نعت شریف

عبدالحمید نظامی

لگ جاوے میری بیڑی وی کنڈھے یارسول اللہ
سدا جھلدے رہن تیرے ای جھنڈے یارسول اللہ
کرم میرے تے فرمائو میں صدقہ پاواں یاراں دا
جو یاری لا کے تیرے نال ہنڈے یارسول اللہ
جے ایسے سال ویکھاں میں سبز گُنبد تے جالی نوں
ہو جاون گے میرے ارمان ٹھنڈے یارسول اللہ
اوہناں نے بانگ نہیں آکھی تے رب وی دن چڑھایا نہیں
جو ماراں مار کے عشقے نے پھنڈے یارسول اللہ
تیرے عاشق ایتھے اوتھے آقا امر ہو گئے نیں
جناں نوں جام اُلفت دے نے ونڈے یارسول اللہ
اوہ جنت دے نہیں طالب نظامی بھل گئے دُنیا نوں
تیرے عشق حقیقی دے جو چنڈے یارسول اللہ