پرویز الٰہی،عمران خان تے قائد اعظم

پچھلے جمعہ نوں دو خوشیاں اک نال ملیاں۔ پہلی ایہہ کہ پنجاب سرکار بحال کردتی گئی اے تے دوجی اک مقررہ وقت تک وزیراعلیٰ پنجاب چودھری پرویزالٰہی اسمبلی نہیں توڑ سکن گے۔ عدالت نوں نال ایہہ وی حکم دے دینا چاہیدا سی کہ ہن چونکہ اگلا سال نویں انتخابات دا اے ایس لئی کوئی وی جماعت اسمبلیاں دے نال کھلواڑ نہ کرے۔ پچھلے وزیراعظم نے جمعہ نوں پنجاب تے کے پی کے اسمبلی توڑن دا اعلان کر رکھیا سی۔ پنجاب اسمبلی نوں عدالت دے حکم اتے بچا لیا گیا لیکن حیرت ایس گل اتے ہو رہی اے کہ ساڈے پچھلے وزیراعظم جناب عمران خان صاحب کے پی کے اسمبلی توڑن دا اعلان کیوں نہ کروا سکے۔ کیہ اسمبلی اسمبلی’ سڑکاں بند کرنا تے کاروباری طبقے نوں پریشان کرن لئی پنجاب ای نظر آندا اے۔ کیہ ای چنگا ہوندا اے کہ عدم اعتماد مگروں
جناب خان قومی اسمبلی توں استعفیٰ نہ دیندے بلکہ ملک دے سب توں وڈے قنون ساز ادارے وچ موجود رہ کے عوام دے حقوق دی جنگ لڑدے۔ لیکن لگدا اے خان صاحب دی نظر وچ صرف اوہناں دا وزیراعظم دی سیٹ اتے موجود ہونا ای جمہوریت اے۔ اوہ صرف خود نوں ای نیک پاک تے محب وطن سمجھدے نیں باقی سب اوہناں دی نظر وچ کرپٹ’ بدعنوان تے چور لٹیرے نیں۔ جناب عمران خان نوں جیویںوزیراعظم رہندے ہوئے ایہہ احساس نہیں سی کہ اقتدار وچ رہندے ہوئے کیویں ذمہ دارانہ کردار ادا کیتا جاندا اے۔ وزیراعظم دا منصب کیہ تقاضے کردا اے۔ تے حکمران دا انداز بیاں کیہ ہونا چاہیدا اے۔ بالکل ویسے ای کرسی اقتدار توں رخصت دے وی جناب بوکھلائے ہوئے نیں۔ اوہناں دی تقریراں بیانات تے طرزعمل توں اندازہ ہوندا اے کہ اوہ ہر قیمت اتے خود نوں وزیراعظم ویکھنا چاہندے نیں۔اوہناں لئی خود توں اگے کجھ وی نہیں۔ اوہناں نوں صرف اوہو اسٹیبلشمنٹ چنگی لگدی اے جہڑی اوہناں لئی اقتدار دے رستے صاف کرے۔ جناب عمران خان اک جہاندیدہ انسان نیں لیکن حقیقت ایہہ اے کہ اوہناں نوں نہ تے سیاست آندی اے تے نہ ای اوہناں وچ قوم نوں لیڈ کرن والی قائدانہ صلاحیتاں نیں۔ اوہ خود نوں اک کامیاب کپتان سمجھدے نیں تے اپنی ایسے خوبی اتے اج تک ہر
کدھرے اتراندے پھردے نیں لیکن گیارہ کھڈاریاں دی کرکٹ ٹیم نوں ہینڈل کردیاں ہوئیاں اوہناں دے ساتھی کھڈاریاں توں کیہ کیہ مسئلے سن۔ ایہہ میری عمر دے لوک بخوبی جاندے نیں۔ خان صاحب دے کول بیٹھے لوک اوہناں نوں دلیل توں ایہہ نقطہ نہیں سمجھا رہے کہ اگلا سال الیکشن دا اے۔ جہنا ممکن ہووے عوام دی فلاح دے منصوبے شروع کیتے جانے چاہیدے نیں۔ ایسے منصوبے جہناں دے اثرات اگلے کجھ مہینیاں تک نظر وی آن لگن۔ یعنی ایہہ ویلا اے کہ تھلڑی سطح اتے ترقیاتی کماں دا جال وچھا دتا جاوے۔ وزیراعلیٰ پنجاب چودھری پرویزالٰہی صوبے دے لوکاں دے جذبات تے احساسات اتے وی اوہناں دی نظر رہندی اے۔ سیاستداناں’ میڈیا’ بیوروکریسی’ دانشوراں’ صحافیاں تے عسکری قیادت نال چنگی سلام دعا رکھدے ہون۔ ایس لئی سیاسی شعور دا
