ہاتھی پالن دی اہمیت پیدا کرو

امر جلیل

پچھلی کتھا دا اختتام اسیں انتخاب عالم دے عالمی ریکارڈ تے کیتا سی۔ میرا عقیدہ اے میرا یقین اے کہ کجھ وی تمام نہیں ہوندا۔ کجھ وی ختم نہیں ہوندا۔ ظاہری اختتام دے نال غیرمتوقع کہانی دی ابتدا ہو چکی ہوندی اے۔ وقفے وقفے نال ایس موضوع تے ساڈی آپس وچ گل بات ہوندی رہوے گی۔ فی الحال پچھلی کتھا دے سلسلے نوں جاری رکھدے ہوئے اسیں اج دی کتھا دی ابتدا اک اجہے ورلڈ ریکارڈ ہولڈر توں کرنے آں جہدے بارے میرے ورگے بڈھیاں توں علاوہ شاید ای کسے نے کجھ سنیا ہووے۔ خاص طور تے موبائل فون دے متوالیاں نے’ ایہدے بعد کسے سیاسی سانحے دا ذکر لے کے بہہ جاواں گے۔ تسیں بروجن داس دا ناں سنیا اے؟ نہیں سنیا اے نا’ پیراک سن۔ یعنی تردے سن’ پیراکی وچ اپنا ثانی نہیں سن رکھدے۔ پیراکی وچ اک سو میٹر’ دو سو میٹر تے چار سو میٹر وچ پاکستان دے ریکارڈ ہولڈر تے قومی چیمپئن سن۔ اسیں بڈھیاں وانگوں اوہ برٹش انڈیا وچ پیدا ہوئے سن۔ بروجن داس 1927ء وچ بنگال وچ پیدا ہوئے سن۔ تقسیم ہند دے ویلے اوہ مشرقی پاکستان وچ سن۔ پاکستان دا ریکارڈ بریکنگ چیمپئن ہون دے باوجود بروجن داس نوں میلبورن اولمپکس 1956ء لئی نظرانداز کیتا گیا۔ پریس نوں دسیا گیا کہ بروجن داس دی بانہہ وچ تکلیف سی۔ مایوسی تے دل شکستگی نے بروجن داس لئی بین الاقوامی پیراکی دے بوہے کھول دتے۔ اوہناں نوں فرانس توں انگلینڈ تک انگلش چینل پار کرن دی دعوت دتی گئی۔ بروجن داس پہلے ایشیائی پیراک بنے جہناں نے انگلش چینل پار کیتا۔ ایہدے بعد بروجن داس نے چھ واری انگلش چینل کراس کیتا تے مقابلے وچ سب توں اگے نکل گئے تے نواں عالمی ریکارڈ بنا لیا۔
ایہدے بعد اوہناں نے اک ہور عالمی ریکارڈ بنا دتا جدوں اوہناں نے انگلش چینل نوں مخالف سمت توں تیر کے تیراں گھنٹے تے چھبی منٹ وچ پار کیتا۔ اک واری باکسر محمدعلی کلے نے بروجن داس نوں گلے لاندے ہوئے کہیا سی کہ تیراکی وچ تیرے کارنامے باکسنگ وچ میرے کارنامیاں توں بہت وڈے نیں۔ دنیا بھر دے اعلیٰ اعزازات نال بروجن داس نوں نوازیا گیا۔ 1999ء وچ ساڈی سرکار نے وی بروجن داس نوں بعد از موت پاکستان دے سب توں رواجی انعام پرائیڈ آف پرفارمنس نال نوازیا سی۔ اودوں تک بروجن داس کدوں دے دنیا چھڈ کے جا چکے سن۔ بروجن داس دے سارے ریکارڈ بنگلہ دیش دے کھاتے وچ وکھائے جاندے نیں۔ تصدیق کرن لئی گوگل تے بروجن داس لکھو تے آپ پڑھ لوو۔ ایہدے بارے وچ میں ہور کجھ لکھنا مناسب نہیں سمجھدا۔ بس ایناں لکھن دی اجازت دیو کہ اسیں عالمی معیار دے ہیرو نوں سنبھال نہ سکے۔ ساڈے وچ شاید اینی اہلیت ای نہیں سی کہ اسیں بروجن داس نوں اپنا سکدے۔ کھیڈاں دی دنیا وچ بروجن داس دے کارنامے کسے وی صورت وچ گریٹ جہانگیر خان توں گھٹ نہیں۔ ساڈی اپنی دیسی زباناں وچ اک ملدی جلدی کہاوت اے۔ تسیں سن لوو’ ہاتھی پالنا راجیاں دا کم اے۔ ایس دیسی کہاوت دے مخفی معنی سمجھ رہے او نا تسیں؟ اسیں کیوں جے راجے مہاراجہ نہیں سی ایس لئی عالمی سطح دے پیراک چیمپئن بروجن داس نوں پالنے پوسنے تے سنبھالن دے قابل نہیں سی۔
قائداعظم دے نال بداخلاقی تے بددیانتی ورگے شرمناک سیاسی سانحے دے بعد اسیں پاکستان دے پہلے وزیراعظم لیاقت علی خان دے قتل دا جائزہ لواں گے۔ سنیا اے کہ اوہناں دے قتل دی چھان بین کرن لئی سرکار نے اک اعلیٰ سطحی کمیٹی بنائی سی ایس رپورٹ دا مکمل متن کتھے اے’ کئوی نہیں جان دا۔ اسیں اللہ سائیں دے بخشے ہوئے پاکستانی جاننے آں’ سمجھنے آں کہ اعلیٰ منصب تے بیٹھے ہوئے منصب دار دے نیڑے عام بندے دا جانا’ اوہناں نوں ملنا ممکن نہیں۔ اوہ حضرات جدوں کسے کانفرنس’ پریس کانفرنس’ سیاسی سیمینار وچ شرکت کرن جا رہے ہوندے نیں اودوں بڑی چھان بین دے بعد مدعوئین نوں دعوت نامے جاری کیتے جاندے نیں۔ لیاقت علی خان نوں 16اکتوبر 1951ء دے دن قاتل نے موت دے گھاٹ اتاریا سی۔ اگے کجھ لکھن توں پہلاں میں اک مودبانہ گزارش کرنا چاہنا واں۔ سیاسی سانحیاں وچ مرن والیاں نوں میں شہید نہیں لکھدا۔ جدوں تک تسیں اللہ دی راہ وچ لڑدے ہوئے مارے نہیں جاندے اودوں تک تسیں شہید کہلان دے حق دار نہیں ہوندے۔ ایس لئی معافی دا طلب گار آں کہ میں لیاقت علی خان دے ناں دے نال لفظ شہید نہیں لکھیا۔
لیاقت علی خان دے سیاسی قتل دے حوالے نال میرے کجھ سوالات نیں۔ لیاقت علی خان دا خطاب سنن لئی اہم شخصیات نوں دعوت نامے کنہے جاری کیتے سن؟ میرا دوجا سوال اے کہ خطاب توں پہلاں لیاقت علی خان دے بالکل سامنے بیٹھن والے وی آئی پیز دا انتخاب کنہے کیتا سی؟ میرا تریجا سوال ایہہ وے کہ وی آئی پیز دیاں سیٹاں دا تعین کنہے کیتا سی؟ میرا چوتھا سوال اے کہ وی آئی پیز دے درمیان لیاقت علی خان دے نیڑے اک انجان اجنبی بندہ سیداکبر یاں سعیداکبر نوں کہدے کہن تے بٹھایا گیا سی؟ میرا اگلا سوال اے کہ سعیداکبر یاں سیداکبر دے بالکل پچھے بیٹھن والے بندے نوں کہدے حکم تے اوتھے بٹھایا گیا سی؟ یاد رہوے کہ وی آئی پیز دیاں سیٹاں دے پچھے حفاظتی ارکان نوں بٹھایا جاندا اے۔ سعیداکبر یاں سیداکبر نے جدوں لیاقت علی خان تے گولی چلائی سی تے اوسے ویلے سعیداکبر دے پچھے بیٹھے ہوئے بندے نے سعیداکبر نوں گولی مار کے مار دتا سی تے اوہ موقع واردات توں غایب ہو گیا سی۔ میرا آخری سوال ایہہ وے کہ ایس سانچے دی پن چھان کرن والی کمیٹی دی رپورٹ کتھے اے؟۔٭