروپ)وزیراعظم شہبازشریف نے آکھیا اے کہ سیلاب دی آفت بوہت وڈی آزمائش سی، پورے ملک وچ تباہی پھیلی، متاثرین دی بحالی دا عمل اجے تک جاری اے آخری شخص دی مکمل آباد کاری تک چین نال نہیں بیٹھاں گے۔وزیراعظم شہباز شریف نے خیرپور تے تعلقہ کوٹ ڈیجی دے سیلاب متاثرہ گائوں پیر گدو دے اک دن دے دورے اُتے گل بات کردیاں ہویاں آکھیا کہ مشکل ویلے وچ بھرپور امداد اُتے عالمی برادری دے شکر گزارہاں، اوہناں نے آکھیا کہ توشہ خانہ کسی دی جاگیر نہیں، عمران خان نے پاکستان نوں ملن والے تحفے فروخت کرکے ملکی وقار دا اُتے لایا، خانہ کعبہ دے ماڈل والی گھڑی نوں وی ویچ دتا، اینج دے شخص نے خانہ کعبہ دے ماڈل دی وی پرواہ نہیں کیتی۔شہباز شریف نے آکھیا اے کہ دوست ملکاں توں کروڑاں، ارباں ملن والے تحفیاں نوںویچ کے اوہناں نے پیسے جیب وچ پا لئے، کاش ایہ تحفے ویچ کے سیلاب متاثرین اُتے لائے جاندے تے اوہناں نوں شاباش دیندا ۔شہباز شریف دا کہنا سی کہ پاکستان دا کاربن گیس دی اخراج وچ حصہ اک فیصد توں وی گھٹ اے، پچھلی حکومت مسائل چھڈ کے گئی اسیں ایس نال نمٹ رہے ساں، جنوری وچ جنیوا اندر ڈونرز کانفرنس ہوئے گی، جنیوا کانفرنس وچ متاثرین دی آواز نوں چُکاں گا، سیلاب متاثرین دی بحالی قومی خدمت اے، ایس لئی جذبے دے نال ہی کم کرنا ہوئے گا، متاثرین دی بحالی لئی ارباں، کھرباں روپے دی لوڑ اے۔وزیر اعظم دا کہنا سی کہ2 کروڑ لوگ اج وی امداد دے مستحق نیں،90لکھ بچے اج وی دوایاں، خوراک دے مستحق نیں، بلوچستان، خیبر پختونخوا وچ متاثرین کھلے آسمان تھلے راہ ویکھ رہے نیں، بحالی دا کم کافی حد تک ہو چکیا اے لیکن اج وی دادو، خیرپوردے علاقیاں وچ پانی کھڑا اے،80لکھ خاندان تاحال پانی توں متاثرنیں۔