تقاضا اے کہ پنجاب اسمبلی توڑن دے بجائے چودھری پرویزالٰہی نوں ترقیاتی کماں دا جال وچھان دا ٹارگٹ دتا جاوے تے نال کے پی کے وچ انج ای کیتا جاوے۔ جے خان صاحب خود نوں اک مقبول رہنما سمجھدے نیں تے اگلے انتخابات دی تیاری کرو۔ سندھ بلوچستان وچوں ایسے لوکاں دا چنائو کرو جہناں نوں عوام وچ پذیرائی ہووے۔ اج بابائے قوم حضرت قائداعظم دی سالگرہ اے تے اج مینوں ایہہ لکھنا پے رہیا اے کہ میرے ملک نوں اج تک اک وی ایسا سیاستدان نہیں ملیا جہڑا میز اتے بیٹھ کے دلیل دے نال اپنی گل منوان دا ہنر جاندا ہووے۔
تقسیم برصغیر دے کجھ سال مگروں لارڈمائونٹ بیٹن بی بی سی نوں انٹرویو وچ کہندا اے کہ حکومت برطانیہ نے اوہناں نوں ہندوستان بھیجیا ہی ایس لئی سی کہ کسے صورت وی پاکستان دا قیام عمل وچ نہ آن دتا جاوے۔ اوہ کہندا اے کہ میریاں راتاں دیاں نیندراں حرام ہو چکیاں سن کہ کیویں قائداعظم نوں پاکستان دے حصول توں باز رکھ سکاں گا۔ طاقت تے سیاست ہر طرحاں دی تدبیراں اختیار کیتیاں مگر قائداعظم اک چٹان وانگوں قیام پاکستان لئی ڈَٹے رہے۔ اوہناں دے کول ہر سوال دا مکمل جواب ہوندا سی۔ اوہناں نال گل کردیاں ہوئیاں صاف لگدا سی کہ اوہناں توں اپنی مرضی دی کوئی وی گل منوانا مشکل ای نہیں ناممکن اے۔
فخرالدین بھارتی صدر قائداعظم نوں جنگ آزادی دا بہادر سپاہی کہندا اے۔ بھارتی جنتا پارٹی دا رہنما جسونت سنگھ کہندا
اے کہ قائد صرف مسلماناں دے نہیں بلکہ سارے ہندوستانیاں دے لیڈر سن۔ امریکی مورخ اسٹینلے کہندا اے بہت گھٹ لوک تریخ دا دھارہ بدل پاندے نیں اوہناں وچ کجھ ای دنیا دے نقشے وچ تبدیلی لیاندے نیں تے مشکل نال ای کوئی لیڈر اپنی قوم لئی وکھرے وطن حاصل کر پاندا اے۔ محمد علی جناح وچ ایہہ تنوں خصوصیات سن تے اوہناں نے اپنی سیاست نال ایہہ تنوں کم عملی طور تے کر کے وکھا دِتے۔ پنڈت جواہر لعل دی بھین وِجے پنڈت قائداعظم دی سیاسی بصیرت اتے گل کردیاں ہوئیاں کہندیاں نیں۔ جے مسلماناں دے کول سوگاندھی’ سونہرو تے سوپٹیل ہوندے تے اوہدے جواب وچ کانگریس دے کول صرف اک محمدعلی جناح ہوندا تے ہندوستان کسے صورت تقسیم نہ ہوندا۔ موہن داس کرم چند گاندھی کہندا اے کہ اوہناں نوں یقین اے کہ محمد
علی جناح نوں نہ ڈرایا جا سکدا اے نہ جھکایا جا سکدا اے تے نہ اوہ کسے مل تے خریدے جا سکدے نیں۔ برطانوی صحافی بیورولی نکلسن قائداعظم نال ملاقات کردے نیں تے اوہناں دی صلاحیتاں دا گن کجھ ایس طرحاں گاندے نیں۔ میرے سامنے ایشیا دی عظیم ترین شخصیت بیٹھی اے۔ ایہہ انسان ایس ویلے 67 سال دا ہو چکیا اے۔ دراز قد’ چھریرا بدن’یک چشمی عینک’ اک چٹا کالر گلے وچ’ وضعدار سلک سوٹ۔ اوہناں دی گلاں توں میں محسوس کر رہیا واں کہ اوہ ہندوستان دی سیاست نوں جدھر چاہوے گا لے جاوے گا۔ ہندوستان دے مسلم اوہناں دے اک اشارے تے سب کجھ کر گزرن نوں تیار نیں۔ پوری ہندو لیڈرشپ نوں قائد جیسا مقام حاصل نہیں اے مگر ہندوواں دے کول گاندھی دی جانشینی لئی نہرو اے۔ راج گوپال اچاریہ اے’ پٹیل نیں تے دوجے بہت سارے قدآور سیاسی رہنما موجود نیں۔ مگر مسلماناں دے کول محمد علی جناح مگروں سیاست دے دائو پیچ نوں سمجھن والا دُوجا ہور کوئی نہیں اے۔ پنڈت جواہر لعل نے حد کردتی تے اوہ قائد دی عظمتاں دا اعتراف انج کیتا کہ چنگا کردار تے چنگی سیاست ای اوہ راز نیں جہناں دی وجہ نال محمد علی جناح نے کامیابیاں حاصل کیتیاں۔