ماضی توں کدوں سبق سکھاں گے؟

دنیا دا کوئی وی کم تسیں فطرت تے آئین دے خلاف کرو گے تے اوہدا انجام بھیڑا ای ہووے گا۔ اسیں اج اک اجہے والد دی کہانی پیش کر رہے آں جو اپنے منصب نال انصاف نہیں سی کردا۔ اوہ مٹھی گرم کیتے بناں کم نہیں سی کردا۔ اوس والد نے اپنے بچیاں نوں شاہانہ انداز وچ پالیا’ بچیاں نوں تعلیم دوائی پر تربیت نہ کر سکیا۔ اوہ ریٹائرڈ ہویا’ آرام دہ آخرت لئی دین ول آ گیا۔ عبادت دے نال حج تے عمرہ وی ہویا پر اوہنوں اپنے ای گھر وچ عزت و احترام نہ ملیا۔ اولاد نافرمان نکلی بچے اوہدا مذاق اڑاندے’ فقرے کسدے۔ حج تے جان لگا تے کہیا گیا نو سو چوہے کھا کے بجلی حج نوں چلی۔ بیوی گل گل تے بے عزت کردی۔ بچے اوہدے جیندے جی جائیداد لئی کورٹ کچہری وچ جا اپڑے۔ ایہہ سب کجھ ایس لئی ہو رہیا ہوندا اے کہ ایہ کرپشن کردا رہیا۔ بالآخر دنیا توں خالی ہتھ چلا گیا۔ اولاد جنازے وچ وی شامل نہ ہوئی۔ اللہ کریم سانوں سب نوں ایس طرح دی اذیت ناک صورتحال توں دور رکھے۔ (آمین) ساڈے آل دوالے اجیہا حال لوکاں تے اداریاں دا وڈیاں دا دکھائی دیندا اے۔ قیام پاکستان دے بعد اجہی اک دو تن نہیں ان گنت کہانیاں نیں۔ ساڈے وڈے ایوان اقتدار وچ آ کے اوہ کجھ کردے رہے نیں جہدی اجازت آئین دیندا سی نہ قنون۔ کئی صاحبان حلف دی خلاف ورزی وی فخریہ انداز وچ کردے۔ بقول فراز:
ہر شخص خدا بننے کی کوشش میں ہے مصروف
لیکن یہ تماشا بھی خدا دیکھ رہا ہے
کجھ صاحبان اختیار تے خدا بن کے حکمرانیاں کردے رہے۔ اج مادر وطن بزرگی دی عمر نوں اپڑ گیا اے۔ بچے جوان ہو چکے’ سب کجھ ویکھدے آئے نیں کہ ساڈے وڈے لوکاںدے نال کیہ کجھ کردے رہے نیں۔ کیویں دے سیاستدان بناند ے رہے’ کیویں دے حکمران آندے رہے۔ پہلے لیان والیاں توں ڈردے سی پر ہن نہیں۔ اج دی نسل پچھدی اے کہ س اڈے ایتھے کدوں الیکشن فیئر تے فری ہوئے سن؟ ایتھے تے الیکشن نہیں سلیکشن ہوندی رہی۔ لوکاں نوں ہمیشہ دھوکھے وچ رکھیا گیا۔ الیکشن دا ٹچ دین لئی ڈبے ووٹ نال بھر دتے جاندے۔ ایہدے بعد رزلٹ سنا دتے جاندے۔ انج دا ای حال انصاف دے اداریاں دا وی رہیا۔ ذوالفقارعلی بھٹو نوں سزا دین دا پس منظر ساریاں نوں یاد اے۔ سزا دین والے مکافات عمل دا وی شکار ہوئے۔ کسے دے جنازے وچ مکھیاں حملہ آور ہوئیاں تے کوئی پچھتاوے دا زخم سہندا رہیا۔ اوہ حکمران جنہے پھانسی دوان دی راہ پدھری کیتی آپ وی پس منظر وچ چلا گیا پر اسیں فیر کوئی سبق نہ سکھیا۔ اسیں ایہ خواب سمجھ کے بھُل جانے آں۔ عمران خان وی ایسے طرح اقتدار وچ لیائے گئے۔ خان صاحب جدوں تک اقتدار وچ رہے باجوہ صاحب دے گن گاندے رہے پر جدوں اوہناں نوں گھر دا راہ وکھایا گیا تے اوہ سینہ تان کے کھڑے ہو گئے ایہ اوہناں نوں وکھووکھ ناواں نال پکاردے رہے۔ جنرل باجوہ صاحب نے جاندے جاندے خطاب وچ فرمایا کہ ساڈے توں غلطیاں ہوئیاں پر اگوں انج نہیں ہووے گا ایہدے تے تحریک انصاف نے یوم نجات دا غلغلہ وی بلند کیتا
لیفٹیننٹ جنرل فیض حمید وی جسٹس شوکت صدیقی نال ملاقات کردے رہے۔ ہن جنرل عاصم منیر سپہ سالار نیں۔ امید اے جنرل عاصم منیر 2025ء وچ نویں چیف نوں سادگی نال چھڑی دین دی رسم ادا کرن گے جیویں گوانڈھی ملک وچ ایہ ایونٹ ہوندا اے۔ بڑا چنگا ہووے جنرل باجوہ وانگوں دوجے ادارے وی قوم نوں انج دای پیغام دین کہ ہن انج نہیں ہووے گا۔ جنرل عاصم منیر دے سینے وچ قرآن کریم اے انشاء اللہ اوہ برکتاں تے رحمتاں نال قوم دا سر فخر نال بلند کردے رہن گے۔٭