سکالر شپ پروگرام میرٹ تے دتے جان گے، کسے دی مداخلت نہیں ہووے گی: وزیراعظم

اسلام آباد: وزیراعظم عمران خان آکھیا اے سکالر شپ پروگرام میرٹ تے دتے جان گے، کسے دی مداخلت نہیں ہووے گی۔ ایس سکالر شپ پروگرام توں بہترین ٹیلنٹ ساہمنے آوے گا۔ احساس سکالر شپ پروگرام دی تقریب نال خطاب کردیاں وزیراعظم دا کہنا سی ہائر ایجوکیشن کمیشن دے فنڈز ودھائے جان گے جد کہ ہر ورھے50ہزار سکالر شپ دتے جان گے۔

جیویں جیویں وسائل ودھدے جان گے، سکالر شپ پروگرام وچ وادھا ہوندا جاوے گا۔ نوجوان ساڈا سب توں وڈا اثاثہ نیں۔ نوجواناں نوں چنگی تعلیم تے ہنر وی سکھاواں گے۔ اسیں مدینہ منورہ دے ماڈل ول جا رہے آں۔ غریب لوکاں نوں عدالتاں توں مفت انصاف دواواں گے۔ ایہدے علاوہ پنجاب وچ 60لکھ خانداناں نوں ہیلتھ کارڈ دے چکے آں۔ ایس ہیلتھ کارڈ نال کسے وی ہسپتال توں علاج کرایا جا سکدا اے جد کہ غریباں لئی پناہ گاہواں وچ وی وادھا کیتا جا رہیا اے۔

معاشرہ اودوں ای مہذب کہلاندا اے جہدے وچ غریب دا احساس کیتا جاوے۔ مدینہ دی ریاست نے کمزور طبقے دی ذمہ داری لئی۔ ریاست مدینہ دی اصل روح احساس دی سی پر ساڈے ملک وچ چھوٹے جہے طبقے نوں ساریاں سہولتاں ملدیاں نیں۔ ساڈی کوشش اے جہڑے لوک معاشرے توں پچھے رہ گئے اوہناں نوں اُتے لیایئے۔